ايماقتار • 31 ناۋرىز، 2020

مەكەمە باسشىلارىنىڭ ماسەلەسىن قاشىقتان قارادى

46 رەتكورسەتىلدى

باتىس قازاقستان وبلىستىق سىبايلاس جەمقورلىققا قارسى قىزمەتى قازتالوۆ اۋدانى كاسىپكەرلىك جانە اۋىل شارۋاشىلىعى ءبولىمىنىڭ باس مامانى ا.عيزاتۋللينگە قاتىستى قىلمىستىق ءىس بويىنشا ماسەلەنى قاشىقتان قاراپ، ءتيىستى باقىلاۋ جۇرگىزبەگەن مەكەمە باسشىلىعىن تارتىپتىك جاۋاپكەرشىلىككە تارتۋدى ۇسىندى.

قازتالوۆ اۋدانىنداعى شارۋا قوجالىقتارىنا كەدەرگىسىز سۋبسيديا الۋىنا كومەكتەسىپ، شارۋا قوجالىقتارى باسشىلارىنان جالپى سوماسى 390 مىڭ تەڭگە پارا الدى دەپ ايىپتالعان اسلان عيزاتۋللين 30 ناۋرىز كۇنى كازتالوۆ اۋداندىق سوتىنىڭ ۇكىمىمەن ءومىر بويى مەملەكەتتىك قىزمەتپەن اينالىسۋ قۇقىعىنان ايىرىلا وتىرىپ، 7 جىل 6 اي مەرزىمىنە باس بوستاندىعىنان ايىرىلدى.

ۇكىم ازىرگە زاڭدى كۇشىنە ەنگەن جوق.

اسلان عيزاتۋللين 2018-2019 جىلدارى مەكەمە باسشىسىنىڭ بۇيرىعىمەن قازتالوۆ اۋدانى بويىنشا ينۆەستيتسيالىق سالىم نىساندارىن تەكسەرەتىن ماماندار توبىنىڭ مۇشەسى بولعان. ول «2017-2021 جىلدارعا ارنالعان قازاقستان رەسپۋبليكاسىندا اگروونەركاسىپتىك كەشەنىن دامىتۋ» مەملەكەتتىك باعدارلاماسى شەڭبەرىندە كەيبىر شارۋا قوجالىقتارىنىڭ قۇدىق تەرەڭدىگىن ولشەپ، سايكەسسىزدىگىن انىقتاعان. بىراق شارۋا قوجالىقتارىنان پارا الىپ، اكتىگە «قۇدىقتار سۋبسيديا الۋعا سايكەس» دەپ كورسەتكەن. ال كەيبىر شارۋا قوجالىق قۇدىقتارىنىڭ تەرەڭدىگىن عيزاتۋللين ولشەمەگەن، تەك سىرتتاي قاراپ، سۋ بار-جوعىن تەكسەرۋمەن شەكتەلگەن.

- مەملەكەتتىك قىزمەتشىلەردىڭ سىبايلاس جەمقورلىق قىلمىس جاساۋى ازاماتتاردىڭ مەملەكەتتىك بيلىككە دەگەن سەنىمىن تومەندەتەدى جانە تەرىس ءيميدجدى قالىپتاستىرادى. سوندىقتان جوعارىداعى قىلمىستى جاساۋعا ىقپال ەتكەن جاعدايلاردى جويۋ جونىندە شارالار قابىلداۋ ءۇشىن باتىس قازاقستان وبلىس اكىمىنىڭ اپپاراتىنا ءتيىستى ۇسىنىم جىبەرىلدى. سونىمەن قاتار، ءتيىستى باقىلاۋدىڭ جوقتىعى جانە باعىنىشتىلارمەن پروفيلاكتيكالىق جۇمىستاردىڭ السىزدىگى ءۇشىن قازتالوۆ اۋدانىنىڭ كاسىپكەرلىك جانە اۋىل شارۋاشىلىعى ءبولىمى باسشىلىعىن تارتىپتىك جاۋاپكەرشىلىككە تارتۋ تۋرالى ماسەلەنى قاراۋ ۇسىنىلدى، - دەيدى باتىس قازاقستان وبلىستىق سىبايلاس جەمقورلىققا قارسى قىزمەتى پرەۆەنتسيا جəنە پاراساتتىلىق باسقارماسىنىڭ باسشىسى ءبىرجان حايرۋللين.

 

باتىس قازاقستان

سوڭعى جاڭالىقتار

ۇقساس جاڭالىقتار