قامقورشىلار كەڭەسىنىڭ قۇرامى جاريالاندى

ساياسات • 26 ناۋرىز، 2020

قامقورشىلار كەڭەسىنىڭ قۇرامى جاريالاندى

43 رەت كورسەتىلدى

ەلوردادا كوروناۆيرۋسپەن كۇرەس جاعدايىندا حالىقتىڭ مۇقتاج توبىنا قولداۋ كورسەتۋ ماقساتىندا ەلباسى نۇرسۇلتان نازارباەۆتىڭ باستاماسىمەن قۇرىلعان «Birgemiz» قوعامدىق قورىنىڭ قامقورشىلار كەڭەسىنىڭ العاشقى وتىرىسى ءوتتى.

سۇڭعات ءالىپباي

جيىن بارىسىندا قوردىڭ قامقورشىلار كەڭەسىنىڭ قۇرامى جاريالاندى. وعان بەلگىلى قوعام جانە مەملەكەت قايراتكەرلەرى، ازاماتتىق قوعام وكىلدەرى مەن جاستار كىردى.

قور قۇرىلتايشىلارى جينالىسىنىڭ شەشىمى بويىنشا قامقورشىلار كەڭەسىنىڭ قۇرامىنا: كەڭەس توراعاسى – Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك، كەڭەس توراعاسى ورىنباسارى – تۇڭعىش پرەزيدەنت قورىنىڭ اتقارۋشى ديرەكتورى قانات جۇماباەۆ، قامقورشىلار كەڭەسىنىڭ حاتشىسى – جۋرناليست، «باس رەداكتورلار كلۋبىنىڭ» پرەزيدەنتى بيبىگۇل جەكسەنباي، كەڭەس مۇشەلەرى – پارلامەنت سەناتىنىڭ دەپۋتاتتارى نۇرتورە ءجۇسىپ پەن ولگا پەرەپەچينا، پارلامەنت ءماجىلىسىنىڭ دەپۋتاتتارى نۇرلان ءابدىروۆ پەن باقتىقوجا ىزمۇحامبەتوۆ، «ۆولونتەرلەر ليگاسى» قوعامدىق قورىنىڭ ءتورايىمى ايسۇلۋ ەرنيازوۆا، «ۇلتتىق ۆولونتەرلەر جەلىسى» زاڭدى تۇلعالار بىرلەستىگىنىڭ ءتورايىمى ۆەرا كيم، «مير چەرەز دۋحوۆنوست» قوعامدىق بىرلەستىگىنىڭ ءتورايىمى ساۋلە مۇقاشوۆا، «ۇلتتىق عىلىمي كارديوحيرۋرگيا ورتالىعى» اق باسقارما توراعاسى يۋري پيا جانە «Altyn Kyran» حالىقارالىق قايىرىمدىلىق قورىنىڭ پرەزيدەنتى يسلامبەك سالجانوۆ كىردى.

قوردىڭ جوعارى باسقارۋ ورگانى – قۇرىلتايشىلاردىڭ جالپى جينالىسىنىڭ توراعاسى پرەمەر-ءمينيستردىڭ ورىنباسارى ەرالى توعجانوۆ بولدى.

«Birgemiz» قورىنىڭ باسقارما توراعاسى رۋسلان ساكەەۆ قورعا Nur Otan پارتياسىنىڭ جان-جاقتى كومەگى قاجەت ەكەنىن اتاپ كورسەتتى. ويتكەنى قوعامدىق بىرلەستىكتىڭ ءاربىر وڭىردە فيليالى جۇمىس ىستەيدى، قاجەتتى ماتەريالدىق-تەحنيكالىق بازاعا يە جانە Jas Otan جاستار قاناتىنىڭ كەڭ اۋقىمدى ۆولونتەرلەر جەلىسى بار.

ء«بىرىنشى وتىرىستى ءبىز Nur Otan پارتياسىنىڭ قابىرعاسىندا وتكىزىپ وتىرمىز، ويتكەنى ونىڭ مۇمكىندىكتەرىنە سۇيەنگىمىز كەلەدى. ەلباسىنىڭ قولداۋىمەن قورعا قاراجات ءتۇسىپ جاتىر، ال حالىقتىڭ اۋقىمدى بولىگىمەن ءتيىمدى جۇمىس جۇرگىزۋ ءۇشىن بىزگە ينفراقۇرىلىم، زور ۇيىمداستىرۋ تاجىريبەسى جانە ادامدار قاجەت. بۇل اتالعانداردىڭ باسىم بولىگى بۇگىندە تەك پارتيادا عانا بار»، دەپ اتاپ ءوتتى ر.ساكەەۆ.

جاڭادان قۇرىلعان قوعامدىق قورعا ەلدىڭ ءىرى بيزنەس وكىلدەرىنەن 40 ملن دوللاردان استام قاراجات جينالدى. بۇل قاراجات قامقورشىلار كەڭەسىنىڭ شەشىمىمەن حالىقتىڭ الەۋمەتتىك وسال توپتارىنا اتاۋلى كومەك كورسەتۋگە باعىتتالاتىن بولادى. قازىر كومەك تۇرلەرى مەن ونى الۋشىلار ساناتتارىن انىقتاۋ بويىنشا جۇمىس باستالدى.

ءوز كەزەگىندە ب.بايبەك قامقورشىلار كەڭەسى اتىنان ەلباسى ۇندەۋىنە قولداۋ كورسەتكەن بيزنەسمەندەرگە العىس ايتىپ، قازاقستاندىقتاردىڭ بىرلەسە وتىرىپ كەز كەلگەن داعدارىستى ەڭسەرەتىنىنە سەنىمدىلىگىن ءبىلدىردى.

«ەلباسى، Nur Otan توراعاسى نۇرسۇلتان نازارباەۆتىڭ تاپسىرماسى بويىنشا ءبىز ءوزىمىزدىڭ بارلىق ۇيىمدىق جانە مەديا رەسۋرستارىمىزدى قوردىڭ ءتيىمدى جۇمىس ىستەۋى ءۇشىن اقىسىز نەگىزدە ۇسىنامىز»، دەدى ب.بايبەك.

مەملەكەت باسشىسى قاسىم-جومارت توقاەۆ جاريالاعان ء«بىز بىرگەمىز!» جالپى رەسپۋبليكالىق اكتسياسى اياسىندا «كەدەرگىسىز كەلەشەك»، «باقىتتى وتباسى» جانە «ارداگەرلەردى ارداقتايىق» پارتيالىق جوبالارى جەلىسى بويىنشا حالىقتىڭ ءارتۇرلى توپتارىنا الەۋمەتتىك كومەك كورسەتۋ قور قۇرىلعانعا دەيىن باستالىپ كەتكەنىن اتاپ وتكەن ءجون.

ەلباسىنىڭ تاپسىرماسى بويىنشا Nur Otan پارتياسى كارانتين جاريالانعان نۇر-سۇلتان جانە الماتى قالالارىنداعى جالعىز باستى قارتتارعا، مۇگەدەكتەرگە جانە تۇرمىسى تومەن كوپ بالالى وتباسىلارعا اتاۋلى كومەك كورسەتۋ ءۇشىن 150 ملن تەڭگە ءبولدى. كوروناۆيرۋس ىندەتىنىڭ تارالۋىنا قارسى كۇرەسكە ەلباسىنىڭ شەشىمىمەن تۇڭعىش پرەزيدەنت قورى تاعى دا 200 ملن تەڭگە باعىتتادى.

بۇگىندە Jas Otan ۆولونتەرلەرى مەن پارتيا بەلسەندىلەرى حالىقتىڭ الەۋمەتتىك وسال ساناتتارىن انتيسەپتيك جانە گيگيەنا قۇرالدارىمەن، ءبىرىنشى كەزەكتەگى قاجەتتى تاۋارلارمەن قامتاماسىز ەتۋدە. تەك سوڭعى ءتورت كۇندە بۇكىل ەل كولەمىندە 7 مىڭعا جۋىق وتباسىنا 130 ملن تەڭگە سوماعا الەۋمەتتىك كومەك كورسەتىلدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز