«مەملەكەتتىك الەۋمەتتىك ساقتاندىرۋ قورى (تمككك) ەڭبەكاقى تولەۋسىز ءماجبۇرلى دەمالىسقا كەتۋىنە بايلانىستى جۇمىسىنان ايرىلعان ازاماتتارعا جاڭا الەۋمەتتىك تولەمدەردىڭ العاشقى تولەمدەرىن جاسادى», دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگى.
ەستەرىڭىزگە سالا كەتەيىك, جاڭا تولەم توتەنشە جاعدايعا بايلانىستى دەمالىسقا جىبەرىلگەن (جۇمىستان بوساتىلعان) قىزمەتكەرلەرگە بەرىلەدى.
«تولەمدى الۋ ءۇشىن قىزمەتكەرلەر توتەنشە جاعداي باستالعانعا دەيىن سوڭعى 12 ايدىڭ ىشىندە مەملەكەتتىك الەۋمەتتىك ساقتاندىرۋ قورىنا كەمىندە ءۇش اي بويى جارنا اۋدارۋى كەرەك. الەۋمەتتىك تولەم ورتا, شاعىن جانە ميكرو بيزنەس جۇمىسشىلارىنا, جەكە تۇلعالارعا تولەنەدى» دەپ كورسەتىلگەن.
جۇمىس بەرۋشىلەرگە جاڭا الەۋمەتتىك تولەم تاعايىنداۋ ءۇشىن جەرگىلىكتى جۇمىسپەن قامتۋ اگەنتتىگىنە «ەلەكتروندىق ۇكىمەت» ۆەب-پورتالىنداعى «ەلەكتروندىق ۇندەۋ» قىزمەتى ارقىلى توتەنشە جاعداي كەزىندەگى كىرىستەرىنەن ايرىلعانىن راستايتىن قۇجاتتاردىڭ كوشىرمەسى كەرەك.
الەۋمەتتىك تولەم قىزمەتكەرگە ەڭبەك دەمالىسى كەزىندە, بىراق توتەنشە جاعدايدىڭ ۇزاقتىعىنان اسپايتىن مەرزىمدە تولەنەدى.
بۇعان دەيىن پرەزيدەنت قاسىم-جومارت توقاەۆ توتەنشە جاعداي سالدارىنان تابىستارىنان ايرىلعان قازاقستاندىقتارعا اي سايىن 42,5 مىڭ تەڭگە تولەۋگە مىندەتتەدى.
سونىمەن قاتار, 30 ناۋرىزدان باستاپ نۇر-سۇلتان مەن الماتىدا كاسىپورىن مەن ۇيىمنىڭ قىزمەتى توقتاتىلادى.
ەسكە سالايىق, الماتى مەن نۇر سۇلتانعا 2020 جىلدىڭ 19 ناۋرىزىنان باستاپ كارانتين ەنگىزىلدى. قالالارعا كىرۋگە جانە شىعۋعا شەكتەۋلەر قويىلدى, سانيتارلىق جاعداي نىعايتىلدى. كەيىن قر پرەزيدەنتى جانىنداعى توتەنشە جاعدايدى قامتاماسىز ەتۋ جونىندەگى مەملەكەتتىك كوميسسيا نۇر-سۇلتان جانە الماتى قالالارىندا كارانتين رەجيمىن كۇشەيتۋ تۋرالى شەشىم قابىلدادى.
