رەسەيدەن كەلەتىن يمپورت بەنزين شەكتەلدى

قازاقستان • 26 ناۋرىز، 2020

رەسەيدەن كەلەتىن يمپورت جانارمايعا شەكتەۋ ەنگىزىلدى

وسىعان دەيىن «قازاقستان قاجەتتى جانارمايمەن ءوزىن قامتاماسىز ەتە الادى» دەگەن پىكىردىڭ ءباسى باسىم بولىپ كەلگەن. ۇكىمەتتىڭ ەكونوميكالىق بلوگى بۇل پىكىردى «ب پلان» جاعدايىندا قولداناتىنىن ەندى دالەلدەدى.

گۇلبارشىن ايتجانبايقىزى

«قازاقستان رەسەيدەن بەنزين، ديزەل وتىنى مەن اۆياكەروسيننىڭ يمپورتىنا ءۇش ايلىق تىيىم سالۋدى جوسپارلاپ وتىر، ءتيىستى جوبا قازىر مەملەكەتتىك ورگانداردا ماقۇلدانۋدا» دەپ حابارلادى بۇگىن ەنەرگەتيكا مينيسترلىگىنىڭ ءباسپاسوز قىزمەتى.

«الەمنىڭ كوپتەگەن بولىگىنە تارالعان كوروناۆيرۋستىڭ ءورشۋى ەنەرگيا شىعىنىن ەداۋىر تومەندەتۋگە اكەلدى» دەپ اتاپ ءوتتى ەنەرگەتيكا مينيسترلىگى.

ءباسپاسوز قىزمەتىنىڭ اقپاراتىنا سايكەس، قازاقستانعا جەتكىزىلەتىن رەسەيلىك مۇناي ونىمدەرىنىڭ كولەمى قازاقستاننىڭ مۇناي وڭدەۋ زاۋىتتارىنىڭ تۇراقتى جۇمىسىنا ايتارلىقتاي اسەر ەتۋى مۇمكىن. ناتيجەسىندە، مۇنايدى قايتا وڭدەۋدىڭ تومەندەۋى جانە مۇناي ونىمدەرىنىڭ باسقا تۇرلەرىنىڭ جەتىسپەۋشىلىگىنە اكەلەدى.

«توتەنشە جاعدايدىڭ ەنگىزىلۋىنە بايلانىستى ەكونوميكانىڭ بارلىق سالاسىندا مۇناي ونىمدەرىن تۇتىنۋدىڭ تومەندەۋى بايقالا باستادى. سونداي-اق قازاقستاندىق مۇناي وڭدەۋ زاۋىتىنىڭ جابىلۋعا جول بەرمەۋ ءۇشىن مينيسترلىك «قازاقستان رەسپۋبليكاسىنا مۇناي ونىمدەرىن جەتكىزۋدىڭ كەيبىر ماسەلەلەرى تۋرالى» بۇيرىق جوباسىن ازىرلەدى، ونىڭ اياسىندا ىشكى نارىققا بەنزين، ديزەل وتىنى مەن اۆياتسيالىق وتىن اكەلۋگە ۋاقىتشا تىيىم سالىندى. بۇل شەشىم قازاقستان رەسپۋبليكاسىنىڭ ىشكى نارىعىن قورعاۋ ءۇشىن قابىلداندى »، دەپ اتاپ ءوتتى ەنەرگەتيكا مينيسترلىگى.
بۇل شەشىم قازاقستاندىق مۇناي وڭدەۋ زاۋىتتارىنىڭ قايتا وڭدەۋ قۋاتتىلىعىنىڭ تومەندەۋىنە جول بەرمەيدى. ءموز-دەگى جۇمىس ورىندارىنىڭ قىسقارۋىنىڭ الدىن الادى.

كارانتين جاعدايىندا مۇناي ونىمدەرىن تۇتىنۋ ەداۋىر تومەندەدى جانە قازاقستان ءوزىن قاجەتتى جانارمايمەن قامتاماسىز ەتە الادى.

«بۇل شارا مۇناي ونىمدەرىنىڭ باعاسىنا ەشقانداي اسەر ەتپەيدى» دەپ سەندىردى ەنەرگەتيكا مينيسترلىگى.