وتكەن اپتادا الەمنىڭ بىرنەشە مەملەكەتى ۆيرۋسقا قارسى ۆاكتسينا دايىن ەكەنىن, ەندى ونى تەك سىناقتان وتكىزۋ عانا قالعانىن جاريالادى.
كوروناۆيرۋستىڭ جاڭا تۇرىنە قارسى ۆاكتسينانى العاشقىلاردىڭ ءبىرى بولىپ امەريكانىڭ Moderna كومپانياسى كلينيكالىق سىناقتان وتكىزە باستادى. ولار سىناق جۇرگىزۋگە ءوز ەركىمەن كەلىسكەن 18 بەن 45 جاس ارالىعىنداعى 45 ازاماتقا جاڭا ۆاكتسينانى ەككەن. بۇل ۆاكتسينانىڭ ەرەكشەلىگى – ونىڭ قۇرامىندا ۆيرۋس قوزدىرعىشى جوق, تەك گەنەتيكالىق كودى عانا بار.
ال ەۋروپادا ۆاكتسينا جاساۋ جاعىنان «باسەكەگە ءتۇسىپ» جاتقان ەكى نەمىس كومپانياسى بار. ولاردىڭ ۆاكتسيناسى اۋرۋدى اسقىندىراتىن اقۋىزدىڭ جۇمىسىن جويۋمەن ەرەكشەلەنەدى. بۇل زەرتتەۋ ورتالىقتارى سىناق مەرزىمىن بيىلعى جازعا قالدىرىپ وتىر.
ەپيدەميانىڭ العاشقى وشاعى – قىتاي دا كوروناۆيرۋسقا قارسى ۆاكتسينا جاساپ شىعارعانىن, كوپ ۇزاماي ونىڭ قالاي اسەر ەتەتىنىن تەكسەرە باستايتىنىن جاريالادى.
ۇلىبريتانيا بولسا, ۆيرۋسقا قارسى شىعارعان ۆاكتسينانى كەلەسى ايدان-اق سىناقتان وتكىزە باستايتىنىن مالىمدەدى.
رەسەي دە ەۋروپالىق ارىپتەستەرىنەن قالىسپاي, 20 ناۋرىز كۇنى نوۆوسىبىرلىك «ۆەكتور» ۆيرۋسولوگيا زەرتتەۋ ورتالىعى ىندەتكە قارسى ۆاكتسينانى سىناققا دەيىنگى تەكسەرۋ تەستتەرىن باستاعانىن جەتكىزدى. ىلە-شالا قازاقستاننىڭ دا ۆيرۋسقا قارسى ەكپە ازىرلەي باستاعانى بەلگىلى بولدى.
كىم قاي كەزدە ۆاكتسيناسىن سىناقتان وتكىزسە دە دۇنيەجۇزىلىك دەنساۋلىق ساقتاۋ ۇيىمى كەمى 1,5 جىلسىز قولعا ۆاكتسينا تيمەيتىنىن مالىمدەدى. سەبەبى, ادامنىڭ يممۋنيتەتىنە سالىناتىن ەكپە كوپ سۇرىپتاۋدى قاجەت ەتەدى. ونىڭ پايداسى مەن زيانى تارازىعا تارتىلىپ, ابدەن ەلەكتەن ءوتىپ, قاۋىپسىزدىگى دالەلدەنگەننەن كەيىن عانا ادامزاتقا جول تارتادى.
قىمبات توقتامۇرات
