«ۆۋەلتا» كوپكۇندىگىنىڭ ءبىرىنشى كەزەڭى «استانا» ۆەلوسيپەدشىلەرىنىڭ جەڭىسىمەن اشىلدى
«استانا» ۆەلوكومانداسى يسپانيادا باستالعان ايگىلى «ۆۋەلتا» كوپكۇندىگىنىڭ ءبىرىنشى كەزەڭىندەگى جەكە كوماندالىق جارىستا جەڭىسكە جەتتى. ءبىزدىڭ جەرلەستەرىمىز ۆيليانۋەۆا-دە-اروسا-سانحەنحو قالالارى ارالىعىنداعى 27 شاقىرىمنان تۇراتىن بۇل قاشىقتىقتى 29 مينۋت 59 سەكۋندتا ءجۇرىپ ءوتتى. وسىلايشا جارتى ساعاتقا جەتپەيتىن مەرزىمدە كومبەگە ءبىرىنشى بولىپ كەلگەن استانالىقتار الاماندى تابىستى باستادى. ەكىنشى ورىنعا «RadioShack-Leopard», ءۇشىنشى ورىنعا «Omega Pharma-Quick-Step» كوماندالارى جايعاستى.
«ۆۋەلتا» كوپكۇندىگىنىڭ ءبىرىنشى كەزەڭى «استانا» ۆەلوسيپەدشىلەرىنىڭ جەڭىسىمەن اشىلدى
«استانا» ۆەلوكومانداسى يسپانيادا باستالعان ايگىلى «ۆۋەلتا» كوپكۇندىگىنىڭ ءبىرىنشى كەزەڭىندەگى جەكە كوماندالىق جارىستا جەڭىسكە جەتتى. ءبىزدىڭ جەرلەستەرىمىز ۆيليانۋەۆا-دە-اروسا-سانحەنحو قالالارى ارالىعىنداعى 27 شاقىرىمنان تۇراتىن بۇل قاشىقتىقتى 29 مينۋت 59 سەكۋندتا ءجۇرىپ ءوتتى. وسىلايشا جارتى ساعاتقا جەتپەيتىن مەرزىمدە كومبەگە ءبىرىنشى بولىپ كەلگەن استانالىقتار الاماندى تابىستى باستادى. ەكىنشى ورىنعا «RadioShack-Leopard», ءۇشىنشى ورىنعا «Omega Pharma-Quick-Step» كوماندالارى جايعاستى.
كوپكۇندىكتىڭ ءبىرىنشى كەزەڭىندەگى بۇل جەڭىستى «استانا» كومانداسىنا ونىڭ يانەس برايكوۆيچ (سلوۆەنيا), ۆينچەنتسو نيبالي, پاولو تيرالونگو (ەكەۋى دە – يتاليا), ياكوب فۋلسان (دانيا), اندرەي گريۆكو (ۋكراينا) جانە تانەل كانگەرت (ەستونيا) سىندى ۆەلوشاباندوزدارى الىپ بەردى.
ال بۇرناعى كۇنى ەكىنشى كەزەڭ مارەگە جەتتى. ول پونتەۆەدرا – التو دو مونتە دا گروبا ەلدى مەكەندەرىنىڭ اراسىن جالعادى. ۇزىندىعى 177,7 شاقىرىمعا سوزىلعان قاشىقتىقتا ليۋكسەمبۋرگتىڭ «Saxo-Tinkoff» كومانداسىنداعى يرلاند جۇيرىگى نيكولاس روچ توپ جاردى. الايدا, ەكى كۇننىڭ قورىتىندىسى بويىنشا «استانا» كومانداسىنىڭ ءمۇشەسى ۆينتسەنتسو نيبالي 5:05:22 كورسەتكىشىمەن ءبىرىنشى ورىنعا شىقتى.
ەندى مىناداي انىقتاما بەرە كەتەيىك. يسپانيا «ۆۋەلتاسى» (يسپانشا اتاۋى -Vuelta a España) – الەمدەگى «تۋر دە فرانس» جانە «دجيرو د’يتاليا» كوپكۇندىك تۋرنيرلەرىمەن بىرگە العاشقى ۇشتىكتى قۇرايتىن, ءۇش اپتاعا سوزىلاتىن تاس جول بويىنداعى اسا تانىمال ۆەلوجارىس. ول جىل سايىن (1995 جىلدان بەرى) كۇزگە سالىم يسپانيا ەلىنىڭ اۋماعىندا سورەدەن شىعادى. ونىڭ العاشقى جارىسى 1935 جىلى تىركەلگەن. تاعى ەكى دوداسى ەۋروپانىڭ ءوزگە ەلدەرىنىڭ تەرريتورياسىندا ۇيىمداستىرىلدى. ول 1997 جىلى پورتۋگاليا, 2009 جىلى نيدەرلاندى مەن بەلگيا تراسسالارىندا كەرۋەن ءتۇزدى. بۇلاردىڭ 2006 جىلى وتكەن تۋرنيرىندە ءبىزدىڭ الەكساندر ۆينوكۋروۆ قورىتىندى ەسەپتە ءبىرىنشى ورىندى جەڭىپ العان بولاتىن.
ال بيىل 24 تامىزدا 68-ءشى ءمارتە سورەدەن شىققان الامان ءۇش ەل – يسپانيانىڭ, فرانتسيانىڭ جانە اندوررانىڭ جەرلەرىن باسىپ وتەدى.
دامير قوجامقۇل.
