قانشا ەكسپرەسس-تەست بار؟
وڭىرلىك كوممۋنيكاتسيالار قىزمەتىنىڭ مالىمەتىنە سۇيەنسەك, كوروناۆيرۋس ينفەكتسياسىنىڭ بار-جوعىن تەكسەرەتىن ەكسپرەسس-تەست شەتەلدەردەن كەلگەندەرگە, سونداي-اق جەرگىلىكتى ەمحانالارعا جرۆي بەلگىسىمەن جۇگىنگەن ادامدارعا جۇرگىزىلۋدە.
كوروناۆيرۋس بەلگىسى انىقتالعان ادامدارمەن جاقىن قارىم-قاتىناستا بولعان تۇرعىندارعا دا سىناما تەست جۇرگىزىلەدى. دارىگەرلەر تەست ناتيجەسىن 6 ساعاتتان كەيىن الادى.
– اتىراۋ قالاسىندا تۇرعىنداردان ەكسپرەسس-تەست الاتىن 5 ۆيرۋسولوگيا توبى جۇمىس ىستەۋدە. جالپى, ايماقتا كوروناۆيرۋستى انىقتاۋعا ارنالعان 700 تەست بار. تەست توپتامالارى قوسىمشا قاجەت بولسا, تاعى دا ءتيىستى مولشەردە جەتكىزىلەتىن بولادى, – دەپ حابارلادى وبلىستىق دەنساۋلىق ساقتاۋ باسقارماسى.
قوردا – 824 توننا ۇن
اتىراۋ قالالىق كاسىپكەرلىك جانە تۋريزم ءبولىمىنىڭ مالىمەتىنە قاراعاندا, قازىر 8 ناۋبايحانا ءۇزىلىسسىز جۇمىس ىستەپ تۇر. مۇندا تاۋلىگىنە 40 مىڭ بولكە نان پىسىرىلەدى.
«داۋلەت نان» جشس-نىڭ نان ءپىسىرۋ تسەحى ءوندىرىس قۋاتىن ۇلعايتۋدى كوزدەپ وتىر. مۇندا وسى كەزگە دەيىن تاۋلىگىنە 7 مىڭ بولكە نان پىسىرىلگەن. ەندى ونى تاۋلىگىنە 15 مىڭعا دەيىن كوبەيتپەك.
– قازىر نان تسەحىندا 90 ادام جۇمىس ىستەيدى. جۇمىسشىلار سانىن قىسقارتپايمىز. كەرىسىنشە, ءبىز قوسىمشا ادامداردى جۇمىسقا تارتىپ, جۇمىسشىلار قاتارىن كوبەيتەمىز, – دەيدى «داۋلەت نان» جشس وكىلى فارۋح ابدۋللاەۆ.
وڭىرلىك كوممۋنيكاتسيالار قىزمەتىنىڭ مالىمەتىنشە, اتىراۋ وبلىسىندا 824 توننا ۇن قورى بار. ونىڭ 520 تونناسى تۇراقتاندىرۋ قورىندا ساقتاۋلى. جەرگىلىكتى اكىمدىك توتەنشە جاعداي كەزىندەگى تۇراقتىلىقتى ساقتاۋ ءۇشىن قوسىمشا 17 مىڭ 115 توننا ۇن ساتىپ الۋدى جوسپارلاپ وتىر.
جولاۋشى دا, اۆتوبۋس تا ازايدى
اتىراۋ قالاسىنداعى اۆتوبۋستارعا مىنەتىن جولاۋشىلار بۇرىنعىداي كوپ ەمەس. ءتىپتى بىرنەشە ەسەگە ازايىپ كەتتى.
«سمارت اتىراۋ» كمم ديرەكتورى ادىلبەك تاڭقيەۆتىڭ ايتۋىنشا, بۇرىن كۇنىنە قالا ىشىندەگى اۆتوبۋس قاتىناسىندا جولاۋشىلار اعىنى 100 مىڭدى قۇراعان. ال قازىر 40 مىڭعا دەيىن ازايعانى بايقالعان.
– توتەنشە جاعدايدىڭ ەنگىزىلۋىنە بايلانىستى اتىراۋ قالاسىندا جولاۋشى تاسىمالدايتىن اۆتوبۋستاردىڭ سانىن 160-تان 140 بىرلىككە دەيىن قىسقارتۋعا ۇيعارىم جاسادىق. دەمالىس كۇندەرى جولاۋشىلاردى 115 اۆتوبۋس تاسىمالدايدى. رەيستەن ورالعان بويدا ءار اۆتوبۋستىڭ سالونىنا سانيتارلىق تازالىق جۇرگىزىلىپ, دەزينفەكتسيالىق ەرىتىندىمەن وڭدەلەدى. وسى ماقساتتا كوندۋكتورلارعا ارنايى قولعاپتار مەن دەزينفەكتسيالىق قۇرالدار بەرىلدى, – دەدى ادىلبەك تاڭقيەۆ.
اۆتوبۋستار توقتاپ تۇر
اتىراۋ قالاسىنداعى اۆتوبەكەتتەن اۋدانارالىق, قالاارالىق, سونداي-اق حالىقارالىق باعىتقا قاتىنايتىن اۆتوبۋستار توقتادى.
اۆتوبەكەت ديرەكتورى ۆاديم سينكەەۆيچتىڭ ايتۋىنشا, وسى كەزگە دەيىن 6 باعىتقا 14 رەيس جولاۋشى تاسىمالداپ كەلگەن. ەندى اتىراۋ – استراحان, اتىراۋ – بەينەۋ, اتىراۋ – ورال, اتىراۋ – ماقات, اتىراۋ – يندەر, اتىراۋ – قۇلسارى باعىتىنا قاتىنايتىن اۆتوبۋستاردىڭ قوزعالىسى توقتاتىلدى. سوڭعى رەيس 28 ناۋرىزدا اتىراۋدان ماقاتقا عانا جۇرگەن.
– ءبىزدىڭ اۆتوبۋستارىمىزدىڭ سىيىمدىلىعى – 50 ادام. توتەنشە جاعداي ەنگىزىلگەننەن بەرى جولاۋشىلار سانى 2-3 ادامنان اسپادى, – دەيدى ۆاديم سينكەەۆيچ.
جۇماسات عازيز
