كەشە مەملەكەت باسشىسى نۇرسۇلتان نازارباەۆ 2014-2016 جىلدارعا ارنالعان رەسپۋبليكالىق بيۋدجەت جوباسىن قالىپتاستىرۋ ماسەلەسى جونىندە كەڭەس وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
كەشە مەملەكەت باسشىسى نۇرسۇلتان نازارباەۆ 2014-2016 جىلدارعا ارنالعان رەسپۋبليكالىق بيۋدجەت جوباسىن قالىپتاستىرۋ ماسەلەسى جونىندە كەڭەس وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
مەملەكەت باسشىسى بيۋدجەتتى قالىپتاستىرۋ ەل الدىندا تۇرعان, سونىڭ ءىشىندە «قازاقستان-2050» ستراتەگياسىندا كورسەتىلگەن ماقساتتارعا قول جەتكىزۋگە باعىتتالعانىن اتاپ ءوتتى.
– مەملەكەتتىك قاراجاتتى ءتيىمدى پايدالانىپ, بيۋدجەت ءتۇسىمدەرىنىڭ كوزدەرىن جىل سايىن ۇلعايتىپ وتىرۋ قاجەت. كورسەتىلگەن ولشەمدەرگە قول جەتكىزۋ ءۇشىن پارلامەنت قاراۋىنا ەنگىزىلەتىن بيۋدجەت جوباسى ازىرلەندى, – دەدى نۇرسۇلتان نازارباەۆ.
ءوز بايانداماسىندا پرەمەر-مينيستر س.احمەتوۆ 2014-2016 جىلدارعا ارنالعان رەسپۋبليكالىق بيۋدجەتتىڭ نەگىزگى پارامەترلەرى تۋرالى ءمالىم ەتتى.
– اتالعان كەزەڭدەگى ەكونوميكانىڭ ناقتى ءوسىمى 6-7 % دەڭگەيىندە جوسپارلانۋدا. وسى كورسەتكىشتەر نەگىزىندە 2014-2016 جىلدارعا ارنالعان رەسپۋبليكالىق بيۋدجەت ولشەمى قالىپتاستىرىلدى, – دەدى پرەمەر-مينيستر.
سونداي-اق, س.احمەتوۆ مەملەكەت باسشىسىنىڭ ىشكى رەزەرۆتەردى قاراستىرۋ ءجونىندەگى تاپسىرماسىن ەسكەرىپ, رەسپۋبليكالىق بيۋدجەتتىڭ شىعىسى ىشكى جالپى ءونىمنىڭ 17,4 %-ىن قۇرايتىنىنان حاباردار ەتتى.
– جەرگىلىكتى بيۋدجەتتەر اياسىندا سۋبۆەنتسيا 81 ملرد.-قا قىسقارادى, ال بيۋدجەتتىك اقشانى الۋ, ءبىزدىڭ ءوڭىرلەرىمىزدى دامىتۋدى ەسكەرە وتىرىپ, 24 ملرد. تەڭگەنى قۇرايدى. رەسپۋبليكالىق بيۋدجەتتىڭ بازاسىندا ءبىز مەملەكەتتىك بيۋدجەتتى قالىپتاستىردىق, ونىڭ شىعىسى ىشكى جالپى ءونىمنىڭ 20,4 %-ىن قۇرايدى. 2014 جىلعا ارنالعان بيۋدجەتتىڭ جاڭا باستاماسى ءسىزدىڭ قازاقستان حالقىنا جولداۋىڭىزدان باستاۋ الادى. نەگىزىنەن, ول دامۋ باعدارلامالارىن ءجانە داعدارىسقا قارسى شارالاردى ىسكە اسىرۋعا باعىتتالادى, – دەدى پرەمەر-مينيستر.
س.احمەتوۆ جاڭا بيۋدجەتتىك ساياسات تۇجىرىمداماسى اياسىندا ۇكىمەت ۇلتتىق قوردىڭ نەگىزگى پارامەترلەرىن ساقتايتىنىن دا باياندادى.
ەكونوميكا جانە بيۋدجەتتىك جوسپارلاۋ ءمينيسترى ە.دوساەۆ رەسپۋبليكالىق بيۋدجەت شىعىستاردىڭ ماقساتقا سايكەستىلىگى مەن وبەكتيۆتىلىگى قاعيداتتارىن ەسكەرىپ قالىپتاستىرىلعانىن اتاپ ءوتتى.
– ءبىزدىڭ تاراپىمىزدان مەملەكەتتىك سالالىق باعدارلامالاردىڭ كوپشىلىگى قايتا ازىرلەندى. قارجى مينيسترلىگىمەن بىرلەسىپ بيىل ءبىز بيۋدجەت قاراجاتىن پايدالانۋ بويىنشا اي سايىن مونيتورينگ جۇرگىزەمىز. ءبىز بەلگىلەنگەن پاراماتەرلەرگە قول جەتكىزۋ ءۇشىن يگەرىلمەگەن قاراجاتتى ازايتۋ شارالارىن دا قاراستىرامىز. وسى جىلى ينۆەستيتسيالىق جوبالار بويىنشا قۇجاتتارىن ۇسىنباعان اكىمشىلەرگە رۇقسات بەرمەيمىز. ءبىز سونداي-اق مەملەكەتتىك ورگانداردى ۇستاپ تۇرۋعا بايلانىستى اعىمداعى شىعىستاردى قايتا قاراستىردىق, – دەدى ە.دوساەۆ.
قارجى ءمينيسترى ب.جامىشەۆ بيىلعى جانە كەلەسى جىلدارداعى سالىقتىق تۇسىمدەر ىشكى جالپى ءونىم دەڭگەيىنىڭ 10,2 % مولشەرىندە جوسپارلانعانىنان حاباردار ەتتى. ول رەسپۋبليكالىق بيۋدجەتتى مەملەكەتتىك سالالىق باعدارلامالار نەگىزىندە قالىپتاستىرۋ سوڭعى ناتيجەنى ناقتى باعالاي وتىرىپ مەملەكەتتىك شىعىستى كەشەندى جوسپارلاۋعا ءمۇمكىندىك بەرەتىنىنە توقتالدى.
مەملەكەت باسشىسى بيۋدجەتتىك قاراجات ەل دامۋىنىڭ باستى پارامەترلەرى – ەكونوميكانىڭ ءوسىمىن جانە جاڭا جۇمىس ورىندارىن اشۋ ءۇشىن قاتاڭ تۇردە جۇمسالۋى تيىستىگىن اتاپ كورسەتتى.
– سالىقتىق جانە كەدەندىك اكىمشىلەندىرۋ بويىنشا كەيبىر ماسەلەلەر بار. مىسالى, اتاپ ايتقاندا, ەكونوميكانىڭ 20 %-عا جۋىعى «كولەڭكەلى» بولىپ وتىر.سونىمەن قاتار, نەگىزدەلمەگەن سالىقتىق جەڭىلدىكتەردىڭ باسىم كوپشىلىگىنە تالداۋ جۇرگىزۋ قاجەت. ءتيىستى سالانى دامىتۋ ءۇشىن ولاردىڭ تيىمدىلىگىنە تالداۋ جاساۋ نەگىزىندە سالىقتىق جەڭىلدىكتەردى قايتا قاراستىرىپ, قايتا ءبولۋ جونىندەگى جۇمىستى جالعاستىرۋ تالاپ ەتىلەدى, – دەپ اتاپ ءوتتى قازاقستان پرەزيدەنتى.
نۇرسۇلتان نازارباەۆ مەملەكەتتىك قاراجاتتىڭ شىعىسىنا باقىلاۋ جاساۋعا جانە ولاردىڭ دەر كەزىندە يگەرىلۋىنە جاۋاپكەرشىلىكتىڭ قاجەتتىگىنە نازار اۋداردى.
– جالپى, بيۋدجەت پەن ەلدىڭ الەۋمەتتىك-ەكونوميكالىق دامۋىنىڭ ورتا مەرزىمدى جوسپارىن قالىپتاستىرۋ كوزقاراسىن جانە 2014-2016 جىلدارعا ارنالعان رەسپۋبليكالىق بيۋدجەت جوباسىن ماقۇلدايمىن. ەلىمىزدىڭ ىشكى جالپى ءونىمى وسەتىن بولادى – بۇل ءۇشىن بارلىق مۇمكىندىك بار. ءبىز ۇلتتىق قوردىڭ قاراجاتىن وسى ماقساتتا, ينفراقۇرىلىمدىق نىساندارعا پايدالانامىز, ول جاڭا جۇمىس ورىندارىن قۇرىپ, ەكونوميكانى, قۇرىلىس سالاسىن دامىتۋعا قوسىمشا سەرپىن بەرەدى, – دەدى مەملەكەت باسشىسى.
قازاقستان پرەزيدەنتى مەملەكەتتىك قۇرىلىمداردىڭ بارلىق شىعىسىنا جانە ولاردىڭ ءوزارا اسەرىنە تۇتاس تالداۋ جاساۋ, سونداي-اق ۇلتتىق حولدينگتەر مەن كومپانيالار ەڭبەككەرلەرىنىڭ اكىمشىلىك جانە الەۋمەتتىك-تۇرمىستىق ەڭبەك جاعدايىن جاقسارتۋعا ارنالعان شىعىستاردى وڭتايلاندىرۋ قاجەتتىگىن اتاپ ءوتتى.
– سونىمەن قاتار, مەملەكەتتىك مەنشىكتەگى, ءتيىمسىز جانە بەيىندى ەمەس مىندەت اتقاراتىن مەملەكەتتىك وبەكتىلەردى جەكەمەنشىك سەكتورعا بەرۋ جونىندەگى جۇمىستى جەدەلدەتكەن ءجون, – دەدى نۇرسۇلتان نازارباەۆ.
كەڭەس قورىتىندىسىندا مەملەكەت باسشىسى قاراستىرىلعان ءماسەلەلەر جونىندە بىرقاتار ناقتى تاپسىرمالار بەرىپ, رەسپۋبليكالىق بيۋدجەت جوباسىن ەل پارلامەنتىنىڭ قاراۋىنا ەنگىزۋدى تاپسىردى.
–––––––––––––––––
سۋرەتتەردى تۇسىرگەندەر
س.بوندارەنكو, ب.وتارباەۆ.
