مەملەكەت باسشىسى نۇرسۇلتان نازارباەۆ 5-6 قىركۇيەك كۇندەرى سانكت-پەتەربۋرگ قالاسىندا وتەتىن «ۇلكەن جيىرمالىق» سامميتىنە قاتىسادى. بۇل تۋرالى پرەزيدەنت جانىنداعى ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ حابارلادى.
وقىرمانعا وسىنى جەتكىزگەن BNews.kz ءتىلشىسى رەسمي وكىلدىڭ ەلباسى بۇل جيىنعا رەسەي پرەزيدەنتى ۆلاديمير ءپۋتيننىڭ شاقىرۋى بويىنشا بارا جاتقانىن باياندادى. «رەسەي فەدەراتسياسىنىڭ پرەزيدەنتى جانە «ۇلكەن جيىرمالىق» توبىنىڭ قازىرگى توراعاسى ۆلاديمير ءپۋتيننىڭ شاقىرۋىمەن مەملەكەت باسشىسى نۇرسۇلتان نازارباەۆ سانكت-پەتەربۋرگتە 5-6 قىركۇيەكتە وتەتىن «ۇلكەن جيىرمالىق» توبىنىڭ سامميتىنە قاتىساتىنىن حابارلايمىن», - دەدى ابيبۋللاەۆ.
«ۇلكەن جيىرمالىق» توبى G-20 حالىقارالىق ەكونوميكالىق جانە قارجىلىق كۇن تارتىبىندەگى اسا ماڭىزدى ماسەلەلەر مەن اسپەكتىلەر بويىنشا حالىقارالىق ىنتىماقتاستىق الدىندا تۇرعان ماسەلەلەردى جۇمىلا تالقىلاۋعا ارنالعان حالىقارالىق فورۋم بولىپ تابىلادى.
«سامميتتە مەملەكەت باسشىسى نۇرسۇلتان نازارباەۆ ءسوز سويلەيدى دەپ كۇتىلۋدە. سونىمەن قاتار, سامميت اياسىندا ەلباسى وسى سامميتكە قاتىسۋشى مەملەكەت جانە ۇكىمەت باسشىلارىنىڭ كەيبىرىمەن ەكىجاقتى كەزدەسۋلەر وتكىزەدى دەپ كوزدەلىپ وتىر», - دەپ تولىقتىردى رەسمي وكىل.
ساكەن مايلىباي.
