وبلىستىق دەنساۋلىق ساقتاۋ باسقارماسىنىڭ باسشىسى جاقسىلىق ابدىسامەتوۆتىڭ ايتۋىنشا ۆيرۋس جۇقتىرعان قالا تۇرعىنى وبلىس ورتالىعىنداعى «سەنىم» ەمحاناسىنىڭ مەدبيكەسى. ول وسى ىندەتكە شالدىققانى كەشە انىقتالعان 65 جاستاعى تۇرعىنعا ەم جاساعان بولىپ شىقتى.
– قازىر 23 جاستاعى ناۋقاستىڭ جاعدايى بىرقالىپتى. ەشقانداي اۋىرسىنۋ بەلگىلەرى جوق. ارىپتەسىمىزدىڭ امان-ەسەن جازىلىپ, قاتارعا قوسىلۋىنا بار كۇشىمىزدى سالامىز, – دەيدى وبلىستىق دەنساۋلىق ساقتاۋ باسقارماسىنىڭ باسشىسى.
ال وبلىستىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى ءاليا ابدىقايىموۆا وبلىس بويىنشا العاش رەت وسىنداي دياگنوزبەن اۋرۋحاناعا كەشە تۇسكەن ايەلدىڭ جاعدايى جاقسارا تۇسكەنىن ايتىپ ءوتتى. ونىمەن قارىم-قاتىناستا بولعان 69 ادام انىقتالىپ, ءتيىستى تەكسەرۋدەن وتكەن. ولاردىڭ اراسىنان وسى ەمحانا مەدبيكەسىنىڭ بويىنا ۆيرۋس جۇقتىرىپ العانى بەلگىلى بولىپ وتىر. ەكى ناۋقاس تا قالانىڭ ءبىر اۋدانىنان, قازىر ول اۋماق مامانداردىڭ باقىلاۋىنا الىنعان.
