قازاقستان • 01 ءساۋىر، 2020

قازاقستاندا ءمامس جۇيەسى شىلدەدەن باستاپ تولىق جۇمىس ىستەيدى

58 رەتكورسەتىلدى

«الەۋمەتتىك مەديتسينالىق ساقتاندىرۋ قورى قازاقستانداعى مەديتسينالىق كومەك جۇيەسىنە ء(مامس) قاتىسپايتىن ازاماتتارعا قىزمەت كورسەتۋ ءۇشىن ىشكى رەزەرۆتەردەن 20 ملرد  تەڭگە بولەدى»، دەپ حابارلادى وسى قوردىڭ باسقارما توراعاسى ايباتىر جۇماعۇلوۆ.

ونىڭ ايتۋىنشا، ءاربىر ازامات مەديتسينالىق قىزمەت الۋعا قۇقىلى. ول اعىمداعى جىلدىڭ 1 ساۋىرىنەن باستاپ قازاقستاندا مىندەتتى الەۋمەتتىك مەديتسينالىق ساقتاندىرۋ جۇيەسى تولىعىمەن جۇمىس ىستەۋى كەرەك ەكەنىن ەسكە سالدى. بىراق، كوروناۆيرۋستىڭ تارالۋىنا بايلانىستى توتەنشە جاعدايدىڭ ەنگىزىلۋىن ەسكەرە وتىرىپ، ەل پرەزيدەنتىنىڭ تاپسىرماسى بويىنشا تۇپكىلىكتى كوشۋ 1 ساۋىردەن 1 شىلدەگە اۋىستىرىلدى.

الەۋمەتتىك مارتەبەگە جانە ساقتاندىرۋ مارتەبەسىنە قاراماستان، ءاربىر ازامات ساقتاندىرىلعان بولىپ سانالادى. بۇل وعان مەديتسينالىق كومەك پەن الەۋمەتتىك ساقتاندىرۋدىڭ كەپىلدەندىرىلگەن كولەمى اياسىندا مەديتسينالىق قىزمەت الۋعا مۇمكىندىك بەرەدى.

قور باسشىسىنىڭ ايتۋىنشا، بولىنگەن قارجى قوسىمشا 2،5 ميلليون قازاقستاندىققا ساقتاندىرۋ كومپانيالارىنىڭ كومەگىمەن تەگىن ەمدەلۋگە مۇمكىندىك بەرەدى.

«كەلەسى توقساندا بۇل سان ۇلعايۋى مۇمكىن»،  دەدى جۇماعۇلوۆ.

بۇگىن وسى جاڭالىققا قاتىستى شۇعىل ونلاين جيىن وتكىزگەن ساقتاندىرۋ كومپانيالارىنىڭ مۇشەلەرى سالانىڭ العا جىلجۋىنا مۇمكىندىك بەرەتىن باسىم باعىتتاردى بەلگىلەپ الۋ قاجەتتىگىن، باسىمدىق دەنساۋلىقتى ساقتاندىرۋ سالاسىنا ءبولىنۋ قاجەتتىگىن ايتتى. سەبەبى بۇل ماسەلە تالاي جىلدان بەرى ايتىلىپ كەلە جاتقانىمەن، ونىڭ مۇمكىندىگىن قولدانعاندار از بولاتىن.

ساقتاندىرۋ سالاسىنىڭ وكىلى گ. ىسقاقوۆانىڭ تۇسىندىرۋىنشە، دەنساۋلىقتى ساقتاندىرۋ الداعى ۋاقىتتا سالانىڭ لوكوموتيۆىنە اينالۋى ابدەن مۇمكىن ەكەن. «وسى كۇنگە دەيىن دەنساۋلىعىن ساقتاندىرعىسى كەلەتىندەردىڭ ۇلەس سالماعى 2 پايىزعا دەيىن جەتپەيتىن» دەپ ايتىپ ءوتتى ول.

سونداي-اق گ. ىسقاقوۆانىڭ تۇسىندىرۋىنشە،  ء مامس-كە قاتىسپايتىن ازاماتتارعا قىزمەت كورسەتۋ ءۇشىن ىشكى رەزەرۆتەردەن 20 ملرد بولگەنى دۇرىس شەشىم. سەبەبى دەنساۋلىق سالاسىن ساقتاندىرۋ ماسەلەسى ءسوز بولعاندا، باسىن اشىپ الۋى ءتيىس ماسەلەلەر قوردالانىپ قالعان بولاتىن. مۇنىڭ ەڭ وزەكتىسى كليەنتتىڭ ساقتاندىرۋ سالاسى بويىنشا ەمحانالاردى تاڭداۋ مۇمكىندىگى. كۇنى كەشەگە دەيىن ساقتاندىرۋ سالاسى بويىنشا تەگىن قىزمەت مەملەكەتتىك بيۋدجەتكە قارايتىن مەكەمەلەردە عانا كورسەتىلەدى دەگەن تۇسىنىك قالىپتاستى. ال ونداعى جالاقىنىڭ ازدىعىنان، بىلىكتى مامانداردىڭ اقىلى ەمحانالارعا اۋىسىپ كەتكەنى جاسىرىن ەمەس. ال اقىلى ەمحانالار كۇنى كەشەگە دەيىن دەنساۋلىقتى ساقتاندىرۋ سالاسى بويىنشا ۇستانىمدارىن اشىق ايتپاي كەلگەن. ولار بۇل ۇستانىمدارىن «ساقتاندىرىلۋشىنىڭ جەكە ەسەبىندە جينالاتىن قارجى كولەمى تىم از،  ءبىز مۇنداي قارجىمەن جۇمىس ىستەسەك، شىعىنعا باتامىز» دەپ ءتۇسىندىرىپ كەلگەن.

«ەندىگى ماسەلە مەملەكەتتەن بولىنگەن قارجىنىڭ قانداي جولدارمەن بولىنەتىندىگىنە بايلانىستى. مەملەكەتتىڭ قارجىسىنا يەك ارتپاي، بۇل سالاعا ينۆەستورلار تارتىپ، سولاردىڭ بولگەن قارجىسىمەن ەمدەۋ قىزمەتىن حالىققا بىردەي قول جەتىمدى ەتۋدىڭ مۇمكىندىكتەرىن قاراستىرۋ كەرەك. مەملەكەت مۇنى ەكى-ءۇش جىل باقىلاۋعا السا، كەلەسى بەس-جىلدىقتاردا كومپانيالار قور جيناپ، حالىق جەكە شوتىنداعى قارجىسىن كوبەيتىپ الادى. ءبىز وسى ارقىلى عانا ءمامس ارقىلى كورسەتىلەتىن مەديتسينالىق قىزمەت تۇرلەرىنىڭ سانىن كوبەيتە الامىز» دەيدى  گ. ىسقاقوۆا.  

گ. ىسقاقوۆانىڭ تۇسىندىرۋىنشە، ەلدەگى كەيبىر قالتالى ازاماتتار ءوزىنىڭ دەنساۋلىعىن شەتەلدىك ساقتاندىرۋ كومپانيالىنا ساقتاندىرۋعا باسىمدىق بەرەتىنىن دە ايتىپ ءوتتى. قازىر، قازاقستاندا، ورتا ەسەپپپەن 5-6 ەلدىڭ ساقتاندىرۋ كومپانيادلارى وزدەرىنىڭ قىزمەتىن ونلاين تۇرىندە ۇسىنا باستادى. ولاردىڭ كوبەيىپ كەتكەنى سونشالىقتى، كەي كەزدە ونىڭ قىزمەتىنە كۇمان  تۋدىرا باستاعان.

«1 شىلدەگى دەيىن ساقتاندىرۋ سەگمەنتىن قايدا تىركەلگەنى بەلگىسىز شەتەلدىك كومپانيالاردان تازارتۋ كەرەك. جالپى، حالىقتىڭ دەنساۋلىعىن ساقتاندىرۋ سالاسى مەملەكەتتىڭ باقىلاۋىندا بولۋى ءتيىس دەپ ويلايمىن. مەملەكەت بۇل سالانى باقىلاۋدا ۇستاۋ ارقىلى كومپانيالاردىڭ جۇمىسىن باقىلاي الادى. بۇل رەتتە وزدەرىن ساقتاندىرۋ كومپانيالارىمىز دەپ تانىستىراتىن الاياق كومپانيالاردىڭ حالىقتىڭ سەنىمىنە كىرىپ، جەر سوقتىرىپ كەتۋىنە بولمايدى. حالىقتىڭ دەنساۋلىعىن ساقتاندىرۋعا بولگەن قارجىسى ءبىر ورتالىققا ءتۇسىپ، سودان كەيىن كەلىسىم شارتقا وتىرعان ەمحاناسىنا ءبولىنۋ كەرەك. سول كەزدە عانا قازاقستاندىقتاردىڭ ءبارى وتاندىق كومپانيالارعا باسىمدىق بەرەدى» دەپ ءسوزىن تۇيىندەدى گ. ىسقاقوۆا.      

ەسكە سالا كەتەيىك، كوروناۆيرۋس قازاقستاندا 13 ناۋرىزدا انىقتالعان بولاتىن.

16 ناۋرىز كۇنى ساعات 8:00-دەن باستاپ پرەزيدەنت قاسىم-جومارت توقاەۆتىڭ جارلىعىمەن قازاقستاندا توتەنشە جاعداي جاريالاندى.

19 ناۋرىزدان باستاپ نۇر-سۇلتان مەن الماتىدا كارانتين ەنگىزىلدى.

1 ساۋىردە قازاقستاندا 369 ادام كوروناۆيرۋس جۇقتىرعان، 25-ءى ساۋىعىپ، ۇشەۋى قايتىس بولعان.  

سوڭعى جاڭالىقتار

ۇقساس جاڭالىقتار