ەكونوميكا • 05 ءساۋىر، 2020

تانكەرلەردىڭ قايدا باراتىنى بەلگىسىز

98 رەتكورسەتىلدى

شيكىزات ءوندىرىسىن ۇلعايتقان ساۋد ارابياسى كەيبىر تانكەرلەرىن جىبەرەتىن جەر تاپپاي جاتىر. Wall Street Journal-دىڭ حابارلاۋىنشا، الەمدەگى اسا ءىرى مۇناي ەكسپورتتاۋشى ەل شيكىزات سوعىسىنىڭ سالدارىنان وسىنداي قيىندىقپەن بەتپە-بەت كەلدى.

ىندەتتىڭ سالدارىنان سۇرانىس ازايعانىنا قاراماستان، ساۋد ارابياسى ءوندىرىس كولەمىن ۇلعايتۋدى توقتاتار ەمەس. قازىر بۇل كورسەتكىش تاۋلىگىنە 12 ميلليون باررەلگە جەتىپ، وسىدان 1 اي بۇرىنعى مەجەدەن 2 ميلليونعا اسىپ كەتتى. سونىڭ سالدارىنان ارتىق ءونىمدى جىبەرەتىن جەر تاپپاي جاتقانعا ۇقسايدى.

– ساۋد ارابياسىنىڭ پورتتارىنان كەتكەن كەيبىر تانكەرلەردىڭ باراتىن جەرى ءالى انىقتالعان جوق، سەبەبى ساتىپ الۋشى جوق، – دەپ حابارلادى وسى ەلدىڭ وكىلى Wall Street Journal-عا.

وسىلايشا، رەسەي نارىعىن جاۋلاپ الۋعا باعىتتالعان ساياسات ىندەتتىڭ سالدارىمەن قاتار كەلىپ، باعا 20 جىل بۇرىنعى كورسەتكىشكە دەيىن قۇلدىراپ كەتتى.

ەلدەردىڭ ءبارى ءوندىرىستى ازايتىپ، شەكاراسىن جاۋىپ جاتقاندىقتان مۇناي قويمالارى اۋزى-مۇرنىنان شىعا تولۋعا اينالدى. شيكىزات تاۋارلارىمەن اينالىساتىن Kpler كومپانياسىنىڭ حابارلاۋىنشا، اقپان ايىنان بەرگى ارالىقتا الەمدىك مۇناي قورى 90 ملن باررەلگە جۋىق كوتەرىلدى. Rystad كونسالتينگ كومپانياسىنىڭ دەرەگىنە سۇيەنسەك، ءساۋىر ايىندا نارىققا كۇن سايىن 25 ميلليون باررەل ارتىق مۇناي شىعادى. سوعان قاراماستان، ساۋد ارابياسىنداعى امەريكالىق مەردىگەر كومپانيالار ءوندىرىس جۇمىستارىن ءارى قاراي جالعاستىرا بەرۋگە دايىن. Aramco-نىڭ مەردىگەر كومپانيالارى باعانىڭ تومەندەگەنىنە قاراماستان پايدا تابا الادى.

سۇرانىس كەمىسە دە، ءوندىرىستى توقتاتپاعان كورولدىكتىڭ كەمىندە 3 تانكەرى باراتىن نۇكتەسىن «تاپسىرىس بەرۋشىلەرگە» دەپ كورسەتكەن، ياعني مۇنايدى قايدا اپاراتىنىن ءالى انىقتاۋ كەرەك. بۇل 3 تانكەرگە 6 ملن باررەل شيكى مۇناي سىياتىنىن ايتا كەتەيىك.

تەحاس كورونوۆيرۋستان ەڭ كوپ زارداپ شەككەن شتاتتاردىڭ ساناتىندا. شتاتتا ۆيرۋس جۇقتىرعاندار كوپ، مۇناي ونەركاسىبى دە شىعىنعا باتتى. كورولدىك تانكەرلەرى باعىت العان گالۆەستون قالاسىنىڭ پورتىنا كەلگەن كەمەلەردىڭ ەكيپاجىنا جاعاعا شىعۋعا تىيىم سالىنعان. سۇرانىستىڭ تومەندىگىنە بايلانىستى شتاتتا ءوندىرىستى دە مىندەتتى تۇردە تومەندەتۋدىڭ جولدارى قاراستىرىلىپ جاتىر.

ساۋد ارابياسىندا وندىرىلگەن ارتىق مۇناي تانكەرگە تيەلگەنىمەن، ەشقايدا بارماي، جاعالاۋدا قاڭتارىلىپ تۇر دەگەن دە پىكىر ايتىلۋدا. Kpler كومپانياسى كورولدىكتىڭ ىشكى نارىعىندا شيكىزات قورى 74 ملن باررەلگە جەتىپ، بىلتىرعى كورسەتكىشتەن 8،2 ملن باررەلگە اسىپ كەتكەنىن حابارلادى.

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار