سۋرەتتى تۇسىرگەن ريشات باترياكوۆ
قايىڭدى, قاراعايلى ورمانى مەن بەتەگەلى-جۋساندى جازىق دالاسى, جاركول, اقسۋات, سارىمويىن سەكىلدى ايدىن كولدەرى بار ناۋىرزىم قورىعى جوعارى ساتىداعى وسىمدىكتىڭ 700-گە جۋىق ءتۇرى وسەتىن 192 مىڭ گەكتارداي القاپتى الىپ جاتىر. قورىقتا ءسۇت قورەكتىلەردىڭ قىرىقتان ارتىق, ال قۇستىڭ ءۇش جۇزدەن استام ءتۇرى تىرشىلىك ەتەدى. جىل قۇستارى قونىس اۋداراتىن اۋە جولى قورىق اۋماعىنداعى كولدەردىڭ ءدال ۇستىنەن وتەدى. سوندىقتان بۇل مەكەن سيرەك كەزدەسەتىن جانە ەرەكشە قورعاۋعا الىنعان قۇستاردىڭ جىل اينالىپ سوعاتىن ىستىق ۇياسى بولىپ كەتكەن.
– كوكتەمدە قورىق اۋماعىنا قۇستار ادەتتە تولقىن-تولقىنىمەن ۇشىپ كەلەدى. بيىل ەڭ ءبىرىنشى بولىپ قۇس تورەسى – اققۋ ۇشىپ كەلدى. ناتيجەسىندە, اققۋ ەرتە كەلىپ, ەڭ كەش قايتاتىن قۇس. مۇز قاتقانشا وسىندا قالادى. اققۋدى العاش سەگىزىنشى ناۋرىزدا بايقادىق. ناۋرىزدىڭ 23-ىنە قاراي جاركولگە مىڭعا تارتا اققۋ قوندى. ەندى ءبىرازدان سوڭ قاز, ۇيرەك شاعالالار كەلە باستايدى. ءار قۇستىڭ ۇشىپ كەلگەن ۋاقىتىن, ناۋىرزىم اۋماعىندا قانشا مەرزىم بولعانىن, ۇيا سالعانىن, جۇمىرتقا باسىپ, بالاپان ۇشىرعانىن قالدىرماي قاعازعا ءتۇسىرىپ وتىرامىز. اراعا جىل سالىپ ۇشىپ كەلەتىن اق قۇيرىق سۋ بۇركىت سياقتى قۇستار بار, – دەدى قورىقتىڭ كىشى عىلىمي قىزمەتكەرى ريشات باترياكوۆ.
ورنيتولوگ-عالىمنىڭ ايتۋىنشا, ناۋىرزىم قورىعىندا قۇستىڭ 318 ءتۇرى تىركەلگەن. ونىڭ ءبىرازى ۇيا سالىپ, جۇمىرتقالاپ, بالاپاندارىنىڭ قاناتى قاتايعانشا وسى جەردى پانالايدى. كەيبىر قۇستار قونىپ, ءبىراز ءال جيناپ الىپ قايتا ۇشادى. قورىق اۋماعىن قىرىقتان استام قۇس تۇراقتى مەكەندەيدى.
قوستاناي وبلىسى
