كەشە يندونەزيا پرەزيدەنتى سۋسيلو بامبانگ يۋدويونونىڭ قازاقستانعا رەسمي ساپارى اياسىندا بەيبىتشىلىك جانە كەلىسىم سارايىندا يندونەزيانىڭ مادەنيەت كۇندەرىنىڭ اشىلۋ سالتاناتى ءوتتى. ول يندونەزيا حالقىنىڭ ونەرى مەن مادەنيەتىن تانىستىراتىن فوتو جانە توقىما بۇيىمدارىنىڭ كورمەسىمەن, سونداي-اق, ونەر شەبەرلەرىنىڭ قاتىسۋىمەن وتكەن گالا-كونتسەرتپەن ايشىقتالدى.
كەشە يندونەزيا پرەزيدەنتى سۋسيلو بامبانگ يۋدويونونىڭ قازاقستانعا رەسمي ساپارى اياسىندا بەيبىتشىلىك جانە كەلىسىم سارايىندا يندونەزيانىڭ مادەنيەت كۇندەرىنىڭ اشىلۋ سالتاناتى ءوتتى. ول يندونەزيا حالقىنىڭ ونەرى مەن مادەنيەتىن تانىستىراتىن فوتو جانە توقىما بۇيىمدارىنىڭ كورمەسىمەن, سونداي-اق, ونەر شەبەرلەرىنىڭ قاتىسۋىمەن وتكەن گالا-كونتسەرتپەن ايشىقتالدى.
ءبىر حالىق پەن ەكىنشى حالىقتى ەڭ الدىمەن مادەني تۇرعىداعى بايلانىستار جاقىنداستىرادى. بۇل ورايدا يندونەزيانىڭ باي مادەنيەتىمەن, ونەرىمەن تانىسۋعا كەشە بەيبىتشىلىك جانە كەلىسىم سارايىنا جينالعان استانالىقتار قاتارى مول بولدى. توقىما بۇيىمدار, سانمەن تىگىلگەن كويلەكتەر مەن اسىل تاستاردىڭ جانە فوتولاردىڭ كورمەسى يندونەزيانىڭ بۇگىنى مەن وتكەنىنەن, تۇرمىسى مەن مادەنيەتىنەن سىر شەرتكەندەي اسەر قالدىردى.
گالا-كونتسەرت باستالعاندا ەكى ەلدىڭ مادەنيەت مينيسترلەرى ساحناعا شىعىپ, 
كورەرمەندەردى مادەني كۇندەردىڭ اشىلۋىمەن قۇتتىقتادى. الدىمەن ءسوز العان ەلىمىزدىڭ مادەنيەت جانە اقپارات ءمينيسترى مۇحتار قۇل-مۇحاممەد يندونەزيا مەن قازاقستان اراسىندا ديپلوماتيالىق, ساۋدا-ەكونوميكالىق, ءمادەني-گۋمانيتارلىق بايلانىستاردىڭ جيىرما جىلدان بەرى ءوز دەڭگەيىندە دامىپ كەلە جاتقانىن, بۇل ءوز كەزەگىندە الەمدىك اۋقىمداعى ىنتىماقتاستىققا جول اشقانىن باياندادى. سونداي-اق, ەكى ەل پرەزيدەنتتەرىنىڭ كەشە اقوردادا كەزدەسۋى بارىسىندا دا ءبىرشاما مەموراندۋمدارعا قول قويىلعانىن, ونىڭ ىشىندە مادەني ىنتىماقتاستىق تۋرالى مەموراندۋمنىڭ دا بولعانىن اتاپ ايتتى. مينيستر ءسوز سوڭىندا كەلەر جىلى قازاقستاننىڭ ءمادەني كۇندەرى يندونەزيا استاناسى دجاكارتا قالاسىندا وتەتىنىن مالىمدەدى.
ال يندونەزيانىڭ ءبىلىم جانە مادەنيەت ءمينيسترى مۇحاممەد نۋح ەكى حالىقتىڭ مەملەكەتتىك تۇرعىداعى دامۋى مەن نەگىزگى دىندەرىنىڭ ۇقساستىعىن, ەكى ەلدى دە كوپ ەتنوستىڭ مەكەن ەتەتىنىن ايتتى. ول ءارى قاراي دا مادەني بايلانىستاردىڭ نىعاياتىنىنا سەنىمدى ەكەنىن جەتكىزدى.
گالا-كونتسەرتتە بۇگىنگى يندونەزيانىڭ كەلبەتىن بەينەلەگەن «عاجايىپ يندونەزيا» دەرەكتى ءفيلمى كورسەتىلدى. ديزاينەر سوني مۋحينسوننىڭ ءسان ۇلگىلەرىنىڭ تانىستىرىلىمى ءوتتى. سونداي-اق, ماۆار بۋدايا توبى مەن باندۋگي قالاسىنىڭ بي مەكتەبىنىڭ وكىلدەرى جانە باسقا دا ءبىرشاما انشىلەر مەن بيشىلەردىڭ ونەرلەرى پاش ەتىلدى.
ايگۇل سەيىلوۆا,
«ەگەمەن قازاقستان».
