قازىر اۋدانعا كىرىپ-شىعۋ جابىق, قوعامدىق كولىكتەر مەن تاكسيلەردىڭ قوزعالىسى توقتاتىلدى. تۇرعىندارعا قايتادان ۇيدەن ارنايى رۇقساتسىز كەتۋگە تىيىم سالىندى. بلوكادا ايماقتا COVID-19 سيمپتومسىز تاسىمالداۋشىلارى انىقتالعاننان كەيىن جاريالاندى. بۇعان دەيىن قىتاي بيلىگى ىندەتتىڭ ناقتى كولەمىن جاسىردى دەپ ايىپتالعان بولاتىن. كەشەدەن باستاپ بەيجىڭ كۇن سايىن جاڭا اسيمپتوماتيكالىق ينفەكتسيالار تۋرالى ەسەپتەر بەرە باستادى. تاۋلىك ىشىندە ەلدە 35 جاڭا ينفەكتسيا جانە 6 ءولىم رەسمي تىركەلدى, ۆيرۋستى جۇقتىرىپ العان ادامداردىڭ ءبارى شەتەلدەن كەلگەن جەرگىلىكتى ازاماتتار. «قىتاي ۆيرۋستى جەڭدى» دەگەن كۇننەن باستاپ تۇرعىندار شەتەلگە ساياحاتتاۋعا شىققان. سەبەبى جەرگىلىكتى تۋريستىك اگەنتتىكتەر ەكى-ءۇش ەسە ارزان باعامەن جولدامالار ۇسىنعان. ارزان جولدامانى كورگەن سوڭ شىداپ تۇرا العان ادامدار از بولىپتى.
قىتاي باسىلىمدارى كەشەدەن بەرى كوروناۆيرۋستىڭ ەمى تابىلمايىنشا, بۇرىنعى ءومىر سالتىن ۇمىتۋ كەرەكتىگىن ەسكەرتىپ جاتىر. بۇل - حالىقارالىق تۋريزم, 10 ادامنان ارتىق قاتىساتىن جيىنداردى شەكتەۋ, حالىقارالىق جيىنداردى ونلاين رەجيمدە وتكىزۋ. بۇل ماسەلە الداعى ۋاقىتتا زاڭ شەڭبەرى ارقىلى بەكىتىلەتىن كورىنەدى. قىتاي قوعامى بۇل ءتارتىپتى قابىلداسا, حالىقارالىق جيىندار ءۇشىن مىڭداعان دەلەگاتسيانى ءبىر جەرگە جيناۋدىڭ قاجەتى بولماي قالادى. ينتەرنەت پلاتفورمالاردىڭ اۋككاۋنت تەرەزەسى فورۋم مىندەتىن اتقارا بەرەتىن كورىنەدى.
ءتىپتى قىتايداعى جەڭىل ونەركاسىپ يندۋسترياسىنىڭ وكىلدەرى بەتپەردەسى بار كيىم ۇلگىلەرىن اشىق ساۋداعا شىعارۋعا دايىن وتىر ەكەن.
«الداعى ۋاقىتتا بەتپەردەسى بار ءسان كيىمدەرى ترەندكە اينالادى. قىتاي يندۋسترياسى سوعان ىڭعايلانىپ جاتىر. بۇل - قاجەتتىلىك» دەيدى 9tv.co.il
باسقا ەلدەرمەن سالىستىرعاندا, از بولعانىمەن, ەلدە دۇربەلەڭ كوبەيىپ كەلەدى, ويتكەنى ۋحانداعى تۇنگى قورقىنىش قايتادان بولۋى مۇمكىن. وسى جاعدايدا قىتاي ەكىنشى رەيستى بولدىرماس ءۇشىن حالىقارالىق رەيستەردى شەكتەپ, شەكارالىق باقىلاۋدى كۇشەيتتى.
عالىمدار بۇل Covid-19 ەرتەگىدەگى جەتى باستى ايداھاردان دا قاۋىپتى ەكەنىن, 19 ءتۇرلى ۆيرۋستىڭ قوسىندىسى ەكەنىن ايتىپ جاتىر. قازىرگى جاعدايدا ءبىز ءبىرىنشى قاۋىپتىڭ عانا باسىن قايتاردىق. بۇل ۆيرۋسقا قارسى ادام اعزاسىندا يممۋنيتەت جوق. سالىستىرمالى تۇردە ايتساق, ادامنىڭ اعزاسىنداعى قورعانىش قابىلەتى 19 ەسە كۇشتى بولۋى كەرەك.
ددسۇ دا دەرتكە قارسى ۆاكتسينا جىل اياعىنا دەيىن دايىن بولمايتىنىن ەسكەرتتى. 19 ءتۇرلى ۆيرۋستىڭ قوسىندىسىنىڭ بەتىن قايتارۋ ححI مەديتسيناسىنا وڭاي بولمايىن دەپ تۇر. جاراتىلىستىڭ زاڭىنا قارسى شىعىپ, ادامنىڭ ورنىن روبوت الماستىرادى دەپ استامسىعان ادامزاتقا ءوزى تاپقان ميلليون ءتۇرلى تەحنولوگياعا ەمەس, بەتپەردەگە عانا تاۋەلدى بولىپ, ءتورت قابىرعالى پاتەرىنىڭ تەرەزەسىنەن دالاعا تەلمىرىپ قالدى. مەديتسيناسىنىڭ مىڭ جىلدىق تاريحى بار قىتاي قايتا سوققان داۋىلدان قورعانۋ ءۇشىن ەسىك-تەرەزەسىن قىمتاي باستادى. قازىرگى جاعداي قازاققا ەسىگىن اقىرىن اشىپ, اقىرىن جاۋىپ ءجۇرۋ قاجەتتىگىن, الداعى ۋاقىتتا ساقتىقپەن ءجۇرۋ قاجەتتىگىن ەسكەرتىپ جاتىر, ۇقتىرىپ جاتىر.
اۋىلدان حابارلاسقان اعايىننىڭ سوزىنەن ۇققانىمىز – اۋىل دا باسى ارتىق جيىننان جانە بەيمەزگىل كوشەگە شىعۋدان ساقتانا باستاپتى. باسقاشا ايتقاندا, كۇندىز-ءتۇنى ەسىگى جابىلمايتىن اۋىل ۇيلەرىنىڭ ەسىگى جابىلعان. قاۋىپتى دەرتتەن وسىلاي ساقتاپ, كارانتيندەگى اۋىلعا اينالىپ بارادى. قازىر قازاق ءۇشىن باستىڭ اماندىعى ولجا بولىپ تۇر. «باس امان بولسا, تويلارىمىز الدا» دەگەنمەن دە, بۇرىنعى ءومىر سالتىن ءبىراز ۋاقىتقا دەيىن ۇمىتىپ, ەتەك-جەڭدى جىيۋعا تۋرا كەلەدى. مۇمكىن بۇل ىندەت ادامزاتتىڭ بويىنداعى داراقىلىقتان تازارتىپ, اباي ايتقان بەس دۇشپان: ماقتانشاقتىق, ەرىنشەكتىك, بەكەر مال شاشپاقتان اۋلاق ءجۇرۋ قاجەتتىگىن ۇقتىرۋ ءۇشىن جەر بەتىنە جىبەرىلگەن داۋىل شىعار.
