«باتىس قازاقستان وبلىسىنىڭ اۋماعىندا ەپيدەميولوگيالىق جاعداي سالىستىرمالى تۇردە تۇراقتى» دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.
ايتا كەتەيىك, 2020 جىلعى 29 ناۋرىزدا باتىس قازاقستان وبلىسىندا كوروناۆيرۋستىق ينفەكتسياسىنىڭ ەكى جاعدايى تىركەلگەن بولاتىن. ەكى پاتسيەنت تە وبلىستىق جۇقپالى اۋرۋلار اۋرۋحاناسىنا جاتقىزىلدى. قازىر ولاردىڭ جاعدايى قاناعاتتانارلىق, قاجەتتى ەم-دوم الۋدا. كوروناۆيرۋس جۇقپاسى تابىلعان ۇيلەرگە ديزەنفەكتسيالىق جۇمىستار جۇرگىزىلدى.
- ەپيدەميالىق تەكسەرىس بارىسىندا ناۋقاستارمەن قارىم-قاتىناستا بولعان ادامدار انىقتالدى. بۇل تۇلعالارعا لابوراتوريالىق زەرتتەۋ جۇرگىزىلدى, ساراپتاما ناتيجەسى ولارعا ۆيرۋس جۇقپاعانىن كورسەتتى, - دەدى نۇرلىبەك ەرمەك ۇلى.
بۇگىندە وبلىستىق جۇقپالى اۋرۋلار اۋرۋحاناسىندا 2 ادام, 92 ادام ستاتسيونارلىق كارانتيندە جاتىر. پروۆيزورلىق گوسپيتالدە جرۆي بەلگىلەرى بار 62 ادام, وبلىستىڭ كارانتيندىك گوسپيتالىندە اۋرۋمەن قارىم-قاتىناستا بولعان 28 ادام جاتقىزىلدى.
31 ناۋرىز كۇنى باتىس قازاقستان وبلىسىنىڭ باس مەملەكەتتىك سانيتاريالىق دارىگەرىنىڭ «باتىس قازاقستان وبلىسىنىڭ اۋماعىندا كوروناۆيرۋستىق ينفەكتسيانىڭ (COVID-2019) تارالۋىنا جول بەرمەۋ جونىندەگى شارالاردى كۇشەيتۋ تۋرالى» قاۋلىسى شىعىپ, اۋداندار مەن قالا اراسىنداعى بايلانىسقا كوپتەگەن شەكتەۋ قويىلدى. «وبلىس تۇرعىندارىن قابىلدانعان شەكتەۋ شارالارىنا تۇسىنىستىكپەن قاراپ, بارلىق ساقتىق شارالارىن ساقتاۋلارىن سۇرايمىز» دەيدى باتىس قازاقستان وبلىسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى.
باتىس قازاقستان
