قوعام • 27 ناۋرىز، 2020

اۋىلدىق اكىمدىكتەر مامانعا ءزارۋ

55 رەتكورسەتىلدى

قوستاناي وبلىسىنا قاراستى اۋىلدىق اكىمدىكتەردە 100-گە تاياۋ جۇمىس ورنى بوس تۇر. جەرگىلىكتى ءوزىن ءوزى باسقارۋ جۇيەسىنە كوشكەلى اۋىلدىق مەكەندەردە ساۋاتتى زاڭگەر، ەكونوميستەر قات. مۇنداي ماماندىقتار بويىنشا ديپلومى بار جاستار اۋىلعا بارۋعا ق ۇلىق­سىز. ويتكەنى اۋىلدىق اكىم­دىك­تە ولارعا جۇكتەلەتىن مىندەت كوپ، جالاقى تومەن. ماسەلەن، جۇ­مىسقا جاڭا تۇرعان جاس مامان ءبىر جىلعا دەيىن 60 مىڭ تەڭگەگە جەتەر-جەتپەس ەڭبەكاقى الادى. 3-4 ايدان سوڭ، جۇمىسىن تاستاپ باسقا سالاعا كەتىپ قالاتىندار دا كوپ.

قوستاناي قالاسىنىڭ تۇرعىنى كۇل­باعيلا كۇسەنوۆانىڭ كەنجەسى جوعارى وقۋ ورنىن تامامداعان سوڭ، مەڭدىقارا اۋدانى­نداعى اۋىلدىق اكىمدىكتىڭ تۇر­مىس­تىق-شارۋاشىلىق بولىمىندە ءبىر جىلداي قىزمەت ەتتى. جۇمىسى تىنىمسىز. تولىپ جاتقان ەسەپ-قيسابى، جوبا-جوسپارى تاۋسىلمايدى. بىرەۋى بىتپەي جاتىپ، ەكىنشىسى باستالادى، ايتەۋىر تاڭنىڭ اتىسىنان كۇننىڭ باتىسىنا دەيىن قاعاز تولتىرۋدان باس المادى. كوبىنە سەنبى، جەكسەنبى كۇندەرى جۇمىسقا شىعۋعا تۋرا كەلەدى. جالاقىسى – 60 مىڭ تەڭگە. بىراق ايلىعى شايلىعىنا جەتپەيدى. مۇنىڭ سىرتىندا، ەندى عانا ۋنيۆەرسيتەت بىتىرگەن جاس جىگىتكە جەرگىلىكتى حالىق­پەن ءتىل تابىسۋ قيىنعا سوقتى. انانى-مىنانى سۇراپ، ءوتىنىش-مۇقتاجىن ايتاتىن كەلىمدى-كەتىمدى كىسى كوپ. الايدا قىسقا ءجىپ كۇرمەۋگە كەلمەيدى، جۇرتتىڭ تالابىن بىردەن ورىنداپ تاستايتىن مۇمكىندىك جوق. «مەملەكەتتىڭ اقشاسىن باسىپ جەپ، تىمپيىپ تۇك بىتىرمەي وتىرسىڭدار، وڭشەڭ ارامتاماق، جەمقور، الاياق!» – دەگەندى ءجيى ەستىدى. زيالى وتباسىندا وسكەن قالا بالاسى مۇنداي قيىندىققا شىداي المادى.

 – امال جوق. قينالساڭ، جۇمىسىڭدى تاستاپ، قالاعا كەل، – دەدىم. بالام ازار دا بەزەر بولىپ كەلدى عوي. ويتكەنى اكىمدىك ءۇي بەرە المادى. بەرگەن جا­تاقحاناسىندا اس-سۋ دايىندايتىن جاعداي بولماعان سوڭ، دالادان تاماقتانىپ، تەك قونۋعا عانا بارىپ ءجۇردى. ءتىپتى بولماعان سوڭ، قوناقۇيگە كوشىپ، ايىنا 15 مىڭ تولەپ تۇردى. وندا دا جاعداي جوق. تاماقتى ساتىپ ىشەدى. بالام سول جاعىنان قينالدى. ۇلىم بويداق ەدى. ۇيلەنبەگەن بالانى اۋىلعا جىبەرىپ كەرەگى جوق ەكەن، وسىعان كوزىم جەتتى. ءوزىمىز كيىندىرىپ، ءوزىمىز اسىرادىق قوي، – دەيدى اناسى.

«قازىرگى جاستار اۋىردىڭ ۇستىمەن، جەڭىلدىڭ استىمەن جۇرۋگە ادەتتەنگەن. دايىن دۇنيەگە ۇمتىلىپ تۇرادى. قيىن­دىقتان قاشادى، باسىنا تۇسكەن بولماشى اۋىرتپالىقتى كوتەرە الماي، تەز جاسىپ قالادى»، دەپ ءوزىن ساقا سانايتىن كوپشىلىك سىرتتان تون ءپىشىپ جاتادى. الايدا اۋىل مەن قالا تىرشىلىگىنىڭ پار­قىن ايىرىپ، پايىمدى پىكىر ايتاتىن اقىلمان از. اۋىل مامانى اتقارىپ جۇرگەن جۇمىس سونشالىقتى اۋىر ما؟ باسپاناسى جايلى، تۇرمىسى كۇيلى مە؟ جاستاردىڭ اۋىلعا بارىپ مەملەكەتتىك قىزمەت سالاسىندا جۇمىس ىستەۋىنە نە كەدەرگى؟ – دەگەن ساۋالدى ارقالاپ وبلىس ورتالىعىنان 75 شاقىرىم قاشىق­تىق­تا جاتقان قوستاناي اۋدانىنا قاراس­تى نادەجدين اۋىلدىق وكرۋگىنە بار­دىق. 353 ءۇي ءتۇتىن تۇتەتىپ وتىرعان اۋىلدىق وكرۋگكە نادەجدين، مايالاپ، ۆوسكرەسەنوۆ دەپ اتالاتىن 3 ەلدى مەكەن قارايدى. مۇندا اۋىل اكىمىنەن وزگە ەكى باس مامان، ءبىر ەسەپشى جۇمىس ىس­تەيدى. شتاتتا ءبىر ورىن بوس تۇر. باس مامان­­نىڭ ءبىرى – ەلۋدى ەڭسەرىڭكىرەگەن مارينا حامانن دەگەن كىسى. اۋىل شارۋا­شى­لى­عىن قادا­عالايدى ەكەن. ودان كەيىنگىسى –  باۋىر­جان جۇماشەۆ. اۋىل شارۋاشى­لىعى­نان باسقا بارلىق سالاعا وسى جىگىت جاۋاپتى.

– 2017 جىلدان بەرى جۇمىس ىستەپ كەلەمىن. اتاۋلى الەۋمەتتىك كومەك الا­تىن­­داردىڭ ءتىزىمىن الىپ، قۇجات­تارىن رەتتەستىرۋ، بوس ەڭبەك ورىندارىن انىق­تاپ، تۇرعىنداردى جۇمىسپەن قامتۋ، س­الىق تولەمدەرىن باقىلاۋ، نەسيە، جەر قاتى­ناستارى ماسەلەلەرىنە قاتىستى مىن­­دەتتەردى اتقارامىن. جۇمىسىم جاق­سى، وزىمە ۇنايدى. بىراق ەڭبەكاقىم ازداۋ. بۇرىن قولعا 59 مىڭ تەڭگە ايلىق الا­تىن­مىن. بىلتىر جالاقىسى تومەن مەم­لەكەت­تىك قىزمەتشىلەردىڭ بار­لىعىنا بىردەي 30% قوسىلدى. قازىر قولى­ما 83 مىڭ تەڭگە تيەدى. ءۇيدى جالداپ تۇرىپ جا­تىر­مىن. زاڭ بويىنشا اكىم ءۇي تاۋىپ بەرۋ­گە مىندەتتى ەمەس، – دەدى باس مامان.

ساراپشىلاردىڭ ايتۋىنشا، اۋىل­­داعى باس مامان مەن وبلىس ورتا­لىعىنداعى باس ماماننىڭ اراسى جەر مەن كوكتەي. اۋىلدىق اكىمدىكتەگى باس ماماننىڭ اتقاراتىن مىندەتى قالا­داعىعا قاراعاندا 2-3 ەسە كوپ. قىسقاسى، ءار سالا بويىنشا جەرگىلىكتى مەكەن­دەر­دىڭ دامۋ كورسەتكىشى، ءتۇرلى سالاعا ءجيى ەنگىزىلىپ جاتقان جاڭاشىلدىقتار، ولار­­دىڭ جۇزەگە اسىرىلۋى تۋرالى مالى­­مەتتەردىڭ بارلىعىن اۋىل اكىمدىك­تەرىند­ەگى باس ماماندار جينايدى. وبلىس­تىق باسقارما ماماندارى ءبىر-اق سالاعا جاۋاپتى. ولاردىڭ ارقايسىسى اۋداننان وزدەرىنە عانا تيەسىلى سالاعا قاتىستى دايىن ماع­لۇماتتى سۇراتىپ، حاتتاپ، رەتتەپ قانا وتىرادى. باستىسى، شارۋاعا مۇقيات بولۋى كەرەك. سويتە تۇرا، ەكەۋىنىڭ ەڭبەك جالاقىسى ءار ءتۇرلى. اۋىلدىق اكىمدىك مامانى وبلىس مامانىنان 10 مىڭ تەڭگەدەي از الادى.

بۇل ماسەلەگە وبلىستاعى مۇددەلى ورگاندار دا الاڭداۋشىلىق تانىتىپ وتىر. مەملەكەتتىك ىستەر جونىندەگى دەپارتامەنت باسشىسى اسحات ەسكەندىروۆتىڭ ايتۋىنشا، وبلىس ورتالىعىنا جاقىنداۋ ورنالاسقان قوستاناي، فەدوروۆ، قارابالىق، بەيىمبەت مايلين اۋداندارىندا سالىق بازاسىن ەنگىزە الاتىن ساۋاتتى ەكونوميست، زاڭگەر، قارجىگەر ماماندار تاپشى. الايدا سوڭعى ەكى جىل ىشىندە وڭىردەگى بىرقاتار شاعىن ەلدى مەكەندەردىڭ بىرىگىپ كەتۋى كادر تاپشىلىعى مەن ماماندارعا شامادان تىس كوپ مىندەت جۇكتەۋ ماسەلەسىنىڭ ازايۋى­نا ءسال دە بولسا ىقپال ەتكەن.

– تاياۋدا دەپارتامەنت جانىنان «مەم­­­لە­كەتتىك قىزمەت» مەكتەبىن اش­تىق. قازىر جوعارى وقۋ ورىندارىنىڭ ستۋ­­دەنت­­تەرىمەن جۇمىس ىستەپ جاتىرمىز. ماعان 2-كۋرس ستۋدەنتتەرى بەكىتىلگەن. ولار­­مەن 3 مارتە كەزدەسىپ، وقۋدى بىتىر­گەن سوڭ، وزدەرىنىڭ تۋىپ-وسكەن اۋىل­دارىنا ورا­لىپ، مەملەكەتتىك قىز­مەت سالاسىن­دا ەڭبەك ەتۋ كەرەكتىگىن ءتۇسىن­دىرىپ، اشىق اڭگى­مە-سۇحبات جۇرگىز­دىم. اۋىلعا بار­عى­س­ى كەلەتىن جاستار كوپ. تەك ولار­عا قولاي­لى جاعداي جاساۋ كەرەك. مەنىڭ­شە، اۋىل­دىق اكىمدىكتەردەگى كادر تاپ­شى­لى­عىن «ديپلوممەن – اۋىلعا!» باع­دار­­لا­­ماسى ارقىلى شەشۋگە بولادى. ويت­كەنى اۋىل­دىق ەلدى مەكەندەردەگى دارىگەر، مۇ­عالىم ما­مان­داردىڭ دەنى وسى باعدار­لاما بوي­ىنشا بارعاندار»، – دەيدى  ا.ەسكەندىروۆ.

 

قوستاناي

 

سوڭعى جاڭالىقتار

الماتى: جولاۋشىلار اعىنى مەن كولىك سانى ازايدى

وڭتۇستىك قازاقستان • بۇگىن، 18:10

بەتپەردە كيگەن كوكتەم - 6

قوعام • بۇگىن، 17:09

د دارۋمەنى - ينفەكتسيالاردىڭ «جاۋى»

كوروناۆيرۋس • بۇگىن، 16:47

شىمكەنت: تسيفرلى وتباسىنىڭ ءبىر كۇنى

وڭتۇستىك قازاقستان • بۇگىن، 15:58

ازيانىڭ احۋالى قانداي بولماق

ەكونوميكا • بۇگىن، 15:23

ولار ءۇي بەتىن كورمەي كۇرەسۋدە

ايماقتار • بۇگىن، 14:42

ۇقساس جاڭالىقتار