ايماقتار • 26 ناۋرىز، 2020

ماڭعىستاۋعا كەلگەن ازاماتتار تەكسەرىلۋدە

212 رەت كورسەتىلدى

26 ناۋرىز كۇنگى جاعداي بويىنشا ماڭعىستاۋ وبلىسىندا كوروناۆيرۋس ينفەكتسياسىن جۇقتىرعاندار تىركەلگەن جوق. بۇل تۋرالى وبلىستىق دەنساۋلىق ساقتاۋ باسقارماسىنىڭ باسشىسى ءانۋار ساعىمباەۆ مالىمدەدى.

قازىر ايماقتا ىندەتتىڭ الدىن الۋ ماقساتىندا كەشەندى شارالار جاسالىپ جاتىر. 70 توسەك ينفەكتسيالىق اۋرۋلاردى قابىلداۋعا، 280 توسەك پروۆيزورلىق تەكسەرۋ جاساۋ ءۇشىن، 600-گە جۋىق توسەك كارانتينگە جاتقىزۋعا دايىن. بۇگىنگى كۇنى 100-گە جۋىق ادام اۋرۋحانالاردا كارانتيندە جاتىر. 400-دەي تۇرعىن تەكسەرىلىپ، كارانتيننەن شىقتى. كەشە تۇندە 70-كە جۋىق قر ازاماتى ىستامبۇلدان اقتاۋعا ۇشىپ كەلدى. «تاجەن» شەكارالىق باقىلاۋ بەكەتى ارقىلى وزبەكستاننان 14 ماڭعىستاۋ وبلىسىنىڭ تۇرعىنى كەلدى. بارلىعى تەكسەرىلىپ، ارنايى كولىكتەرمەن اقتاۋعا جەتكىزىلىپ، كارانتينگە جاتقىزىلدى. ساراپتاما قورىتىندىسى تەرىس ناتيجە بەرگەن جاعدايدا ۇيلەرىنە كارانتينگە جىبەرىلەدى.

ايتا كەتەيىك، 24 ناۋرىز كۇنى قاراعاندى قالاسىنا ۆارشاۆا قالاسىنان ستۋدەنتتەر كەلگەن بولاتىن.  ولاردىڭ 6-ى ماڭعىستاۋ وبلىسىنان. قاراعاندىعا كەلگەن بويدا ۆيرۋسقا تەكسەرۋدەن ءوتىپ، تەرىس ناتيجەلى جاۋاپ الدى. بۇگىن اقتاۋعا جەتكەن ستۋدەنتتەر قايتا تەكسەرۋدەن ءوتىپ، ۇيلەرىنە جىبەرىلدى. 14 كۇن ۇيلەرىندە كارانتيندە جاتادى. ستۋدەنتتەردەن سىرتقا شىقپاۋعا قولحات الىندى.

ايماققا كەلگەن كەز-كەلگەن تۇرعىن اۋەجايدا، تەمىرجول ۆوكزالدارىندا، اۆتوجولدارعا قويىلعان بەكەتتەردە مەديتسينالىق تەكسەرۋدەن ءوتىپ، دەنە قىزۋى ولشەنەدى.

ءار ايماقتا ادام اعزاسىنان Covid-19 ينفەكتسياسىن انىقتايتىن ۆيرۋسولوگيالىق زەرتحانا بار. وبلىستا ساراپتاما جاسايتىن قۇرالدار جەتكىلىكتى مولشەردە. بارلىعى تەگىن جاسالادى.

مەديتسينا قىزمەتكەرلەرى كۇشەيتىلگەن رەجيمدە جۇمىس ىستەۋدە. دارىگەرلەر ەگەر قىزۋى كوتەرىلىپ، ءوزىن جايسىز سەزىنگەن تۇرعىن بولسا، بىردەن جەرگىلىكتى ەمحاناعا نەمەسە CALL-ورتالىقتارعا تەلەفون شالۋى قاجەتتىگىن ايتادى. ۋچاسكەلىك دارىگەردىڭ كەڭەسىنەن سوڭ، قاجەت بولعان جاعدايدا جەدەل-جاردەم جىبەرىلەدى. ەمحاناعا نەمەسە اۋرۋحاناعا بارۋدىڭ قاجەتى جوق.

دارىگەرلەر ساقتىق شارالارىن قاتاڭ ساقتاۋدى، جەكە باس گيگيەناسىن ساقتاپ، كوپشىلىك جينالاتىن جەرلەرگە بارماۋدى، قاجەت بولماسا ۇيدەن شىقپاۋدى ەسكەرتەدى.

ماڭعىستاۋ وبلىسى

سوڭعى جاڭالىقتار

ۇقساس جاڭالىقتار