قازاقستان • 31 ناۋرىز، 2020

قازاقستان Alibaba جانە Wildberries-دان 50 اككاۋنت ساتىپ الدى

28 رەتكورسەتىلدى

«قازاقستاندىق تاۋار وتپەي مە، الدە تۇتىنۋشىسىنا جەتپەي مە؟» دەگەن كۇمان بار ەدى كوپ كوڭىلىندە. ەندى بۇل قاۋىپ سەيىلدى. وتكەن  جىلدىڭ سوڭىندا ساۋدا جانە ينتەگراتسيا مينيسترلىگى Alibaba جانە Wildberries  سياقتى ينتەرنەت سايتتاردان 50 اككاۋنت ساتىپ العانىن ايتقان بولاتىن.

كەشە ونلاين جۇيەسى بويىنشا باس قوسقان قازاقستانداعى ەلەكتروندى ساۋدا سەگمەنتى وكىلدەرى بۇل جاڭالىق الەمدىك ەلەكتروندى ساۋدا جەلىسىمەن ينتەگراتسيالانۋعا مۇمكىندىك بەرەتىنىن ايتتى. سەبەبى ميللياردتاعان تۇتىنۋشىسى جانە الەمنىڭ كەز-كەلگەن ەلىندە اككاۋنت–تەرەزەسى بار Alibaba مەن  Wildberrie قازاقستاندىق تاۋارلار ءۇشىن كوپىر مىندەتىن اتقارماق. 

قازاقستاندىق تاۋار وندىرۋشىلەر ەندى وسى مۇمكىندىكتىڭ جالىنا جارماسىپ، الەمدىك نارىققا شىعۋعا ارەكەت ەتىپ جاتىر. ەپتىلەرى ەلەكتروندى ساۋدا جەلىلەرىن اشىپ، نارىقتان ەرتەرەك ورىن الۋعا جانتالاسىپ جاتىر.  

قازاقستانداعى ەڭ ۇلكەن توقىما ءوندىرۋشىسى جانە IKEA جەتكىزۋشىسى،    AGG-Group جشس ديرەكتورى گاۋحار ناسىروۆا  بىزبەن اڭگىمەسىندە بۇنىڭ قازاقستاندىق تاۋار وندىرۋشىلەر ءۇشىن ۇلكەن مۇمكىندىك ەكەنىن ايتادى. سەبەبى وسىعان دەيىن جان-جاقتاعى ەلدەر تۇگىلى الماتى مەن نۇر-سۇلتانداعى ساۋدا ۇيىنەن ورىن الۋدىڭ ءوزى مۇڭ بولاتىن.  گ.   ناسىروۆا قازاقستاندىق تاۋارلاردى ەلەكتروندى ساۋدا جەلىلەرى بويىنشا اشىق نارىققا شىعارۋ مەملەكەتتىك دەڭگەيدە قاراستىرىلۋى كەرەكتىگىن تىلگە تيەك ەتىپ ءوتتى. ەگەر، العاشقى جىلدا مەملەكەتتىك دەڭگەيدە قولداۋ بولماسا باعا جاعىنان تۇرىك نەمەسە قىتاي تاۋارلارىمەن باسەكەگە ءتۇسۋ قيىن.

«ينتەرنەتتەگى ساۋدا جەلىلەرى ءسان الەمى يندۋسترياسىنىڭ دامۋى ءۇشىن جاقسى مۇمكىندىك. سەبەبى ولارعا نارىقتان ورىن تابۋ قيىن ەمەس» دەيدى گاۋحار ناسىروۆا.

گ. ناسىروۆانىڭ تۇسىندىرۋىنشە،  قازاقستاندىق ونىمدەردى ساۋدالايتىن اگەنتتەرگە  MEGA، Dostyk نەمەسە  Shymkent Plaza ساۋدا ۇيلەرىندە تۇرۋ ءۇشىن 1 جىلدىق تابىسىنىڭ تەڭ جارتىسىن جۇمساۋعا  تۋرا كەلەدى ەكەن. 

نارىقتا تۇتىنۋشىنىڭ تالعامى عانا سوڭعى نۇكتەنى قويادى. ال ءبىزدىڭ تىگىن تسەحتارىندا دايىندالعان كيىمدەرىمىز تۇتىنۋشىنىڭ تالعامىنا ساي كەلە مە دەگەن سۇراققا «ARCADA» كومپانياسىنىڭ كوممەرتسيالىق ديرەكتورى ەلزا روزەنتال وتاندىق كيىم يندۋسترياسىندا كۇندەلىكتى تۇرمىسقا قاجەتتى اياق كيىمنىڭ، كيىم-كەشەكتىڭ ۇلەسى وتە از ەكەنىن ايتادى. قازاقستاندىق تاۋارلار ساۋدا ۇيلەرىندەگى ۆ، س-ۆ كاتەگوريالارى اۋديتورياسىنىڭ تالابىنا سايكەس كەلمەيدى ەكەن.

ەلزا روزەنتالدىڭ سوزىنەن ۇققانىمىز ءبىزدىڭ تاۋار وندىرۋشىلەردەگى ورتاق كەمشىلىك مەنەدجمەنتتىك بىلىكتىلىك جەتىسپەيدى. قازاق نارىعىنداعى سۇرانىسى جوعارى كيىمدەردى ۇسىناتىن تۇرىك كومپانيالارداعى ديزاينەرلەر اۋديتوريانىڭ جاس ەرەكشەلەگىنە قاراي سۇرىپتالىپ وتىرادى. ءار توقسان سايىن مونيتورينگ جۇرگىزىلىپ، سوعان سايكەس كيىم ۇلگىلەرى دە وزگەرتىلىپ وتىرادى. «ىشكى نارىق  16 مەن 32، 32-45، 45-58 جانە 58 جاستان جوعارى جاستاعى اۋديتوريانىڭ تالعامىنا ساي بەيىمدەلگەن. نارىقتى العا جىلجىتۋشى جاس 16 مەن 32 جانە 32 مەن 45 جاس پەن 58 جاس ارالىعىنداعى اۋديتوريانىڭ تالعامىن ءدوپ باسۋ وتە قيىن. ىشكى نارىقتا سولاردىڭ ءتىلىن تاپقانداردىڭ جولى بولادى» دەيدى  ەلزا روزەنتال.

ەلزا روزەنتال وسى تۇستا ماماندار، ەلدەگى كيىم-كەشەك يندۋسترياسى كۇندەلىكتى ەمەس، ءسان يندۋسترياسىنا باعىتتالعانىن ايتادى. وسى باعىتتا جۇمىس ىستەپ جۇرگەن كومپانيالار بىزدە جەتەدى. ولاردىڭ الدى شەتەلدە وتەتىن بايقاۋلاردا جۇلدە الىپ تا ۇلگىردى. بىراق ولاردىڭ قولىنان شىققان كيىمدەر ەليتالىق دۇكەندەردە حەند-مەيد رەتىندە ەكسكليۋزيۆ رەتىندە ساتىلادى ەكەن. روزەنتال حانىمنىڭ ايتۋىنشا، ولاردىڭ باعاسى ەۋروپالىق برەندتەردىڭ ليۋكس كلاسىنداعى كيىمدەردىڭ باعاسىمەن بىردەي. سوندىقتان ولار جالپىعا بىردەي قولجەتىمدى ەمەس. «ەلەكتروندى ساۋدا جەلىلەرىنىڭ مۇمكىندىكتەرى كوپ. اركىم قالاعانىنا تاپسىرىس بەرەدى. بىراق ءبىزدىڭ تاۋارلار قىتاي نەمەسە تۇرىك تاۋرالارىمەن اشىق باسەكەگە توتەپ بەرە المايدى. سول سەبەپتى مەملەكەتتىڭ قولداۋ كەرەك » دەپ ءسوزىن تۇيىندەدى ەلزا روزەنتال.

وتاندىق جەڭىل ونەركاسىپ ءۇشىن ەلەكتروندى ساۋدا اگرەگاتورى رولىنە ۇمىتكەرلەردىڭ ءبىرى - BMC Sales فيليالىنىڭ ساتۋ جەلىسى. پلاتفورمانى بىرنەشە جىل بۇرىن Bench Mark Consulting جشس جاساعان. بۇل سەرىكتەستىك ديرەكتورى اسكەر باشەەۆ ەلدىڭ جەڭىل ونەركاسىپتىڭ بارلىق وكىلدەرى ءوز سايتتارىندا جۇمىس ىستەي الاتىندىعىن ايتادى.

«ەلەكتروندى  پلاتفورمانى نولدەن دامىتۋ ۇلكەن قارجىلىق سالىمدار مەن ۋاقىتتى قاجەت ەتەدى، بىراق بىزدە دايىن وتاندىق تسيفرلىق پلاتفورما بار. ال قازاقستاننىڭ  Alibaba جانە Wildberries-دان 50 اككاۋنت ەلەكتروندى ساۋدا سەگمەنتى ءۇشىن ۇلكەن مۇمكىندىك»  دەيدى  اسكەر باشەەۆ.

فۋنكتسيونالدىلىعى مەن قولايلىلىعى جاعىنان BMC ساتىلىمدارى Alibaba مەن Wildberries-دەن ءالى دە الىس، بىراق كومپانيا ەلەكتروندىق كوممەرتسيا ارقىلى ساتىلىمداردى كەڭەيتۋدە ناقتى تاجىريبەگە يە.

باشەەۆتىڭ ايتۋىنشا، پلاتفورمانىڭ بەس جىل ىشىندە  BMC جەلىسى شاعىن بۋتيكتەن باستاپ، ەلدەگى بالالار مەن مەكتەپ كيىمدەرىن نەگىزگى جەتكىزۋشىگە دەيىن ءوسىپتى. ءۇش جىل بۇرىن BMC يمپورتتى الماستىرۋ باعدارلاماسى اياسىندا ءوندىرىستى كەڭەيتىپ، بالالار مەن مەكتەپ كيىمدەرىنە ارنالعان تىگىن فابريكاسىن اشىپتى. «تاۋار قۇنىن تومەندەتەتىن فاكتور – ونىڭ سانى.  لينيادان شىعاتىن تاۋار سانى ارتقان سايىن باعا دا تومەندەيدى.  ءبىز وسى كۇنگە دەيىن 1 تاۋار ءتۇرىن 2000 دانادان اسىرمايتىنبىز. سوندىقتان ونىڭ باعاسىن تومەندەتۋگە مۇمكىندىك بولمادى. ەندى الەمدەگى دەڭگەيدەگى پلاتفورمانىڭ ساۋدا اكككاۋنتتارى الەمدىك نارىققا جول اشتى. ەندى سول نارىقتان ءبىز دە ورىن الۋعا تىرىسامىز» دەيدى  اسكەر باشەەۆ.

مارينو مادي برەندىنىڭ نەگىزىن قالاۋشى، ءوزىنىڭ برەند كيىمدەرىن فرانتسيا مەن يتاليا بازارلارىندا ساتاتىن مادينو سىپاتاەۆا  جۋرناليستەرمەنت كەزدەسكەن كەزدە   Alibaba سايتىنا مەملەكەتتىك قولداۋسىز كىرگەنىن ايتىپتى.  قازاقستاندىق ديزاينەردىڭ ءونىمى ەۋروپادا، قىتايدا سۇرانىسقا يە.
«قازىر ءبىز ديماش قۇدايبەرگەنمەن، ايگىلى سپورتشىلارىمىزبەن ىنتىماقتاستىق ورناتۋعا تىرىسىپ جاتىرمىز – بۇل   قازاقستاننىڭ تاۋارلارىنىڭ الەمدىك نارىققا شىعۋىنا، تانىلۋىنا جول اشادى. بۇل ءۇشىن ءسان يندۋسترياسى نە دەيدى دەپ باس قاتىرۋدىڭ قاجەتى جوق. تەك ساپاسى جوعارى ماتالار بولسا بولدى. ودان كەيىنگى شارۋانى  نارىقتىڭ تالعامى رەتتەيدى» دەيدى مادينو سىپاتاەۆا . 

ساراپشىلاردىڭ 2020 جىلعى  ەلەكتروندى  كوممەرتسيا نارىعىنا جاساپ وتىرعان بولجامى جاعىمدى: بولجام 2019 جىلعى ءوسىمنىڭ ساقتالاتىنىن ايتىپ وتىر. قازىرگى ءۇيدىڭ تەرەزەسىنەن دالاعا تەلمىرتكەن توتەنشە جاعدايلار كەزىندە ەلەكتروندى ساۋدانىڭ جۇمىسى جاقسى ءجۇرىپ جاتىر.     

«ەمarketer» ساراپتاما جاسايتىن اگەنتتىك 2019  جىلداعى ىشكى جانە سىرتقى نارىقتىڭ ينتەگراتسياسى ءبىز كۇتكەن بولجامنان اسىپ ءتۇستى دەپ وتىر: 2018  جىلداعى ساۋدا  اينالىمى 2،304 ترلن اقش دوللارىنا جەتكەنىن ايتادى.

بۇل 2017 جىلمەن سالىستىرعاندا 24.8 پايىزعا كوپ ەكەن. ساراپشىلار 2019 جىلى ينتەرنەتتى پايدالانۋ، ءموبيلدى ترافيكتىڭ ۇلەسى، ونلاين ساۋدا 2020 جىلداعى نارىقتىڭ بەتالىسىن انىقتايتىن نەگىزگى ترەندتەرگە اينالاتىنىن ايتىپ ۇلگىردى.

الەمدىك ستاتيستيكاداعى قازاقستاننىڭ ۇلەسى، ساراپشىلاردىڭ پايىمداۋىنشا ءماز ەمەس. IT نارىقتاعى جاعدايدى باقىلاپ وتىراتىن رەسمي ۆەدومستۆا دا، كاسىبي قاۋىمداستىق تا جوق ەكەن.  ۇەم ستاتيستيكا جونىندەگى كوميتەتى 2019 جىلداعى ينتەرنەت ساۋدا مەن ونلاين ساۋدانى 264،52 ملرد تەڭگەگە جەتكەنىن ايتادى.

قازاقستاننىڭ ينتەرنەت-بيزنەس جانە ءموبيلدى كوممەرتسيا قاۋىمداستىعى ءبىزدىڭ ەلدىڭ الەمدىك نارىقتاعى ۇلەسى 1،9 پايىزدىڭ اينالاسىندا دەيدى. بۇل جاقسى كورسەتكىش ەمەس، اقش-تا، قىتاي مەن جاپونيادا بۇل 10-15 پايىزدىڭ اينالاسىندا بولسا، وزبەكستاندا 4.5 پايىزعا جەتىپ قالىپتى. ال رەسەيدىڭ كورسەتكىشى 6،2 پايىز. ال ۇكىمەت بولسا 2021 جىلى قازاقستانداعى ە-كوممەرتسيا نارىعى 9 پايىزعا جەتەدى دەپ ۇمىتتەنىپ وتىر.

ماماندار ەكوممەرتسيا نارىعى قاتال باسەكەلىستىك جاعدايىنا كوشكەنىن ايتادى. ىشكى نارىقتىڭ 70 پايىزى قازىر قىتاي مەن رەسەي ە-كوممەرتسيا نارىعى وكىلدەرىنىڭ قولىندا. ەگەر قىزمەت مازىرىندە كىشكەنتاي عانا كىنارات بولسا، تۇتىنۋشىنىڭ كوزقاراسى وزگەرىپ، باسقاعا اۋىپ كەتۋى ادبەن مۇمكىن.  

وتاندىق ە-كوممەرتسيا  نارىعى ويىنشىلارىنا قازاقستاننىڭ ىشكى نارىعىنىڭ تارلىق ەتەتىنى وسىعان دەيىن دە بايقالعان بولاتىن. ولاردىڭ ورتالىق ازيا نارىعىنا شىعۋى  وتاندىق كومپانيالاردىڭ سانىن كوبەيتىپ، قارجىلىق كاپيتالىن ارتتىرىپ وتىر. ينتەرنەت ساۋدا قاۋىمداستىعىنىڭ وكىلدەرى وزبەكستان حالىقارالىق تولەم جۇيەسىنە قوسىلعان كەزدە وتاندىق كومپانيالاردىڭ ەكىنشى تىنىسى اشىلاتىنىنا سەنىمدى.

«وزبەكستان مەن قازاقستانداعى ە –كوممەرتسيا نارىعىنىڭ 76  پايىزى تاشكەنت پەن الماتىنىڭ ۇلەسىندە. قالعانى 24 پايىزى وزگە ايماقتار. ەگەر، بۇل جالپى حالىقتىق سيپاتقا يە بولسا، ەكى مەملەكەتتىڭ ويىنشىلارى وزگەلەردى نارىقتان ىعىستىرىپ شىعارا الادى»، –دەيدى  ينتەرنەت ساۋدا قاۋىمداستىعىنىڭ وكىلدەرى.

ءموبيلدى قوسىمشالار باعدارلامالارى ينتەرنەت ساۋدا ۇيلەرىنىڭ سايتتارى ءۇشىن تاپسىرىس قابىلداۋ مەن ورىنداۋدىڭ تەتىكتەرىن بارىنشا جىلدامداتۋ ءۇشىن جۇمىستار جۇرگىزىپ جاتىر. «ماركەتلەيستەردى ححI عاسىرداعى ونلاين ساۋدانىڭ فەنومەنى دەۋگە بولادى. ءبىر عانا سەرۆيزدىڭ كومەگىمەن الەمنىڭ كەز-كەلگەن نۇكتەسىندە قوناقۇيدەن ورىن برونداۋعا،تاۋارلاردى ساتىپ الۋعا، ءتىپتى تاقسيگا تاپسىرىپ بەرۋگە بولادى»،–دەيدى  CEO Satu.kz  ساراپتاما ورتالىعىنىڭ وكىلى يۆان پورتنوي.

ونىڭ ايتۋىنشا، قازاقستاندا  ەلەكتروندى كوممەرتسيا يندۋسترياسىندا كوشباسشى بولۋعا، ورتالىق ازيا نارىعىنداعى ۇلەستى كوبەيتۋگە مۇمكىندىك بار. ديناميكالىق دامۋعا بىرنەشە فاكتور كەدەرگى كەلتىرىپ وتىر. ءبىرىنشى فاكتور  ينتەرنەت –كوممەرتسيا الاڭدارىنىڭ ازدىعى. جەتىلدىرۋدى تەزدەتەتىن فاكتور – لوگيستيكا. تاۋار وندىرۋشىدەن ينتەرنەت ساتىپ الۋشىعا دەيىن جەتكىزۋ پروتسەسىن جىلدامداتۋعا بىرنەشە جىل كەتۋى مۇمكىن.

ستاتيستيكالىق مالىمەتتەرگە قاراعاندا، 2019  جىلى 110 جاڭا ونلاين-ساۋدا مەكەمەسى تىركەلگەن. ال ساۋدا نارىعىندا 1658 ينتەرنەت-دۇكەن جۇمىس ىستەيدى. وسى نارىقتاعى تۇتىنۋشىلار سانى   5%-عا ارتىپ،  71،6 مىڭ ادام ەڭبەكپەن قامتىلدى. ەلىمىزگە ەلەكتروندىق ساۋدا تۇسىنىگى 2005 جىلدان بەرى ەنە باستادى. تۇرعىنداردىڭ ونلاين-ساۋدانى مەڭگەرۋ دەڭگەيى 2015-2016 جىلدارمەن سالىستىرعاندا 35 پايىزعا ءوسىپتى. بۇل قازاقستاننىڭ ءاربىر ءتورتىنشى تۇرعىنى ينتەرنەت ساۋدانىڭ مۇمكىندىكتەرىن تۇسىنە باستاعانىن بىلدىرەدى.

دەمەك  Alibaba جانە Wildberries دەگى 50 اككاۋنتتى الەمدىك نارىققا اشىلعان تەرەزە دەپ قابىلداۋعا بولادى.  

سوڭعى جاڭالىقتار

ۇقساس جاڭالىقتار