- قۋانىشبەك ىسقاقوۆ
وسى اپتادا قىزىلوردا وبلىسىنىڭ اكىمى قۋانىشبەك ىسقاقوۆتىڭ ءىستى بولعانى تۋرالى اقپارات تارادى. ىسقاقوۆ 2019 جىلى ماۋسىم ايىندا عانا وبلىس اكىمى بولىپ تاعايىندالعان بولاتىن. اقپارات قۇرالدارى تاراتقان دەرەكتەرگە سەنسەك, قىزىلوردا وبلىسىنىڭ بۇرىنعى اكىمى وتكەن جىلى ارىس قالاسىندا بولعان اپاتقا بايلانىستى جينالعان «سىر مەيىرىمى» قورىنىڭ 80 ملن تەڭگەسىن ءتورت قۇرىلىس كومپانياسىنا اۋدارۋ ارقىلى قولدى قىلعان كورىنەدى. «سىبايلاس جەمقورلىققا قارسى قىزمەتتىڭ كەيبىر دەرەككوزدەرىنىڭ اقپاراتى بويىنشا, قىزىلوردا وبلىسىنىڭ اكىمى قۋانىشبەك ىسقاقوۆ الاياقتىق جاساعانى ءۇشىن ۇستالدى. سونىمەن قاتار, ونىڭ ورىنباسارى مارات دەلمۇحانوۆ پەن اكىمىنە تۋىس بولىپ كەلەتىن ەكى كاسىپكەر – جەڭىسبەك ىسقاقوۆ پەن ازات دوسمايلوۆ ۇستالدى» دەپ جازدى اقپارات قۇرالدارى. شىنىندا بۇل ەكى كاسىپكەر قۋانىشبەك دوسمايىل ۇلى ىسقاقوۆتىڭ جاقىن باۋىرلارى ەكەنى اتى-جوندەرىن-اق كورىنىپ تۇر. ەندى بۇل ءىس قالاي ءوربيدى, قالاي اياقتالادى, وسىناۋ ايىپتاۋلار دالەلدەنە مە, جوق پا, ونى ۋاقىت كورسەتەدى. بىراق, وسى اپتادا قۋانىشبەك ىسقاقوۆ قىزمەتىنەن بوساپ, ورنىنا ءماجىلىس دەپۋتاتى گۇلشارا ابدىقالىقوۆا تاعايىندالدى. ازىرگە ەلىمىزدىڭ سىبايلاس جەمقورلىققا قارسى ءىس-قيمىل اگەنتتىگى ق. ىسقاقوۆقا بايلانىستى ەشقانداي رەسمي مالىمدەمە تاراتقان جوق.
- ەلميرا سۋحانبەرديەۆا
ءبىلىم جانە عىلىم ءمينيسترىنىڭ بۇرىنعى ورىنباسارى ەلميرا سۋحانبەرديەۆانىڭ ءىسى دە جۇرتتى ءبىراز دۇرلىكتىردى. تەرگەۋ اقپاراتتارىنا قاراعاندا ەلميرا سۋحانبەرديەۆا مەن ەلورداداعى №3 مەكتەپ گيمنازياسىنىڭ بۇرىنعى ديرەكتورى ەلەنا شەۆەرنياەۆا «تسەنترالنايا» جەكەمەنشىك ەكونوميكالىق مەكتەبىن اشقان. سونىڭ سالدارىنان №3 مەكتەپ گيمنازياسىندا ورىن ازايىپ, باسقا بالالار وقۋعا قابىلدانباي قالعان. بىلايشا ايتقاندا, بۇرىنعى ۆيتسە-مينيستر قولىنداعى بيلىگىن تەرىس پايدالانعان. ءسويتىپ, سۋحانبەرديەۆا سەنىمدى ادامدارى ارقىلى 2019 جىلدىڭ باسىندا جەكەمەنشىك مەكتەپتىڭ جۇمىسىنا ارالاسا باستاعان كورىنەدى. شەۆەرنياەۆا ۆيتسە-ءمينيستردىڭ قولداۋ جاسايتىنىن ءبىلىپ «تسەنترالنايا» مەكتەبىنىڭ ۇيىمداستىرۋ فورماسىن اۋىستىرىپ, جاۋاپكەرشىلىگى شەكتەۋلى سەرىكتەستىك رەتىندە قۇرۋدى ۇسىنادى. سۋحانبەرديەۆا اتالعان ۇسىنىسپەن كەلىسكەن. وسىلايشا, ەكەۋى جشس-نى بىرگە باسقارۋعا, تابىستى بولۋگە جانە ينۆەستيتسيانى بىرلەسىپ سالۋعا ۋاعدالاسقان. سۋحانبەرديەۆا مەملەكەتتىك قىزمەتىن پايدالانىپ, جەكەمەنشىك مەكتەپكە قولداۋ جاساۋعا كەلىسىمىن دە بەرگەن.
«وسىلايشا, سۋحانبەرديەۆا مەن شەۆەرنياەۆا جشس-نىڭ قۇرىلتايشىسى رەتىندە وزدەرىن ەمەس, تۋعان-تۋىستارىن راسىمدەۋگە ۋاعدالاسقان. ءسويتىپ, جەكەمەنشىك فيرمانىڭ قۇرامىنا سۋحانبەرديەۆانىڭ تۋعان اپاسى جانە شەۆەرنياەۆانىڭ اناسى ەنەدى. بۇدان بولەك, ەكەۋى جەكەمەنشىك مەكتەپتىڭ جاڭا عيماراتىن الۋ ءۇشىن جشس ەسەپشوتىنا 154 ميلليون 523 مىڭ 400 تەڭگە سالعان» دەيدى بۇل جونىندە پروكۋرور نۇرلان بەكماعامبەتوۆ
ايتپاقشى, سۋحانبەرديەۆا تەرگەۋ يزولياتورىندا جاتقان 34 كۇندە «تۇرمە ۆيتسە-ءمينيستردىڭ كوزىمەن» دەگەن كىتاپ جازىپ شىققانىن جاريا ەتكەن بولاتىن.
«تەرگەۋ يزولياتورىندا وتكىزگەن 34 كۇندە كىتاپ جازدىم. ول جاقىندا «تۇرمە ۆيتسە-ءمينيستردىڭ كوزىمەن» دەگەن اتاۋمەن جارىق كورەدى. بۇل ايەلدەر تۇرمەسى تۋرالى جازىلعان العاشقى كىتاپ, ونىڭ ىشىندە قانشاما ادامدار, قانشاما پىكىرلەر بار. مۇندا تەك مەن تۋرالى عانا جازىلعان جوق, ول كىتاپتا بارلىعى بار. سوندىقتان وتە قىزىقتى كىتاپ بولادى دەپ ويلايمىن. كىتاپ جازۋدى اياقتاپ قالدىم, تەك كەيبىر ادەبي تۇزەتۋلەر عانا قالدى» دەدى بۇل جونىندە ەلميرا سۋحانبەرديەۆا. ءتىپتى, بۇرىنعى ۆيتسە-مينيستر وزىنە رەسەيلىك جانە شەتەلدىك اقپارات قۇرالدارىنان ۇسىنىس تۇسكەنىن, بىراق, ول كىتاپتىڭ تۇساۋىن وسى قازاقستاندا كەسۋدى ۇيعارعانىن دا اشىق ايتقان ەدى. بىراق, بۇل كىتاپتىڭ كەيىنگى تاعدىرى بەلگىسىز. اباقتىدا اي قاراپ جاتپاي, تۇلا بويىنداعى اشۋ-ىزاسى مەن كورگەن-باققانىنىڭ ءبارىن قاعازعا تۇسىرگەن سۋحانبەرديەۆانىڭ بۇل دۇنيەسى سول كۇيى وقىرمانعا جەتپەدى.
- بولات باقاۋوۆ
وسى جىلدىڭ باسىندا پاۆلودار وبلىسىنىڭ بۇرىنعى اكىمى بولات باقاۋوۆ تا جاقىندارىن جارىلقايمىن باسى داۋعا قالدى. اقپارات قۇرالدارىندا جازىلعان دەرەكتەرگە سەنسەك, بىلتىر قىركۇيەكتە پاۆلودار وبلىسى بويىنشا مەملەكەتتىك كىرىستەر دەپارتامەنتىنىڭ ماماندارى «AksuTransLogistic» جشس تەكسەرەدى. ونىڭ ءبىر عانا قۇرىلتايشىسى بار, ول - باقاۋوۆتىڭ باۋىرى. كاسىپورىننىڭ 2014 جىلدان 2018 جىلدىڭ سوڭىنا دەيىن سالىقتاردى قالاي تولەگەنىن تەكسەرىپ جاتقانىن ەستىگەن وبلىس اكىمى مەملەكەتتىك كىرىستەر دەپارتامەنتىنىڭ ماماندارىنا جاعدايدان قۇلاعدار ەتىپ وتىرۋدى بۇيىرعان. پروكۋروردىڭ سوزىنە قاراعاندا, جىلدىڭ سوڭىندا باقاۋوۆ تۋىسقانى 200 ميلليون تەڭگەدەن استام سالىق تولەيتىنىن ءبىلىپ, ءوز وكىلەتتىگىن بىرنەشە رەت اسىرا پايدالانىپ, تەكسەرىس قورىتىندىلارىن جاسىرىپ, تولەيتىن سالىقتى 3-5 ميلليون تەڭگەگە دەيىن تومەندەتۋدى تالاپ ەتكەن.
قازىر بولات باقاۋوۆ ءۇي قاماقتا وتىر.
- اسقار ەسىلوۆ
ەلورداداعى بايقوڭىر اۋدانىنىڭ اكىمى قىزمەتىن اتقارعان اسقار ەسىلوۆ تە ءوز جاقىندارىنا جاقسىلىق جاساۋدىڭ «قۇربانى» بولدى. ەكس-اكىمنىڭ تەلەفون ارقىلى سويلەسكەن اڭگىمەلەرىن تىڭداۋ ارقىلى, وتكەن جىلدىڭ قاراشا ايىندا نۇرتازين دەگەن جاقىن تۋىسى وعان 4 ملن تەڭگە جانە قۇنى جارتى ميلليون تەڭگەدەن اساتىن «ايفون 11» تەلەفونىن سىيعا تارتقانى ءمالىم بولدى. وسىنداي سىي جاساۋ ارقىلى اكىمنىڭ تۋىسقانى كوگالداندىرۋ ءىسى بويىنشا 72 ملن تەڭگەگە جاريالانعان تەندەردىڭ جەڭىمپازى اتانعان. كەيىن تەكسەرۋ كەزىندە «ايفون 11» تەلەفونى اۋدان اكىمىنىڭ ۇيىنەن تابىلدى. نۇرتازين قىمبات تەلەفوندى ەسىلوۆكە «ەسىل» ساۋدا ۇيىنەن ساتىپ الىپ بەرگەن ەكەن. ونىڭ كەپىلدىك قۇجاتتارىندا نۇرتازيننىڭ اتى-ءجونى كورسەتىلگەن.
اسقار ەسىلوۆ ءوز كىناسىن بىردەن مويىنداپ, سوت وعان 15 450 000 تەڭگە, ال نۇرتازينگە 7 725 000 تەڭگە ايىپپۇل سالدى.
