استانادا يندونەزيانىڭ قازاقستانداعى مادەنيەتى كۇندەرى سالتاناتتى جاعدايدى اشىلدى. بۇل تۋرالى Bnews.kz ءتىلشىسى جابارلادى.
«20 جىلدان استام ۋاقىت بويىنا قازاقستان مەن يندونەزيانىڭ اراسىنداعى ديپلوماتيالىق, ساۋدا-ەكونوميكالىق, مادەني-گۋمانيتارلىق باعىتتاعى ىنتىماقتاستىق ءوز دەڭگەيىندە دامىپ كەلە جاتىر. وسى جىلدار ىشىندە ەكى مەملەكەت باسشىلارى بىرنەشە رەت جوعارى دەڭگەيدە كەزدەسىپ, ەكى ەلدىڭ ىنتىماقتاستىعىن دامىتۋعا ارنالعان بىرقاتار قۇجاتتارعا قول جەتكىزىلدى», - دەدى كۇندەردىڭ اشىلۋ سالتاناتىندا ءسوز سويلەگەن مادەنيەت جانە اقپارات ءمينيسترى مۇحتار قۇل-مۇحاممەد.
ءمينيستردىڭ ايتۋىنشا, وسىنىڭ ارقاسىندا ءبىزدىڭ ەلدەرىمىز قازىرگى تاڭدا كوپتەگەن ماسەلەلەر بويىنشا الەمدىك دەڭگەيدەگى ورتاق مامىلەگە قول جەتكىزىپ وتىر.
«وسىدان ەكى ساعات بۇرىن قازاقستان رەسپۋبليكاسىنىڭ پرەزيدەنتى مەن يندونەزيا پرەزيدەنتىنىڭ اراسىندا جوعارى دارەجەدە جانە كوپتەگەن ۇكىمەت مۇشەلەرىنىڭ قاتىسۋىمەن كەڭەيتىلگەن دارەجەدە كەزدەسۋلەر ءوتىپ, ەكى ەل اراسىنداعى بىرقاتار ىنتىماقتاستىق قۇجاتتارعا قول قويىلدى. سونىڭ ىشىندە, مادەني ىنتىماقتاستىق تۋرالى دا مەموراندۋم بار», - دەدى مۇحتار ابرار ۇلى.
بۇگىن سونداي-اق بەيبىتشىلىك جانە كەلىسىم سارايىندا يندونەزيانىڭ مادەنيەتى مەن ونەرىن جان-جاقتى تانىستىراتىن فوتو جانە توقىما بۇيىمدارىنىڭ كورمەسى اشىلدى. ول 4 قىركۇيەككە دەيىن سوزىلادى. ال 3-4 قىركۇيەك كۇندەرى «سارىارقا» ساۋدا ۇيىندە يندونەزيانىڭ «ءتۇرلى-ءتۇستى اسكەر» (Laskar Pelangi), «حابيبي جانە اينۋن» (Habibie dan Ainun), «قىزىل جانە اق» (Merah Putih), «ءبارى دە ۋكوك ءۇشىن» (Demi Ucok) لەپ اتالاتىن كوركەم فيلمدەرى كورەرمەن تالقىسىنا ۇسىنىلادى.
وسى جولى قازاق مادەنيەتىنىڭ كۇندەرى كەلەسى جىلى يندونەزيا استاناسى – دجاكارتا قالاسىندا وتەتىنى دە بەلگىلى بولىپ وتىر.
مۇرات ايتقوجا.
