سىرتقى ىستەر مينيسترلىگى 27 اقپاننان باستاپ ازاماتتارعا ءبىرىنشى ساناتتاعى ەلدەرگە ساپارلاۋدان باس تارتۋدى جانە مۇمكىندىگىنشە ەكىنشى ساناتتاعى ەلدەرگە ساپاردى كەيىنگە شەگەرۋدى ۇسىنىپ, بۇل مالىمدەمەنى تۋريستىك سالادا جۇمىس ىستەيىن ۇيىمدارعا تاراتقان.
بۇعان قاراماستان 16 ناۋرىزعا دەيىن 435 مىڭ ازامات شەتەل اسىپ ۇلگەرگەن. ولاردىڭ كوبى جىلى ەلدەرگە دەمالۋعا شىققان. مىسالى, تەك مىسىرعا – 5616, ءباا-عا – 6778, تۇركياعا – 8327, تايلاندقا – 1342, مالديۆ ارالدارىنا 487 وتانداسىمىز بارعان. بۇل قاتاردا مەكسيكا, دومينيكان رەسپۋبليكاسى,بۋركينا-فاسو, برازيليا سياقتى ەكزوتيكالىق ەلدەر دە بار.
– سول تۇستا ۇلتتىق اۆياتاسىمالداۋشىلار كوپتەگەن ەلگە ۇشۋدى بەلسەندى تۇردە قىسقارتا باستادى. ءبىزدىڭ ازاماتتار بۇعان دا توقتاعان جوق. سۇرانىستىڭ كۇرت تومەندەۋىنەن تۋريستىك جولدامالاردىڭ باعاسى دا ارزانداي بەردى. ال بۇل جاعدايدى نەگە پايدالانباسقا... وتانداستارىمىزدىڭ كوبى كورشى ەلدەردىڭ اۆياتاسىمالداۋشىلارىمەن ۇشا باستادى. وسىلايشا رەسەي ارقىلى – 174378, قىرعىزستان ارقىلى – 118199, وزبەكستان ارقىلى – 109125 قازاقستاندىقتار ۇشىپ كەتتى. بۇدان ءارى بۇل ترانزيتتىك جولاۋشىلار ەۋروپالىق ەلدەرگە جانە كۋرورتتىق وڭىرلەرگە باعىت الدى, – دەدى ايبەك سمادياروۆ.
