پرەزيدەنت ەلدەگى بۇگىنگى اھۋالعا بايلانىستى قوسىمشا 200 ملرد تەڭگە ءبولىنىپ, زەينەتاقى كوتەرىلەتىنىن, اتاۋلى الەۋمەتتىك كومەككە مۇقتاج ادامدارعا بەرىلەتىن مەملەكەتتىك جاردەماقى مولشەرىنىڭ وسەتىنىن ايتتى. بىلتىرعى قۇرعاقشىلىقتان قىسىلىپ شىققان شاعىن شارۋاشىلىقتاردى قولداۋ ماقساتىنا قىرۋار قارجى ءبولىنىپ جاتىر. بۇل قامقورلىقتىڭ بارلىعى تۇپتەن كەلگەندە قاراپايىم حالىقتىڭ يگىلىگىنە جۇمسالىپ جاتقانىن كورە بىلەتىن كوز, سەزە بىلەتىن جۇرەك كەرەك بىزگە.
وسىنىڭ ءبارىن دۇرىس ءتۇسىنىپ, تالاپقا مويىنسۇنۋىمىز كەرەك. وكىنىشكە قاراي, وسىناۋ جاۋاپتى كەزەڭدە زەرىككەندەر مەن ەرىككەندەر تاس قابىرعانىڭ تاساسىندا وتىرىپ الىپ نەشە ءتۇرلى الىپ قاشپا جەل ءسوز تاراتىپ, كوپكە تاس لاقتىرۋىن تىيماي وتىر. ماسەلەن, بۇگىن ۆاتساپ مەسسەندجەرى ارقىلى «قوستاناي وبلىسىندا اقش-تان كەلگەن ازامات ەسىمدى بالا كوروناۆيرۋسپەن اۋىرىپتى» دەگەن جالعان اقپارات يەسى ىزدەستىرىلىپ جاتقانىن وقىدىم. جاۋ جاعادان العاندا, بورىدەي ەتەكتەن تارتىپ, ەلدى دۇرلىكتىرەتىن مۇنداي قىسىر ءسوزدى قويىپ, كەرتارتپا مىنەزدى تىيۋ كەرەك. بۇل ءبىزدىڭ ەلدىگىمىزگە سىن تۇس. ءوز باسىم ەل جاڭالىعىن تەك رەسمي اقپارات كوزدەرىنەن الىپ وتىرمىن. بارشا وتانداستارىمدى دا جەل سوزگە ەرە بەرمەي, نەگىزى بار اقپاراتقا سەنۋگە شاقىرامىن. باستىسى, ءتيىستى ورگاندار قويعان تالاپتى بۇزباي, ۇيدە وتىرۋ كەرەك. قازىر نەمەرەلەرىمنىڭ ءبارى وقىپ جاتىر. ءبىرى – ۋنيۆەرسيتەتتە, ءبىرى مەكتەپتە. قولدارى تيمەيدى. سوندىقتان ولارعا دا كومەكتەسىپ, مورالدىق تۇرعىدا قولداۋ كورسەتىپ وتىرعان ابزال.
قازىر ءوزىم سانالى تۇردە وقشاۋلانىپ, بولەك وتىرمىن. بالالارمەن, جاقىندارىممەن تەك تەلەفون ارقىلى سويلەسەمىن. ماسكا تاعىپ, قولعاپ كيىپ جاقىن دۇكەنگە بارىپ, الاتىنىمدى الىپ, ۇيگە قايتامىن.
تەگىندە, ۇيدەگى زەينەتكەرلەر قاراپ وتىرمايدى. ۇيدە دە ىستەيتىن شارۋا تابىلادى. ماسەلەن, ءوزىم ۇيدە بىرنەشە الەۋمەتتىك جوبا دايىنداپ جاتىرمىن. قازىر ەلدە تىرشىلىك توقتاپ قالعان جوق. نەشە ءتۇرلى الەۋمەتتىك كونكۋرستار ءجۇرىپ جاتىر. الداعى ۋاقىتتا ايماقتا الەۋمەتتىك جوبالار مەن الەۋمەتتىك يدەيالار تۋرالى جارمەڭكە ۇيىمداستىرىلماق. سوعان قاتىسۋ نيەتىمەن وتباسى جانە وتباسى قۇندىلىقتارى تۋرالى «كەلىنىم ساعان ايتام, قىزىم سەن تىڭدا» دەگەن جاڭا جوبامدى قولعا الدىم. مۇندا قىزدىڭ تاربيەسى, كەلىننىڭ ادەبى, ەنە مەن كەلىن اراسىنداعى قارىم-قاتىناس, وتباسى- وشاق باسىنداعى ىنتىماق پەن بىرلىك ماسەلەلەرى قاراستىرىلادى. قازىر بىزگە ەلدى بىرىكتىرەتىن, وتباسىن ۇيىستىراتىن جاقسى جوبالار كەرەك. بۇل سول ءوزىمىزدىڭ ۇلتتىق تاربيە تامىرلارىنا قان جۇگىرتەتىن جاقسى دۇنيە بولار دەپ ويلايمىن.
اكە-شەشەلەرىمىز بۇدان دا اۋىر قيىن كەزەڭدەردەن وتكەن. ونىڭ شەت جاعاسىن بالا بولساق تا ءبىلىپ وستىك. ال ەندى قازىرگى جاعدايدا بارىمىزگە تاۋداي ءتوزىم مەن سابىر كەرەك. بۇل دا وتەتىن, كەتەتىن ۋاقىتشا قيىندىق. باستىسى, بۇگىنگە بۇگىلمەي, الداعى كۇنگە ۇمىتپەن قاراي بىلگەنىمىز ءجون.
بالبوپە ەرتاەۆا,
زەينەتكەر,
قوستاناي وبلىسى ىسكەر ايەلدەر قاۋىمداستىعىنىڭ مۇشەسى:
