ۇستىمىزدەگى جىلعى 1 قىركۇيەكتە س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە «ءبىلىم كۇنىنە» ارنالعان «قازاتۋ – بولاشاق باستاۋى!» اتتى سالتاناتتى مەرەكەلىك ءىس-شارا ءوتتى.
ۇستىمىزدەگى جىلعى 1 قىركۇيەكتە س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە «ءبىلىم كۇنىنە» ارنالعان «قازاتۋ – بولاشاق باستاۋى!» اتتى سالتاناتتى مەرەكەلىك ءىس-شارا ءوتتى.
اتالمىش شاراعا س.سەيفۋللين اتىنداعى قازاتۋ رەكتورى, قر ۇعا كوررەسپوندەنت-مۇشەسى ا.كۇرىشباەۆ, قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارى جامبىل احمەتبەكوۆ جانە باقىتبەك سماعۇلوۆ, قر ۇلتتىق عىلىم اكادەمياسىنىڭ اكادەميگى زايرۋللا دۇيسەنبەكوۆ, ساحنا مايتالمانى باۋىرجان يبراگيموۆ, قازاقستان كتك وداعىنىڭ پرەزيدەنتى ەسەن ەلەۋكەن, 2012 جىلعى لوندون وليمپياداسىنىڭ قولا جۇلدەگەرى, بوكسشى مارينا ۆولنوۆا جانە 2008 جىلعى بەيجىڭ وليمپياداسىنىڭ جۇلدەگەرى, تاەكۆوندوشى ارمان چيلمانوۆ, «قازسپورت» تەلەارناسىنىڭ باس ديرەكتورى, تانىمال سپورت ءجۋرناليستى دياس احمەتشارىپ, پروديۋسسەر ەۆگەني جاگالتاەۆ جانە باسقا ارنايى شاقىرتىلعان مەيماندار قاتىستى.
ءوز سوزىندە ۋنيۆەرسيتەت رەكتورى, پروفەسسور اقىلبەك كۇرىشباەۆ «بيىلعى جىلى ءبىزدىڭ ۋنيۆەرسيتەتىمىز اگرارلىق سالاداعى بارلىق وقۋ ورىندارىنىڭ ىشىندە الدىڭعى لەكتەن ورىن الدى. 2013-2014 وقۋ جىلى ۋنيۆەرسيتەتتىڭ ءبىرىنشى كۋرسىنا 2 804 ستۋدەنت قابىلدانسا, ولاردىڭ 1 343-ءى مەملەكەتتىك گرانتقا يە بولعاندار. بۇل ستۋدەنتتەردىڭ 47,9% مەملەكەتتىك گرانتپەن وقيدى دەگەن ءسوز. بۇل كورسەتكىش – ءبىزدىڭ ۋنيۆەرسيتەتىمىزدىڭ جاستار قالاۋىنا يە بولعان بەدەلدى وقۋ ورنى ەكەنىن دالەلدەيدى», دەپ اتاپ ءوتتى.
شارا بارىسىندا ستۋدەنتتەردىڭ www.univerlife.kz الەۋمەتتىك جەلىسىندە جۇرگىزىلگەن جوو-لار اراسىنداعى رەسپۋبليكالىق ساۋالنامانىڭ قورىتىندىسى دا جاريا ەتىلدى. جالپى سانى 105 جوعارى وقۋ ورىنى قاتىسقان ساۋالناما ستۋدەنتتەر اراسىندا جۇرگىزىلىپ, ناتيجەسىندە س.سەيفۋللين اتىنداعى قازاق اگروتەحنيكالىق ۋنيۆەرسيتەتى «ەڭ ۇزدىك ۋنيۆەرسيتەت» اتاعىن جەڭىپ الدى. بۇل اقجولتاي حابار تۋرالى سەرتيفيكاتتى ۋنيۆەرسيتەت رەكتورى اقىلبەك كۇرىشباەۆقا پارلامەنت ءماجىلىسىنىڭ دەپۋتاتى جامبىل احمەتبەكوۆ تاپسىردى.
بيوتەحنولوگيا سالاسى بويىنشا جاس تا بولسا عىلىمي ىزدەنىستە جوعارى تابىستارعا قول جەتكىزىپ, ارنايى عىلىمي گرانتتارعا يە بولعان اگرونوميا فاكۋلتەتىنىڭ ستۋدەنتى اسەم جانعۇلوۆانى ۋنيۆەرسيتەت رەكتورى ا.كۇرىشباەۆتىڭ ارنايى ماداقتاۋ حاتىمەن قر ۇلتتىق عىلىم اكادەمياسىنىڭ اكادەميگى زايرۋللا دۇيسەنبەكوۆ ماراپاتتادى.
56 جىلدىق تاريحى بار قازاتۋ قاشاندا ەلىمىزدىڭ باس قالاسى استانادا وتەتىن مەرەكەلىك ءىس-شارالاردىڭ بەل ورتاسىندا جۇرەدى, ۋنيۆەرسيتەتتىڭ ونەرپاز جاستارى قالالىق, رەسپۋبليكالىق, حالىقارالىق ونەر دودالارىندا جەڭىمپاز اتانۋدا. «ءدان ەككەن جانە ءبىلىم بەرگەن ادامدار ەڭ باقىتتى جاندار» دەپ ءسوزىن باستاعان ساحنا ساڭلاعى باۋىرجان يبراگيموۆ ۋنيۆەرسيتەتتىڭ «قىزعالداق» بي ءانسامبلى مەن «شابىت» ۇلت-اسپاپتار انسامبلىنە استانا قالالىق مادەنيەت باسقارماسىنىڭ اتىنان ارنايى ماقتاۋ قاعازدارىن تابىس ەتتى.
سونىمەن قاتار, ۋنيۆەرسيتەت قابىرعاسىندا بىرقاتار سپورت ساڭلاقتارى ءبىلىم الۋدا. ولاردىڭ قاتارىندا بوكسشىلار دانيار ەلەۋسىنوۆ, مەرەي اقشالوۆ, ءىلياس سۇلەيمەنوۆ, قازاندا وتكەن حالىقارالىق ۋنيۆەرسيادانىڭ كۇمىس جۇلدەگەرى ەسكارحان وسكانوۆ ت.ب. بار. استانا قالالىق سپورت جانە دەنە تاربيەسى باسقارماسىنىڭ ارنايى سىيلىعىن سالتاناتتى تۇردە تاپسىرعان لوندون وليمپياداسىنىڭ قولا جۇلدەگەرى مارينا ۆولنوۆا ستۋدەنتتەردى سپورتتى سەرىك ەتۋگە جانە سالاماتتى ءومىر سالتىن ۇستانۋعا شاقىردى.
ءبىلىم كۇنىنە ارنالعان مەرەكەلىك سالتاناتتى كەش بارىسىندا ۋنيۆەرسيتەتتىڭ قوعامدىق كاسىپتەر فاكۋلتەتىنىڭ ۇجىمى دايىنداعان كونتسەرت ۇيىمداستىرىلىپ, مەرەكە كورىگىن «اگراركا ساربازدارى» كتك كومانداسىنىڭ جۇلدىزدارى تولىقتىردى.
«ەگەمەن-اقپارات».
