«ارداگەرلەر تۋرالى» زاڭ جوباسىندا الەۋمەتتىك قولداۋ شارالارىمەن قامتىلاتىن ارداگەرلەر ساناتىنا باسقا مەملەكەتتەردىڭ اۋماقتارىندا بولعان ۇرىس قيمىلدارىنا قاتىسۋشىلاردى قوسۋ كوزدەلگەن. وسىعان وراي پارلامەنت ءماجىلىسىنىڭ دەپۋتاتى كارىباي مۇسىرمان ءبىر توپ دەپۋتاتتىڭ باستاماشىلىعىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ ماسەلەلەرى بويىنشا وزگەرىستەر ەنگىزۋ تۋرالى» قازاقستان رەسپۋبليكاسى زاڭىنىڭ جوباسى ازىرلەنىن مالىمدەدى.
بۇل زاڭ جوباسى بويىنشا الداعى ۋاقىتتا ۇلى وتان سوعىسىنا قاتىسۋشىلار مەن ولارعا تەڭەستىرىلگەن ادامدارمەن قاتار, باسقا مەملەكەتتەردىڭ اۋماقتارىنداعى ۇرىس قيمىلدارىنىڭ ارداگەرلەرىن دە سالىقتار مەن مەملەكەتتىك باجدان بوساتۋ ۇسىنىلىپ وتىر. اتاپ ايتقاندا, كولىك سالىعىنان, م ۇلىك سالىعىنان, سوتتاردا مەملەكەتتىك باج تولەۋدەن, ازاماتتىق حال اكتىلەرىن تىركەۋ كەزىندە تولەۋدەن, نوتارياتتىق ءىس-ارەكەتتەر جاساۋ كەزىندە باجدان, وزگە دە ارەكەتتەر جاساعان كەزدە مەملەكەتتىك باج تولەۋدەن بوساتۋ, سونداي-اق كۇنتىزبەلىك جىل ءۇشىن 882 ايلىق ەسەپتىك كورسەتكىش مولشەرىندەگى ستاندارتتى شەگەرىمدى قولدانۋ قاراستىرىلادى.
ۇسىنىلىپ وتىرعان نورمالار تاجىك-اۋعان ۋچاسكەسىندە جاۋىنگەرلىك مىندەت اتقارعان قازاقستان رەسپۋبليكاسىنىڭ اسكەري قىزمەتشىلەرىن; 1968 جىلى چەحوسلوۆاكياداعى جانجالدى رەتتەۋگە قاتىسقان اسكەري قىزمەتشىلەردى, سونداي-اق ىشكى ىستەر جانە مەملەكەتتىك قاۋىپسىزدىك ورگاندارىنىڭ باسشى جانە قاتارداعى قۇرامىنىڭ ادامدارىن; يراكتاعى حالىقارالىق بىتىمگەرشىلىك وپەراتسيالارىنا بىتىمگەرشى رەتىندە قاتىسقان قازاقستان رەسپۋبليكاسىنىڭ اسكەري قىزمەتشىلەرىن; تاۋلى قاراباقتاعى ەتنوسارالىق جانجالدى رەتتەۋگە قاتىسقان اسكەري قىزمەتشىلەردى, سونداي-اق ىشكى ىستەر جانە مەملەكەتتىك قاۋىپسىزدىك ورگاندارىنىڭ باسشى جانە قاتارداعى قۇرامدارىندا بولعان ادامداردى قوسىمشا الەۋمەتتىك جەڭىلدىكتەرمەن قامتاماسىز ەتۋگە باعىتتالعان.
