بۇل جولى اسكەري قىزمەتشىلەر بۇركۋ ارقىلى زالالسىزداندىرۋ ادىسىنەن بولەك ارس-14 اۆتوقۇيىلمالى ستانسالارى ارقىلى كوبىكپەن زالالسىزداندىرۋ جۇمىستارىن جۇرگىزدى. بۇگىندە قالا كوشەلەرىنىڭ 30% ارنايى جۋ-زالالسىزداندىرۋ ەرىتىندىلەرىمەن جۋىلدى, دەپ حابارلايدى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ ءباسپاسوز قىزمەتى.
«ارنايى زالالسىزداندىرۋ ەرىتىندىلەرى عيماراتتاردى, قوعامدىق ورىندار مەن كوشەلەرگە ارنالعان. حيميالىق بەلسەندىلىگىنە قاراماستان ەرتىندى ادامدار مەن قورشاعان ورتاعا زيانسىز. وسى كۇنگە دەيىن ارنايى بولىمشە 1500 استام نىسانداردى زالالسىزداندىرىپ, بۇل جۇمىسقا 500 ادام تارتىلدى», - دەپ اتاپ ءوتتى راديوەلەكترونيكا جانە بايلانىس اسكەري-ينجەنەرلىك ينستيتۋتى باستىعىنىڭ ورىنباسارسى پودپولكوۆنيك دارحان ۇمبەتوۆ.
قالاداعى زارارسىزداندىرۋ جۇمىستارىنا الماتى گارنيزونى بويىنشا بارلىعى 2000-عا جۋىق اسكەري قىزمەتشىلەر تارتىلعان. بۇگىنگى كۇنگە دەيىن ارنايى بولىمشەلەر قالا بويىنشا مەكتەپتەر, بالاباقشالار, بالالار الاڭقايلارى, ايالدامالار, ەمحانالار جانە تەرمينالدار سىندى كولەمى 5 ملن 138 002 م2 قۇرايتىن 465 نىسانىندا زالالسىزداندىرۋ جۇمىستارىن جۇرگىزدى.
ءىس-شارالاردى جۇرگىزۋ ءۇشىن جەكە قۇرام ارنايى تەحنيكامەن, گازسىزداندىرۋ قورعانىس جيىنتىعىمەن جانە زالالسىزداندىرۋشى ەرىتىندىلەرمەن قامتاماسىز ەتىلگەن.
كارانتين رەجيمىن قامتاماسىز ەتۋ شارالارى اياسىندا قارۋلى كۇشتەردىڭ اسكەري قىزمەتشىلەرى كوشەلەردە جاياۋ پاترۋلدەۋگە جانە قالانى اينالا قورشاي قويىلعان بلوكبەكەتتەردە قىزمەت اتقارىپ جۇرگەندەرىن اتاپ وتكەن ءجون.
الماتى
