بۇگىن, 3 ءساۋىر كۇنى پرەزيدەنت جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا كوروناۆيرۋس ينفەكتسياسىنىڭ تارالۋىن شەكتەۋ ماقساتىندا تىرشىلىك ارەكەتىن قامتاماسىز ەتۋمەن جانە تۇرعىنداردىڭ دەنساۋلىعىمەن بايلانىستى ۇيىمداردى قوسپاعاندا, بارلىق كاسىپورىندار مەن ۇيىمدار ءۇشىن نۇر-سۇلتان جانە الماتى قالالارىندا كۇشىنە ەنگەن جۇمىسسىز رەجيمدى وسى جىلدىڭ 13 ساۋىرىنە دەيىن ۇزارتۋ تۋرالى شەشىم قابىلدادى.
وسىعان بايلانىستى 13 ساۋىرگە دەيىن ەلوردانىڭ قوعامدىق كولىگى جۇرمەيدى. قازىرگى جاعدايدا نۇر-سۇلتان قالاسىندا قوعامدىق كولىك ءبىرىنشى كەزەكتە تىنىس-تىرشىلىكتى قامتاماسىز ەتەتىن مامانداردى تاسىمالداۋعا باعىتتالعان.
بۇگىنگى كۇنى ءبىزدىڭ ورتاق مىندەتىمىز - ەكونوميكانىڭ تۇراقتى جۇمىسىن قامتاماسىز ەتۋ, ازاماتتاردى الەۋمەتتىك قورعاۋ ءۇشىن سىني سالالاردى قولداۋ. «City Transportation Systems» كولىك كومپانياسى 30 ناۋرىزدان باستاپ ارنايى باعدارلاردا ەلوردانىڭ تىنىس-تىرشىلىگىن قامتاماسىز ەتەتىن مەديتسينا, پوليتسيا جانە باسقا سالالاردىڭ قىزمەتكەرلەرىن تەگىن تاسىمالداۋدى ۇيىمداستىردى.
بۇعان قوسا وسى كەزەڭدە كولىك كارتالارىن قاشىقتان جانە لەزدە تولىقتىرۋدىڭ بارلىق تاسىلدەرى قولجەتىمسىز بولادى. سونداي-اق بارلىق مامانداندىرىلعان كاسسالار مەن RTVم-اۆتوماتتار جۇمىس ىستەمەيدى.
