ايماقتار • 26 ناۋرىز، 2020

شىمكەنت قالاسىنىڭ اكىمى مۇرات ايتەنوۆ ارنايى مالىمدەمە جاسادى

565 رەتكورسەتىلدى

بۇگىننەن باستاپ شىمكەنت قالاسىنداعى بارلىق بالاباقشالاردىڭ جۇمىسى توقتاتىلادى. شىمكەنت قالاسىنداعى وزگە دە قاۋىپسىزدىك شارالارى تۋرالى قالا اكىمى مۇرات ايتەنوۆ مالىمدەمە جاسادى. 

«قۇرمەتتى شىمكەنت قالاسىنىڭ تۇرعىندارى! بارشاڭىزعا بەلگىلى اعىمداعى جىلدىڭ 16 ناۋرىزىندا قازاقستان رەسپۋبليكاسى پرەزيدەنتى قاسىم-جومارت توقاەۆ ەل اۋماعىندا توتەنشە جاعداي جاريالادى. سول ۋاقىتتان باستاپ دەنساۋلىق ساقتاۋ مينيسترلىگى كوروناۆيرۋستىڭ تارالۋىن الدىن الۋعا سايكەس بەكىتىلگەن الگوريتمدەر بويىنشا جۇمىس ىستەپ جاتىر. وكىنىشكە وراي، قالامىزدا كوروناۆيرۋس ىندەتىن جۇقتىرعان 2 ازامات تىركەلدى. قازىرگى ۋاقىتتا ولار شىمكەنت قالاسىنىڭ جۇقپالى اۋرۋلار ەمحاناسىندا وقشاۋلانىپ، ەم قابىلداۋدا. جاعدايلارى تۇراقتى. ءبىرىنشى ناۋقاس 18 ناۋرىز كۇنى ساعات 17:30-دا نۇر-سۇلتان قالاسىنان «نۇر-سۇلتان – جەتىساي» باعىتىمەن جۇرەتىن 51 ادام مىنگەن اۆتوبۋسپەن كەلگەن. 20 ناۋرىز ساعات 23:30-دا ءتورت ازامات شىمكەنت قالاسىنا «بەكجان» اۆتوۆوكزالىنان ءتۇسىپ، ۇشەۋى تۇركىستان قالاسىنا بەت العان. ال بىرەۋىن اكەسى ءوز كولىگىمەن ۇيىنە جەتكىزگەن. قالعان 47 ازامات جەتىساي باعىتىنا سول اۆتوبۋسپەن ساپارىن جالعاستىرعان. ال جامان ىندەتتى جۇقتىرعان ازامات 23 ناۋرىزعا دەيىن ۇيىندە ءوز بەتىنشە ەم قابىلداعان. اۋرۋى اسقىنعان سوڭ جوعارى تەمپەراتۋرامەن جەرگىلىكتى امبۋلاتورياعا شاعىمدانعان. ناتيجەسىندە وسى ازامات وتباسىمەن ستاتسيونارلىق باقىلاۋعا الىندى. بۇگىندە اتالعان ازاماتتىڭ اناسىنان تەست الىنىپ، ناتيجەسى وڭ بولدى. شۇعىل تۇردە ناۋقاستارمەن قاتىناستا بولعان ەكى مەديتسينا قىزمەتكەرى وتباسىلارىمەن جانە بەس پوتەنتسيالدى قاتىناستاعى ازاماتتار وقشاۋلانىپ، جۇقپالى اۋرۋلار اۋرۋحاناسىنا جاتقىزىلدى. بۇگىنگى تاڭدا نۇر-سۇلتان، شىمكەنت، تۇركىستان قالالارىنداعى اتالعان ازاماتپەن بايلانىستا بولعان بارلىق ادامدار وقشاۋلانۋعا الىندى. قازىرگى تاڭدا ىندەتتىڭ الدىن الۋ ماقساتىندا شىمكەنت قالاسىندا ۇزدىكسىز جۇمىستار جۇرگىزىلىپ جاتىر. قاۋىپسىزدىك شارالارىنىڭ نەگىزگى باعىتتارىنا توقتالىپ وتسەم:

بىرىنشىدەن، قالاعا كىرەتىن ازاماتتاردىڭ دەنساۋلىعىن تەكسەرۋدەن وتكىزىپ، قاۋىپسىزدىكتى قامتاماسىز ەتۋ ماقساتىندا كىرە-بەرىس جول قاقپالارعا 12 سانيتارلىق بەكەتتەر قويىلدى. بۇعان دەيىن تەمىرجول ۆوكزالى مەن اۋەجاي دا سانيتارلىق باقىلاۋعا الىنعان. ەكىنشىدەن، قالاداعى بازارلاردا، ساۋدا ورىندارىندا، اۆتوبۋستاردا، قوعامدىق ورىنداردا جانە باسقا دا ادامدار كوپ شوعىرلاناتىن جەرلەردە دەزينفەكتسيالىق جۇمىستار كۇنىنە 2 رەت جۇرگىزىلۋدە. ۇشىنشىدەن، بارلىق قوعامدىق ورىندارعا بەتپەردەمەن كىرۋ مىندەتتەلدى. بەتپەردەمەن قامتاماسىز ەتۋ ءۇشىن جەرگىلىكتى كاسىپكەرلەرمەن بىرگە كۇنىنە 100 مىڭنان استام مەديتسينالىق بەتپەردەلەر تىگىلىپ، قالا اۋماعىنداعى بازارلار مەن دارىحانالارعا جەتكىزىلۋدە. سونىمەن قاتار انتيسەپتيك ونىمدەرىن شىعاراتىن ورداباسى يندۋستريالدىق اۋماعىنداعى كاسىپورىن كۇنىنە 400 توننا زالالسىزداندىرۋ ونىمدەرىن شىعارۋدا. تورتىنشىدەن، قاۋىپسىزدىك ماقساتىندا قالا اۋماعىنداعى وقۋ ورىندارىنىڭ بارلىعى دەمالىسقا شىعىپ، قاشىقتان وقىتۋ جۇيەسىمەن جۇمىس ىستەيدى. ال 26 ناۋرىزدان باستاپ بالاباقشالاردىڭ بارلىعى جۇمىسىن توقتاتاتىن بولادى. سونىمەن قاتار، قالاداعى تويحانالار، ويىن-ساۋىق ورىندارى تولىعىمەن توقتاتىلىپ، ساۋدا ورتالىعى مەن مەيرامحانالاردىڭ جۇمىس ۋاقىتتارى شەكتەلدى. بەسىنشىدەن، شىمكەنت قالاسى اكىمدىگى تاراپىنان الەۋمەتتىك ماڭىزى بار تاۋارلاردىڭ باعاسىن تۇراقتى ۇستاپ تۇرۋ بويىنشا ارنايى شتاب قۇرىلىپ، ازىق-ت ۇلىكتىڭ باعالارىنا كۇندەلىكتى مونيتورينگ جۇرگىزىلۋدە. بۇگىنگى تاڭدا اسا قاجەتتى 19 ازىق-ت ۇلىك ءتۇرىنىڭ باعاسىن تۇراقتى ۇستاپ تۇرۋ ءۇشىن 3 ملرد تەڭگەگە جۋىق قارجى قارالدى. شىمكەنتتە ازىق-ت ۇلىك قورى جەتكىلىكتى، باعا باقىلداۋدا. سوندىقتان الاڭداۋعا ەش نەگىز جوق. التىنشىدان، 15 ناۋرىزدان باستاپ شىمكەنت قالاارالىق اۆتوبۋستار ۆوكزالىنان جۇرەتىن حالىقارالىق جانە 22 ناۋرىزدان جۇرەتىن نۇر-سۇلتان مەن الماتى باعىتتارى شەكتەلدى. بۇگىننەن باستاپ اۆتوبەكەتتەردىڭ جۇمىسى تولىعىمەن توقتاتىلدى. تج جاريالانۋىنا بايلانىستى بۇگىنگى كۇندە قوعامدىق كولىكتەر باعىتىنىڭ 25 پايىزى ۋاقىتشا قىسقارتىلدى. جەتىنشىدەن، قالا اۋماعىنداعى كوروناۆيرۋس ينفەكتسيانىڭ جاپپاي تارالۋ قاۋپى انىقتالعان جاعدايدا ارەكەت ەتۋدىڭ الگوريتمى جاسالىنىپ، اۋرۋلار جاتقىزىلاتىن 170 ورىندىق ينفەكتسيالىق ستاتسيونار قۇرىلدى. بۇدان باسقا 680 ورىندىق پروۆيزورلى جانە 1500-گە جۋىق كارانتيندىك ستاتسيونار دايىندالدى. بۇگىنگى تاڭدا مەديتسينالىق قىزمەتكەرلەر جۇمىسىنا قاجەتتى قۇرال-جابدىقتار مەن دارىلەر تولىعىمەن جەتكىلىكتى. قاجەتتىلىك بولعان جاعدايدا بۇدان باسقا دا بەكىتىلگەن الگوريتم بويىنشا جۇمىستار جۇرگىزىلەتىن بولادى. بۇگىنگى تاڭدا قالانى تولىق كارانتينگە جابۋعا نەگىز جوق. ماسەلە مەنىڭ جەكە باقىلاۋىمدا. قالا تۇرعىندارىن اقپاراتپەن قامتاماسىز ەتۋ ماقساتىندا بايلانىس ورتالىعى قۇرىلدى. قازىرگى تاڭدا قالا تۇرعىندارى دەنساۋلىق ساقتاۋ مينيسترلىگى ۇسىنعان پروفيلاكتيكالىق شارالارىن قاتاڭ قولدانۋىمىز قاجەت. توتەنشە جاعدايدا ءاربىر تۇرعىن قاۋىپسىزدىگى ماڭىزدى. سوندىقتان ءبارىمىز ارنايى تالاپتاردى ساقتاۋعا مىندەتتىمىز.

قۇرمەتتى جەرلەستەر! تج كەزەڭىندە بارلىق ساقتىق شارالارىن قولدانىپ، وزدەرىڭىزدىڭ جانە جاقىندارىڭىزدىڭ قاۋىپسىزدىگى ءۇشىن ۇيلەرىڭىزدە بولۋىڭىزدى سۇرايمىن. بارلىق جاعدايلارعا تۇسىنىستىكپەن قاراۋلارىڭىزدى وتىنەمىن»، دەدى شىمكەنت قالاسىنىڭ اكىمى مۇرات ايتەنوۆ. 

سوڭعى جاڭالىقتار

ىستىق تاماق تاراتتى

قازاقستان • كەشە

ۇقساس جاڭالىقتار