ءوز سوزىندە مارات جۇمانقۇلوۆ قۇقىق قورعاۋ ورگاندارىنان ازاماتتاردىڭ دارىگەرلەردىڭ زاڭدى تالاپتارىنا باعىنباۋىنا قاتىستى ماسەلەلەردى شەشۋگە اتسالىسۋىن سۇرادى. مۇنداي وقيعا قورداي اۋدانىندا ورىن العان. ونداعى تۇرعىن تەك ۇزاق اڭگىمەلەسۋدەن كەيىن عانا اۋرۋحاناعا بارۋعا كونىپ, قاجەتتى تالداۋلاردى تاپسىرعان. ابىروي بولعاندا تالداۋ ناتيجەسى تەرىس بولىپ شىققان. ال ەگەر جاعداي باسقاشا بولعاندا, وندا ماسەلە ءتىپتى كۇردەلەنە ءتۇسۋى مۇمكىن ەكەن.
شتاب باسشىسى بەردىبەك ساپارباەۆ وبلىستىق پوليتسيا دەپارتامەنتى باستىعىنىڭ ورىنباسارى تەمىربەك ورازىمبەتوۆكە ناقتى تاپسىرمالار جۇكتەدى. وزىنە دە, اينالاسىنداعىلارعا دا قاۋىپ توندىرگەن, توتەنشە جاعداي رەجىمىن بۇزعان ادامدارعا قاتىستى زاڭدى جازالاۋ شارالارىن قولدانۋدىڭ ماڭىزدىلىعىن باسا ايتتى. بۇل تاپسىرما جۋالى اۋدانىنىڭ اكىمى نارباي ەرگەبەكوۆكە دە قاتىستى ەدى. اتالعان اۋدانعا قاراستى اۋىل تۇرعىنىنىڭ كوكپاردان جارىس وتكىزبەك بولعاندىعى انىقتالىپ, ول ۋاقىتشا ۇستاۋ يزولياتورىنا 7 كۇنگە قاماققا الىنعان. سونداي-اق, جيىندا كاسىپكەرلىك جانە يندۋستريالدى-يننوۆاتسيالىق دامىتۋ باسقارماسى باسشىسىنىڭ مىندەتىن اتقارۋشى جانداۋلەت كەنجەبەكوۆتىڭ ازىق-ت ۇلىك تاۋارلارىنىڭ باعاسىن ۇستاپ تۇرۋ جونىندەگى جۇمىستارىنىڭ ناتيجەسىزدىگىن بەردىبەك ساپارباەۆ سىنعا الدى. «بۇگىنگى تاڭدا حالىقتى الاڭداتىپ وتىرعان باستى ماسەلەلەردىڭ ءبىرى – باعا تۇراقسىزدىعى. ءسىز ءوزىڭىز ەكى اپتا ىشىندە نەگىزگى ازىق-ت ۇلىك تاۋارلارىنىڭ قۇنىنىڭ نە سەبەپتى ءوسىپ وتىرعانىنا تالداۋ جۇرگىزىپ كوردىڭىز بە؟ باعانىڭ ءوسۋى كوپتەگەن ساۋدا جەلىلەرىندە بايقالۋدا. باسقا ونىمدەر تۋرالى ايتپاعاننىن وزىندە, ەڭ بولماعاندا تۇز باعاسىن ۇستاپ تۇرا المايمىز. قۇرىلعان موبيلدىك توپتاردىڭ جۇمىسى ءساتسىز جۇرگىزىلدى», دەدى اكىم.
جامبىل وبلىسى
