ايماقتار • 01 ءساۋىر، 2020

قوستانايدا ايالدامالاردى زالالسىزداندىرۋ باستالدى

5 رەتكورسەتىلدى

قوستانايدا ايالداما تۇراقتارىن زالالسىزداندىرۋ شارالارى ءجۇرىپ جاتىر. بۇل جۇمىستاردى التى مەردىگەر ۇيىم جۇرگىزەدى. وبلىس ورتالىعىندا 430 ايالداما تۇراعى بار. مەردىگەردىڭ مىندەتى - سولاردىڭ ءبىرىن دە قالدىرماي كۇندەلىكتى زالالسىزداندىرىپ وتىرۋ. بۇل ماقساتقا ارنايى قارجى ءبولىنىپ، قالا اكىمدىگى مەردىگەر ۇيىمدارمەن كەلىسىمشارتقا وتىرعان. - ولار ءار ايالدامانى كەم دەگەندە كۇنىنە ءبىر رەت دەزينفەكتسيالاپ تۇرادى،  – دەدى قالالىق تۇرعىن ءۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمىنىڭ باستىعى ناۋرىزباي مۋسين.

ايالداماعا ءدارى شاشۋشىلارعا ارنايى قورعانىش كيىمى، قولعاپ، كوزىلدىرىك، بەتپەردە، اياق كيىم بەرىلگەن. ءبولىم باستىعىنىڭ ايتۋىنشا، اۆتوبۋس كۇتۋگە ارنالعان تۇراقتى تازالاۋ ءۇشىن 10 ليتر سۋعا 1 دي حلور تابلەتكاسىن سالىپ ەرىتۋ قاجەت. ءبىر ايالدامانى زالالسىزداندىرۋ ءۇشىن وسى مولشەردەگى قوسپا جەتكىلىكتى.

التى مەردىگەردىڭ ارقايسى وزدەرىنە جۇكتەلگەن شاعىن اۋداندا جۇمىس ىستەيدى. بۇگىن «ابز+» سەرىكتەستىگى ءوز جۇمىسىن «اۋەجاي» شاعىن اۋدانىنان باستادى. سەرىكتەستىك كۇن سايىن 105 ايالدامانى زالالسىزداندىرىپ وتىرۋى كەرەك.

- وڭدەۋدى باستاماس بۇرىن قىزمەتكەرلەرگە نۇسقاۋلىق بەرىلىپ، بارلىق قاۋىپسىزدىك تالاپتارى تۇسىندىرىلەدى. ايالدامالارعا حيميالىق قوسپانى تاڭەرتەڭگىلىك شاشامىز. ازىرگە 4 ادام جۇمىس ىستەپ جاتىر. ەگەر قاجەت بولسا، جۇمىسشى سانىن كوبەيتەمىز. تۇرعىندار ءۇشىن ەشقانداي قولايسىزدىق تۋمايدى دەپ ويلايمىن. ولار ويانىپ، كوشەگە شىققانشا ءبىز دە جۇمىسىمىزدى اياقتايمىز، – دەدى سەرىكتەستىك ديرەكتورى نيكولاي لوبانوۆ.

 

قوستاناي وبلىسى

سوڭعى جاڭالىقتار

ۇقساس جاڭالىقتار