قازاقستان حالقى اسسامبلەياسى اتالعان اكتسيا اياسىندا 21-26 ناۋرىز ارالىعىندا جالپى كولەمى 3,5 ميلليون تەڭگەنى قامتيتىن ماتەريالدىق كومەك كورسەتتى. بۇعان قوسا ءوڭىر-وڭىردە 500-دەن اسا وتباسىعا كومەك قولىن سوزىپ, 100 مىڭنان اسا مەديتسينالىق ماسكانى تەگىن ۇلەستىردى.
ء«بىز بىرگەمىز!» اكتسياسىنا نۇر-سۇلتان قالالىق قازاقستان حالقى اسسامبلەياسىنىڭ مۇشەلەرى دە بەلسەندى قاتىسىپ, از قامتىلعان كوپبالالى وتباسىلارعا جانە قارت ادامدارعا قامقورلىق كورسەتىپ جاتىر.
ەلورداداعى «پاراسات» قايىرىمدىلىق قىزمەتىن ۇيلەستىرۋ ورتالىعى كوپبالالى 15 وتباسىعا ەڭ قاجەتتى تاۋارلار تۇرىندە 150 مىڭ تەڭگەگە كومەك كورسەتتى.
اسسامبلەيا ەرىكتىلەرى زەينەتكەرلەرگە ءدارى-دارمەك جەتكىزۋ, ماسكالار تاراتۋ باستامالارىنا دا قولعابىس ەتتى. سونداي-اق ولار پيك وكىلدەرىمەن بىرگە تۇرعىن ۇيلەردىڭ كىرەبەرىسىنە سانيتارلىق تازالىق جۇرگىزدى.
نۇر-سۇلتان قالاسىندا وسى ۋاقىت ارالىعىندا جالپى سوماسى 1 ملن 350 مىڭ تەڭگە بولاتىن كومەك كورسەتىلدى.
