رۋحانيات • 02 ءساۋىر، 2020

تىلەنديەۆ اندەرىن تەبىرەنە شىرقادى

96 رەتكورسەتىلدى

عاسىرعا جۇك بولارلىق عالامات تۋىندىلارىمەن قازاق ونەرىنە قوماقتى ۇلەس قوسقان ءان مەن كۇيدىڭ الىبى نۇرعيسا تىلەنديەۆتىڭ تۋعانىنا 1 ءساۋىر كۇنى 95 جىل تولدى. وسىعان وراي، جامبىل اتىنداعى قازاق مەملەكەتتىك فيلارمونياسىنىڭ باستاماسىمەن ن. تىلەنديەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترى  جانە ب. بايقاداموۆ اتىنداعى  مەملەكەتتىك حور كاپەللاسىنىڭ سوليستەرى ونەردەگى ارىپتەستەرىنە نۇراعانىڭ اندەرىن ورىنداۋدان ەستافەتا جولدادى.

ومىردەن كوشسە دە، كوڭىلدەن وشپەيتىن دارا دارىن يەسىن ونەردەگى جولىن جالعاعان ءىزباسارلارى تەبىرەنە ەسكە الدى. ايرىقشا باستامانى العاشقىلاردىڭ ءبىرى بولىپ باستاعان حالىقارالىق بايقاۋلاردىڭ لاۋرەاتى فارحات كۋبيەۆ باسقا دا قاناتتاستارىن وسى ەستافەتانى جالعاۋعا شاقىردى. تىلەنديەۆ اندەرىن تامىلجىتا ورىنداعان ونەرپازداردىڭ ونەرىن جەلى ارقىلى تاماشالاعان تىڭدارماندار ولارعا العىسىن جاۋدىرىپ جاتىر. نۇرعيسا الەمىن ونەردەگى جولدارىنا باعدارشام دەپ بىلەتىن تالانت يەلەرى كورەرمەن كوڭىلىندە قالىقتاعان اققۋ ءان ولمەسە دەپ تىلەيدى.     

 – تىلەنديەۆ قازاق مادەنيەتىنىڭ قايتالانباس تۇلعاسى. ونىڭ ءانى جۇرەگىمىزدە، كۇمبىرلەگەن كۇيلەرى كوڭىل تورىمىزدە قاتتالىپ تۇر. باستى ماقسات - ەلدىڭ رۋحىن، ونەرگە دەگەن ىقىلاسىن وياتۋ، حالقىمىزعا كوتەرىڭكى كوڭىل-كۇي سىيلاپ، توتەنشە جاعدايدى ەڭسەرۋىنە دەمەۋ بولۋ. ەلىمىزدىڭ بارلىق وڭىرىندەگى ونەرپازدار بۇل شاراعا قولداۋ كورسەتەدى دەپ سەنەمىن، – دەيد جامبىل اتىنداعى قازاق مەملەكەتتىك فيلارمونياسىنىڭ ءباسپاسوز حاتشىسى مانار اليەۆا.

داڭقتى سازگەردىڭ تۋعان كۇنىنە جوسپارلانعان بىرقاتار شارالار توتەنشە جاعدايعا بايلانىستى كەيىنگە شەگەرىلگەن بولاتىن. وسى ورايدا، نۇرعيسا تىلەنديەۆ مۇرالارىن ناسيحاتتاۋدا جامبىل اتىنداعى قازاق مەملەكەتتىك فيلارمونياسى اۋقىمدى باستامالاردى قولعا الىپ وتىرعانىن  ايرىقشا اتاي كەتكەن ءجون. كۇز ايلارىندا ونەر ۇجىمى ۇلى تۇلعانىڭ 95 جىلدىعىنا ارنالعا ۇلكەن كونتسەرت وتكىزەمىز دەپ جوسپارلاپ وتىر.

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار