الەم • 27 ناۋرىز، 2020

قاتاڭ شارا قابىلداماعان ەلدەر قاپى قالۋدا

78 رەتكورسەتىلدى

الەمدى جايلاعان كوروناۆيرۋس پاندەمياسىنا قارسى شارالار بارلىق ەلدە كۇن ساناپ كۇشەيىپ كەلەدى. پرەزيدەنت جانىنداعى توتەنشە جاعداي رەجىمىن قامتاماسىز ەتۋ جونىندەگى مەملەكەتتىك كوميسسيا نۇر-سۇلتان، الماتى جانە شىمكەنت قالالارىندا شەكتەۋ شارالارىن كۇشەيتكەنى بەلگىلى. ارنايى ءتارتىپ دۇنيە ءجۇزى بويىنشا 22 مىڭنان استام ادامنىڭ قازاسىنا سەبەپ بولعان ىندەتپەن كۇرەستىڭ باستى شەشىمى بولىپ تۇر.

 

قىتايدا ۆيرۋس جۇقتىرعانداردىڭ 90%-ى ايىقتى

قاتاڭ شارالار ەڭ العاش ۆيرۋستىڭ وشاعىنا اينالعان قىتايدا قاڭتار ايىندا ەنگىزىلدى. ەل بيلىگى 11 ميلليون تۇرعىنى بار ۋحان قالاسىنداعى بارلىق قوزعالىستى توقتاتۋ تۋرالى شەشىم شىعارعان ەدى. قارا ماسكا كيگەن اسكەر تەمىر جول ۆوكزالىنان باس­تاپ وزگە دە ادام كوپ شوعىرلاناتىن ورىنداردى جاۋىپ تاستادى. قالاداعى ستاديوندار، كورمە زالدارى جانە وزگە دە ءىرى عيماراتتارعا توسەكتەر قويىلىپ، ەمحانادان گورى اسكەري ورىنعا ۇقسايتىن كارانتين ورتالىقتارى پايدا بولدى. ءبىر ساتتە قىتايدىڭ تىرلىگى قايناپ جاتقان ءىرى قالالارىنىڭ ءبىرى كوشەگە ادام اياق باسپايتىن، تىپ-تىنىش مەكەنگە اينالا كەتتى. ازياداعى ەڭ اۋقىمدى ۆيرۋس ءورشۋىن توقتاتۋ ءۇشىن قىتاي بيلىگى ەپيتسەنتردە ورنالاسقان ءار ءۇيدىڭ ەسىگىن قاعىپ، ىندەت بەلگىلەرى بار تۇرعىنداردى انىقتادى. باسىندا فيلم كورىنىسى سەكىلدى بولعان بۇل جاعداي كەيىننەن قىتايدىڭ وزگە وڭىرلەرى مەن الەمنىڭ باسقا ەلدەرىندە دە جالعاسىن تاپتى. ۋحان قالاسى ورنالاسقان حۋبەي پروۆينتسياسىندا 60 ملن ادامنىڭ كۇندەلىكتى تىرشىلىگىنە اسەر ەتكەن قاتاڭ رەجىم ادامزات تاريحىنداعى ەڭ ءىرى كارانتين سانالدى. ناتيجەسىندە 2 ايعا جۋىق ۋاقىتقا سوزىلعان كۇرەس ءوز جەمىسىن بەرگەندەي. قىتاي بىرنەشە كۇن قاتارىنان ەل ىشىندە ۆيرۋس جۇقتىرۋدىڭ جاڭا دەرەگى تىركەلمەگەنىن حابارلادى. بەيسەنبى كۇنگى بريفينگتە قىتايدىڭ ۇلتتىق دەنساۋلىق ساقتاۋ كوميسسياسى ەلدە ءبىر كۇندە تىركەلگەن 67 ناۋقاستىڭ بارلىعى شەتەلدەن كەلگەنىن ايتتى. Johns Hopkins University (JHU) ۇسىنعان اقپاراتقا سايكەس، ەلدە 81 782 جاعداي تىركەلسە، ونىڭ 3 285-ءى كوز جۇمعان. ال ۆيرۋس جۇقتىرعانداردىڭ 90 پايىزى (73 773 ادام) ىندەتتەن ايىققان. Covid-19 ۆيرۋسىمەن كۇرەستە قىتاي تاجىريبەسى ءتيىمدى ەكەنىن كورسەتىپ وتىر.

ۆيرۋس ءورشي باستاعان تۇستا قاتاڭ شارالار قابىلداعان مەملەكەتتەر قاتارىندا گونكونگ، تايۆان جانە سينگاپۋر دا بار. سوڭعى مالىمەتكە سەنسەك، بۇل ەلدەردە ىندەت جۇقتىرعاندار سانى ءبىر مىڭعا جەتپەگەن.

 يتاليادا 7،5 مىڭ ادام كوز جۇمدى

قىتايدان كەيىن ۆيرۋس كەڭ تاراعان ايماقتاردىڭ ءبىرى باتىس ەۋروپا بولدى. ونىڭ ىشىندە يتاليا مەن يسپانيادا ىندەتتەن قازا بولعاندار سانى قىتايدان اسىپ كەتتى. جوعارىدا ايتقانداي، جالپى ەلدە تىركەلگەن 3 285 ءولىمنىڭ كوپشىلىگى حۋبەي پروۆينتسياسىندا بولعان. يتا­ليا­دا ۆيرۋس جۇقتىرعاندار سانى قىتاي­مەن تەڭەسىپ قالدى، ەلدە بارلىعى
74 386 جاعداي تىركەلگەن. دەگەنمەن كوز جۇمعاندار سانى قىتايدان ەكى ەسە ارتىق (7 503 ادام). يسپانيادا دا جاعداي ءماز ەمەس. 56 188 ادام ۆيرۋس جۇقتىرعان، ونىڭ 4 089-ى ىندەتتەن كوز جۇمدى. ددۇ يتاليانى پاندەميانىڭ ەكىنشى وشاعىنا تەڭەدى. ەۋروپا ەلدەرىنەن گەرمانيا
(39 502 جاعداي) مەن فرانتسيادا دا
(25 604) ۆيرۋس ءورشىپ تۇر.

ەۋروپا ەلدەرى قاتاڭ شارالاردى دۇنيەجۇزىلىك دەنساۋلىق ساقتاۋ ۇيىمى كوروناۆيرۋستى پاندەميا دەپ مالىمدەگەننەن كەيىن عانا ەنگىزە باس­تادى. قازىردىڭ وزىندە شەكاراسىن جاپپاعان ەلدەر دە بار. ساراپشىلار ەۋروپالىقتاردىڭ بۇل ىندەتتى كوپكە دەيىن قاتەر رەتىندە قاراماعانىن ايتادى. ۆيرۋس وشاعىنا اينالعان ازيا قازىر عالامشارداعى ەڭ قاۋىپسىز ايماق بولىپ تۇر. ەۋروپانىڭ باياۋ ارەكەتىن سىناپ جاتقاندار دا جەتەرلىك.

 ءۇندىستان 21 كۇندىك كارانتين جاريالادى

جاقىندا قاتاڭ شارالار ەنگىزگەن ەلدەردىڭ قاتارىنا ءۇندىستان دا قوسىلدى. سەيسەنبى كۇنى ەلدىڭ پرەمەر-ءمينيسترى 21 كۇندىك كارانتين جاريالادى. ەلدە ۆيرۋس جۇقتىرعاندار سانىنىڭ ازدىعىنا قاراماستان، ماماندار ارنايى شارا قابىلدانباعان جاعدايدا الەمدەگى حالىق سانى كوپ ەلدەردىڭ ءبىرى ءۇندىستاندى ۇلكەن قاتەر كۇتىپ تۇرعانىن ەسكەرتتى. قازىر ەلدە 657 جاعداي تىركەلگەن، دەسە دە كورشىلەس پاكىستاندا ۆيرۋس جۇقتىرعاندار سانى مىڭنان اسقان.  

 اقش ۆيرۋس كەڭ تاراعان ءۇشىنشى ەلگە اينالدى

الەمدە كوروناۆيرۋس پاندەميا­سىنا قارسى كۇرەستە ارەكەت ەتۋگە كەشىككەن ەلدەر قاتارىندا اقش تا بار. ەلدە تىركەلگەن 69 197 جاعدايمەن اقش الەمدەگى ۆيرۋس كەڭ تاراعان قىتاي مەن يتاليادان كەيىنگى ءۇشىنشى ەلگە اينالدى. نيۋ-يورك شتاتىنىڭ وزىندە 30 مىڭنان استام ادام ۆيرۋس جۇقتىرعان. شتات گۋبەرناتورى ەندريۋ كۋومو ەمحانالاردا وكپەنىڭ جاساندى جەلدەتكىشتەرى جەت­پەي جاتقانىن مالىمدەدى. ونىڭ ايتۋىنشا، قازىر 4 مىڭ قۇرىلعى بار، ال اۋىر جاعدايداعى ناۋقاستار ءۇشىن 30 مىڭ دانا كەرەك دەيدى. ازىرگە شتات بيلىگى تۇرعىنداردان قاجەتتىلىك بولماعان جاعدايدا ۇيدە وتىرۋدى سۇراپ وتىر. ەندريۋ كۋومو بريفينگتە ۆي­رۋستى جەڭۋدە ءۇمىت بار ەكەنىن العا تارتقانىمەن، اپتا باسىنان بەرگى دەرەك­تەر ەمحاناعا ءتۇسىپ جاتقاندار سانى
4 كۇن سايىن ەكى ەسەلەنىپ جاتقانىن كور­سە­تۋدە.

وسى رەتتە، ۆيرۋسپەن كۇرەستە قاتاڭ شارالار قابىلداعان ەلدەردە جاعداي تۇراقتالىپ، ىندەتتىڭ قاۋپىن باعالاماعان باتىس ەلدەرىندە احۋال ۋشىعىپ بارا جاتقانىن كورىپ وتىرمىز.

 

سوڭعى جاڭالىقتار

الماتى: جولاۋشىلار اعىنى مەن كولىك سانى ازايدى

وڭتۇستىك قازاقستان • بۇگىن، 18:10

بەتپەردە كيگەن كوكتەم - 6

قوعام • بۇگىن، 17:09

د دارۋمەنى - ينفەكتسيالاردىڭ «جاۋى»

كوروناۆيرۋس • بۇگىن، 16:47

شىمكەنت: تسيفرلى وتباسىنىڭ ءبىر كۇنى

وڭتۇستىك قازاقستان • بۇگىن، 15:58

ازيانىڭ احۋالى قانداي بولماق

ەكونوميكا • بۇگىن، 15:23

ۇقساس جاڭالىقتار