قازاقستان • 01 ءساۋىر، 2020

ءمامس جۇيەسىن كەيىنگە شەگەرۋ – قۇپتارلىق قادام

21 رەتكورسەتىلدى

پارلامەنت ءماجىلىسىنىڭ دەپۋتاتى زاۋرەش امانجولوۆا قازىرگى قىسىلتاياڭ كەزەڭدە مىندەتتى الەۋمەتتىك مەديتسينالىق ساقتاندىرۋ جۇيەسىنىڭ كەيىنگە شەگەرىلۋى وڭ قادام ەكەنىن، مۇنىڭ ءبىراز ازاماتقا ۇلكەن كومەگى تيەتىنىن اتاپ ءوتتى.

مەملەكەت باسشىسى قاسىم-جومارت توقاەۆتىڭ رەسپۋليكالىق تەلەارنالار ارقىلى تىكەلەي ەفيردە جاساعان مالىمدەمەسىنەن ەلىمىزدەگى توتەنشە جاعداي جانە ەكونوميكالىق-الەۋمەتتىك سالاداعى داعدارىس قارساڭىندا قابىلدانعان ءىس-شارالار جوسپارىنا قانىقتىق.

– حالقىمىزدا «اۋىرىپ ەم ىزدەگەنشە، اۋىرمايتىن جول ىزدە» دەگەن ءسوز بار. ەڭ الدىمەن، پرەزيدەنتتىڭ قاداعالاۋىمەن كوروناۆيرۋس ىندەتىنىڭ الدىن الۋ ءىس-شارالارىنىڭ ۋاقىتىلى قولعا الىنعانىن اتاپ وتكىم كەلەدى. ەلىمىزگە جامانات حاباردىڭ العاش جەتكەن ساتىنەن باستاپ شۇعىل تۇردە شەكاراداعى باقىلاۋدى كۇشەيتۋ، قالالاردى كارانتينگە جابۋ، قوعامدىق ورىندارداعى قوزعالىستى شەكتەۋ سياقتى قادامدار دەر كەزىندە جاسالدى. ويتكەنى ءبىزدىڭ ەلدى بۇكىل ەل بولىپ تويلايتىن ۇلكەن مەرەكەمىز ناۋرىز كۇتىپ تۇرعان ەدى. بۇل كۇندەرى ەجەلدەن كەلە جاتقان سالتىمىز بويىنشا القالاعان اعايىن ءبىر-بىرىمەن كورىسىپ، ءتوس قاعىستىرىپ، ۇلتتىق مەرەكەمىز ۇلان-اسىر تويعا ۇلاسىپ جاتاتىن ەدى. وسى مەيرامىمىزدى جىلداعى داستۇرىمەن، ءسان-سالتاناتىمەن اتاپ وتەتىن بولساق، اتى جامان ىندەتتىڭ كەڭ تارالۋىنا مۇمكىندىك بەرىپ قويار ەدىك، – دەيدى دەپۋتات.

زاۋرەش امانجولوۆا ءوزى دارىگەر بولعاندىقتان، مەملەكەت باسشىسىنىڭ مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا ساقتاندىرىلماعان ازاماتتاردىڭ مەديتسينالىق كومەك الۋ قۇقىعىن 1 ساۋىردەن 1 شىلدەگە دەيىن ۇزارتۋدى تاپسىرعانىن وتە قۇپتارلىق ءىس دەپ باعالادى.

ونىڭ ايتۋىنشا، ءمامس جۇيەسىن 2020 جىلدىڭ 1 قاڭتارىنان باستاپ ەنگىزۋ كەرەك بولعان. بىراق بۇل ۇدەرىستى بىردەن ەنگىزۋ وڭاي بولمايتىنىن ەسكەرىپ، ءۇش ايعا كەيىن شەگەرگەن ەدى. ەندى ءىس-شارا قازىرگى احۋالعا بايلانىستى تاعى ءۇش اي توقتاتىلادى. ياعني، مەديتسينالىق كومەك ازاماتتارعا بۇرىنعىداي قولجەتىمدى بولىپ قالا بەرەدى. سەبەبى اتالعان جۇيە قىسىلتاياڭ كەزەڭدە قاراپايىم جۇرتتىڭ قالتاسىنا سالماق تۇسىرەدى. بۇگىندە مەملەكەت 15 ساناتتاعى ازاماتتارعا الەۋمەتتىك ساقتاندىرۋ پاكەتىن تولەپ بەرىپ وتىر. بۇلاردىڭ جالپى ۇلەسى – 10،5 ملن ادام.

– سونىمەن قاتار كوروناۆيرۋستىڭ جەر جاھاندى جاۋلاپ، ءورشىپ تۇرعان شاعىندا كۇن-ءتۇن دەمەي، اياعىنان تىك تۇرىپ قىزمەت ەتىپ جۇرگەن دارىگەرلەرگە پرەزيدەنتتىڭ ءوزى باس بولىپ جاسالىپ جاتقان ەرەكشە قامقورلىق پەن حالىقتىڭ قولداۋى وتە ماڭىزدى. مەديتسينا قىزمەتكەرلەرىنىڭ ايلىعىنا ءۇش اي بويى ۇستەماقى قوسۋ تۋرالى شەشىمنىڭ ورىندى بولعانى انىق. باستىسى، ءبىرلىمىز بەكەم بولىپ، قابىلدانعان قاۋىپسىزدىك شارالارىن قاتاڭ ساقتايتىن بولساق، ادامزاتتىڭ باسىنا تونگەن بۇل ىندەتتىڭ دە بەتىپ قايتارىپ، ەڭسەرەمىز دەپ سەنەمىن، – دەيدى زاۋرەش امانجولوۆا.

سوڭعى جاڭالىقتار

ۇقساس جاڭالىقتار