الەمگە, سونىڭ ىشىندە ەلىمىزگە ۇلكەن قاۋىپ-قاتەر ءتونىپ تۇرعان سىن ساعاتتا حالقىمىزدىڭ اماندىعى ءۇشىن قاتاردان تابىلۋعا, قىزمەت ەتۋگە قاشاندا دايىنبىز. توسىننان كەلگەن ىندەتتىڭ ىرگەمىزدى سوگىپ, بەرەكەمىزدى قاشىرماس ءۇشىن ءبارىمىز جۇدىرىقتاي جۇمىلىپ, ەلدىگىمىز بەن بىرلىگىمىزدىڭ جارقىن ۇلگىسىن كورسەتۋىمىز كەرەك.
بۇگىندە اق حالاتتى ابزال جاندار – دارىگەرلەر مەن مەديتسينا قىزمەتكەرلەرى اياقتارىنان تىك تۇرىپ, حالىقتىڭ دەنساۋلىعى ءۇشىن ايانباي ەڭبەك ەتىپ جاتىر. ولارعا دەگەن قۇرمەتىمىز بۇرىنعىدان دا ارتا ءتۇستى.
بۇعان قوسا كۇن-ءتۇن دەمەي, پاترۋلگە شىعىپ, قالا, اۋىل-ايماقتىڭ قاۋىپسىزدىگىن قامتاماسىز ەتىپ جۇرگەن, شەكارالاردى كىرپىك قاقپاي كۇزەتىپ تۇرعان قانشاما وتانداستارىمىز بار. وسىناۋ قىسىلتاياڭ شاقتا ءبىز دە بەي-جاي قالماي, ءوز ۇلەسىمىزدى قوسىپ, وتانعا قىزمەت ەتۋىمىز قاجەت.
ءوزىم وسكەمەن قالاسىنداعى مەكتەپتە العاشقى اسكەري دايىندىق پانىنەن ساباق بەرەمىن. قازىر مەكتەبىمىز ساقتىق شارالارىن كۇشەيتىپ, قاشىقتان وقىتۋعا كوشتى. مەن دە وقۋشىلارىممەن ۇنەمى بايلانىس ورناتىپ, حال-جاعدايلارىن ءبىلىپ, قازىرگى كۇردەلى كەزەڭدە ەلگە سۇيىسپەنشىلىكتىڭ, حالىققا قامقورلىقتىڭ قانشالىقتى قۇندى ەكەنىن تۇسىندىرۋگە تىرىسامىن. «جاس بۇركىت» اسكەري-پاتريوتتىق كلۋبىنىڭ جەتەكشىسى رەتىندە بالالاردىڭ وتان الدىنداعى جاۋاپكەرشىلىگىن ارتتىرۋعا قولىمنان كەلگەنشە جۇمىس ىستەپ ءجۇرمىن. سوندىقتان ەلدىگىمىز سىنالاتىن تۇستا ونەگە كورسەتىپ, ءوزىم دە ساپقا تۇرۋعا ساقاداي سايمىن.
سايات قاليجانوۆ,
«جاس بۇركىت» اسكەري-پاتريوتتىق كلۋبىنىڭ جەتەكشىسى
