اگەنتتىكتىڭ ايماقتىق دەپارتامەنتتەرى قىلمىستىق ءىس جۇرگىزۋ كودەكسىنىڭ 200-بابى نەگىزىندە قىلمىستىق جانە باسقا دا قۇقىق بۇزۋشىلىقتار جاساۋعا ىقپال ەتكەن جاعدايلاردى رەتتەۋ جونىندەگى ۇسىنىستاردى ونلاين رەجيمدە قاراۋ تاجىريبەسىن قولعا الدى. بۇل ءۇشىن جينالىستىڭ وتكىزىلەتىن ۋاقىتى مەن بايلانىستىرۋشى الەۋمەتتىك جەلىنىڭ اتاۋى كورسەتىلىپ, الدىن الا حابارلانادى.
ونلاين فورماتتاعى جيىن ەڭبەك ۇجىمدارىنىڭ قاتىسۋىمەن باتىس قازاقستان جانە جامبىل وبلىستارىندا ءوتتى.
باتىس قازاقستان وبلىسىنىڭ سىبايلاس جەمقورلىققا قارسى قىزمەتى بقو جولاۋشىلار كولىگى جانە اۆتوموبيل جولدارى باسقارماسىنىڭ باس مامانىنا قاتىستى قىلمىستىق ءىستىڭ ءمان-جايىن قارادى.
ول 2019 جىلى قازان ايىندا قازتالوۆ جانە جاڭاقالا اۋداندارىندا وبلىستىق ماڭىزى بار جولداردى اعىمدىق جوندەۋ جانە ۇستاۋ بويىنشا ورىندالعان جۇمىستاردىڭ اكتىلەرىنە قول قويۋ ءۇشىن جشس وكىلىنەن جالپى سوماسى 220 000 تەڭگە پارا الۋدا كۇدىكتى بولدى. كۇدىكتى ازامات ورال قالالىق سوتىنىڭ كىنالى دەپ تانىلىپ, ءومىر بويى مەملەكەتتىك قىزمەتتەن الاستاتىلدى, 8,8 ملن تەڭگە كولەمىندە ايىپپۇل سالىندى.
سونىمەن قاتار جامبىل وبلىسىندا ەكى تۇرعىنعا الەۋمەتتىك كومەك الۋعا كومەكتەسۋ ءۇشىن 199 مىڭ تەڭگەگە جۋىق پارا العان جۇمىسپەن قامتۋ ءبولىمىنىڭ باس مامانىنا قاتىستى ماسەلە قارالدى.
قازىر بۇل قىزمەتكەر جۇمىستان شىعارىلىپ, وعان 1 ملن 400 مىڭ تەڭگە كولەمىندە ايىپپۇل سالىندى. سونداي-اق ول مەملەكەتتىك قىزمەتتەن جۇمىس ىستەۋ قۇقىعىنان ءبىرجولا ايىرىلدى.
سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى قىزمەتكەرىنىڭ ءىسىن جاسىرىپ, وعان جالعان قۇجات جاساۋعا جول بەرگەن جۇمىسپەن قامتۋ جانە الەۋمەتتىك قورعاۋ بولىمىندەگى باسشىلاردى دا جاۋاپكەرشىلىككە تارتۋ تۋرالى ۇسىنىس ەنگىزدى.
