سوڭعى ءبىر تاۋلىكتە گەرمانيادا 5780 ادام كوروناۆيرۋس جۇقتىرعان. ەلدە 55 ادام قايتىس بولدى. ۇكىمەت شەشىمىمەن ىندەتتىڭ تارالۋىنا قارسى قاتال شارالار قابىلدانسا دا، ءتىپتى 2 ادامنان ارتىق جينالۋعا تىيىم سالىنىپ، بارلىق ءدامحانالار جابىلسا دا جاعداي ۋشىعىپ تۇر. ەندى قوعامدىق كولىكتەگى جولاۋشىلار سانىن ازايتۋ كوزدەلىپ وتىر. جۋىردا تەمىرجولشىلار وداعى پويىزدار سانىن ەكى ەسە قىسقارتۋدى تالاپ ەتتى. بىرىنشىدەن، بۇل ۆيرۋستىڭ تارالۋىنا جول بەرمەيدى.

رەسمي دەرەك بويىنشا ەل ىشىندەگى ساياحات سانى 30%-عا قىسقارعان.، گەرمانيا دەنساۋلىق ساقتاۋ ءمينيسترى يەنس شپاننىڭ ايتۋىنشا، ىندەت تارالۋىن باسەڭدەتۋ ءۇشىن قوعام تىرشىلىگىنە شەكتەۋ قويۋ قاجەت. حالىقتىڭ ۆيرۋسقا وسال توپتارىن قورعاۋعا الىپ، ولارعا قامقورلىق كورسەتۋدىڭ جاڭا شەشىمدەرى ازىرلەنبەك. ۆيرۋسقا قارسى شارالاردى جۇمسارتۋ تۋرالى اڭگىمە قوزعاۋعا ءالى ەرتە. سونداي-اق ول قاتال شارالار بيزنەسكە زيانىن كەلتىرىپ تۇرعانىن، شەكارا جابىلعاندىقتان ەلگە تۋريستەر كەلمەي قالعانىن، كوبىسى قاشىقتان جۇمىس ىستەۋ تارتىبىنە كوشكەنىن ايتادى.

ەلدە تاكسي جۇرگىزۋشىلەرى كۇندەلىكتى تابىسى جۇزدەگەن ەۋرودان جيىرما ەۋروعا تۇسكەنىن جاسىرمايدى. ماسەلەن، گەرمانيالىق تاكسيشى ادي ۆەنەرا ءوز سۇحباتىندا: «وسىدان سەگىز كۇن بۇرىن جۇمىسىم ەكى ەسە ازايعانىن ايتىپ ەدىم. قازىر بولسا 90%-عا ازايدى. ەلۋ جىلدىق تاكسيلىك جۇمىسىمدا مۇنداي جاعداي كەزدەسپەگەن» دەپتى.

ايتا كەتەيىك، ەلدە اۆتوبۋسپەن جولاۋشىلاردى تاسىمالدايتىن 400-دەي فيرما زور شىعىنعا باتقانىن جاريالاعان. كاسىپكەرلەر الداعى ءتورت اپتادا جاعداي تۇراقتالماسا، بانكروت جاريالاۋعا نەمەسە ۇكىمەتتەن كومەك سۇراۋعا ءماجبۇر بولاتىنىن ەسكەرتىپ وتىر.