جازدىڭ سوڭعى كۇندەرى شىعىس جۇرتى ءۇشىن اۋقىمدى شارالارعا تولى بولدى. اتا زاڭ دا اسپەتتەلدى. حالىقارالىق بال فەستيۆالى دە ءوتتى. سونداي-اق, شىڭعىستايدان شىعىپ, شىرايلى دا شۇرايلى تۋعان ولكەسىن عۇمىر بويى جىرلاعان, وقىرمانىنىڭ ءبارىن اسقاق التايعا ىڭكار ەتكەن ورالحان بوكەيدىڭ 70 جىلدىق مەرەيتويى دا باستالىپ كەتتى. كەربۇعىداي قاسقايىپ, تاۋقۇدىرەت تالانتىمەن تامساندىرعان تۇلعا وسكەمەننىڭ تورىندە تۇعىرعا قوندى.
جازدىڭ سوڭعى كۇندەرى شىعىس جۇرتى ءۇشىن اۋقىمدى شارالارعا تولى بولدى. اتا زاڭ دا اسپەتتەلدى. حالىقارالىق بال فەستيۆالى دە ءوتتى. سونداي-اق, شىڭعىستايدان شىعىپ, شىرايلى دا شۇرايلى تۋعان ولكەسىن عۇمىر بويى جىرلاعان, وقىرمانىنىڭ ءبارىن اسقاق التايعا ىڭكار ەتكەن ورالحان بوكەيدىڭ 70 جىلدىق مەرەيتويى دا باستالىپ كەتتى. كەربۇعىداي قاسقايىپ, تاۋقۇدىرەت تالانتىمەن تامساندىرعان تۇلعا وسكەمەننىڭ تورىندە تۇعىرعا قوندى.
وبلىس ورتالىعىنىڭ جىبەك ماتالار كومبيناتى اتالاتىن شاعىناۋدان سوڭعى جىلدارى جەدەل دامىپ كەلەدى. وراعاڭنىڭ قالام ۇستاعان ويلى ءساتى بەينەلەنگەن ەسكەرتكىشى جاڭادان ءوسىپ-وركەندەپ كەلە جاتقان وسى اۋداندا اشىلدى. وندا قالامگەر اتىنداعى №44 ورتا مەكتەپ تە بار. ياعني, ەسكەرتكىشتىڭ ورىن تەپكەن الاڭقايى الداعى ۋاقىتتا قالا تۇرعىندارى مەن جاستارى, مەيماندارى ءۇشىن سەيىلدەيتىن كورنەكى ورىنداردىڭ بىرىنە اينالادى. ەسكەرتكىش اۋماعى كوگالداندىرىلىپ, جارىقتاندىرىلعان. تابانىنا تاس توسەلىپ, ورىندىقتار قويىلعان.
ورالحان بوكەي ەسكەرتكىشىنىڭ اشىلۋ سالتاناتىنا ەلىمىزدىڭ تۇكپىر-تۇكپىرىنەن كەلگەن قالامگەرلەر قاۋىمى قاتىستى. ولاردىڭ قاتارىندا قابدەش ءجۇمادىلوۆ, كادىربەك سەگىزباي, يسرايل ساپارباي, نەسىپبەك ايت ۇلى, تەمىرحان مەدەتبەك, جۇماباي شاشتاي ۇلى, تىنىشتىقبەك ءابدىكاكىموۆ, ۇلىقبەك ەسداۋلەت جانە تاعى باسقا ەلىمىزگە بەلگىلى اقىن-جازۋشىلار بار.
سالتاناتتى شارانىڭ باسىندا كوركەمسوز سايىسىنىڭ جەڭىمپازدارى مارجان ءمۇسلىمبەكوۆا مەن قاراكوز ابەنوۆا التاي جىرشىسىنىڭ شىعارمالارىنان ناشىنە كەلتىرىپ ۇزىندىلەر وقىدى.
ەسكەرتكىشتىڭ اشىلۋىمەن قۇتتىقتاعان ءوڭىر باسشىسى بەردىبەك ساپارباەۆ ادەبيەت اسپانىندا جارىق جۇلدىزداي جارقىراپ وتكەن ورالحان بوكەيدىڭ ورنى بولەك ەكەنىن, قازاق ەلىن الەمگە تانىتاتىن, مەرەيىن ءۇستەم ەتەتىن ساناۋلى دۇنيەنىڭ ءبىرى ادەبيەت ەكەنىن اتاپ ءوتتى. وبلىس باسشىسىنىڭ ايتۋىنشا, جازۋشىنىڭ مەرەيتويىندا وعان ارنالعان ەكى ەسكەرتكىش ورناتىلادى. ونىڭ ءبىرى – وسكەمەندە اشىلعان مىنا مونۋمەنت بولسا, ەكىنشىسى ءسوز زەرگەرىنىڭ تۋعان ولكەسى كاتونقاراعايدا بوي كوتەرەدى.
الماتىدا ورالحان بوكەيمەن كورشى تۇرعان جازۋشى قابدەش ءجۇمادىلوۆ ءىنىسى تۋرالى اقتارىلا ەستەلىك ايتتى.
– اقىن-جازۋشىلاردى ءاسپەتتەپ, قۇرمەت كورسەتكەن ەلدىڭ عۇمىرى دا باياندى بولادى. وسكەمەندە لەنين ەسكەرتكىشىنىڭ ورنىنا ابايدىڭ تۇلعاسىن قويعاندا ەرەكشە قۋانعانبىز. اقىننىڭ ارۋاعى ريزا بولعان شىعار, مۇنداعى ءىس ىلگەرى باستى. التاي جىرشىسى اتانعان ورالحانمەن 15 جىل كورشى تۇردىق. ادەبيەتتەگى سىيلاس, پىكىرلەس جانداردىڭ ءبىرى ەدى. مەرەيتوي قارساڭىندا اشىلعان ەسكەرتكىشىن كورىپ, قۋانىپ تۇرمىن. قالامگەرگە كورسەتىلگەن قۇرمەت – ۇلتقا كورسەتىلگەن قۇرمەت. ەسكەرتكىش قويىلعان كوشە – وسكەمەنگە كىرەر, ورالحاننىڭ تۋعان جەرىنە بارار جول بويىندا ەكەن. «كومسومولدار» اتالاتىن وسى كوشەنىڭ اتاۋىن ءبۇگىن اشىلعان ەسكەرتكىش يەسىنىڭ ەسىمىمەن اتاسا, نۇر ۇستىنە نۇر بولار ەدى, – دەدى جازۋشى.
وراعاڭنىڭ قالامگەر دوستارىنىڭ ءبىرى كادىربەك سەگىزباي ۇلى دا ەستەلىكتەرىمەن ءبولىستى. اقىن اسلان عافۋروۆ ارناۋ ولەڭىن وقىدى. مۇسىنشىلەر ەۆگەني نەپيانوۆ پەن ۆلاديمير سامويلوۆ قاشاعان ەسكەرتكىشكە قالامگەرلەر گۇل شوقتارىن قويدى.
دۋمان اناش,
جۋرناليست.
وسكەمەن.
