قاراعاندىنىڭ «شاحتەر» فۋتبول كومانداسىنىڭ باس جاتتىقتىرۋشىسى ۆيكتور كۋمىكوۆ كەشە, 24 تامىز كۇنى قازاقستان پرەمەر-ليگاسىنداعى كەزەكتى تۋردان كەيىن «Sports.kz» پورتالى ءتىلشىسىنىڭ سۇراقتارىنا جاۋاپ بەردى. اڭگىمە كەنشىلەر كومانداسىنىڭ 28 تامىز كۇنى شوتلانديانىڭ ورتالىعى – گلازگو قالاسىندا جەرگىلىكتى «سەلتيكپەن» وتەتىن چەمپيوندار ليگاسى ءتورتىنشى راۋندىنىڭ قارىمتا ماتچى توڭىرەگىندە ءوربىدى.
-ۆيكتور باليۋتوۆيچ, چەمپيوندار ليگاسى ويىندارىنان كەيىن كوماندانى قازاقستان چەمپيوناتىنا قايتا بەيىمدەۋ قيىنعا سوعا ما؟
-مۇمكىندىگى كەلگەنىنشە بەيىمدەۋگە تىرىسامىز, بىراق ونىڭ ناتيجەسى قانداي – بۇل ەندى وزىنشە ماسەلە. باسىمىزدا «سەلتيككە» قارسى ويىن تۇرعاندا, ويىنشىلاردى مۇنداعى ويىنعا قايراپ سالۋ وتە كۇردەلى نارسە ەكەن. جاسىراتىنى جوق, جەڭىستى جولدى ودان ءارى دە جالعاستىرعىمىز كەلەدى. قازىر ءبىزدىڭ بارلىق اقىل-ويىمىز «سەلتيكپەن» وتەتىن جاۋاپتى ويىندا تۇر.
-«ەرتىسپەن» بولعان ويىننىڭ ناتيجەسىنە كوڭىلىڭىز تولا ما؟
-ارينە, جوق. ءبىز ونى ارالاس قۇرامنىڭ وزىمەن ۇتا الاتىن ەدىك. وسىعان وراي ارتىق گول دا سوقتىق. بىراق تورەشى ساناماي تاستادى. سوڭىنان بەينە جازبانى قاراپ كورىپ, ءاربيتردىڭ گولدى نەگە ساناماۋ سەبەبىن تابا المادىق. ءبىز قايران قالىپ وتىرمىز.
-جازعى ترانسفەرلىك كەزەڭدە قۇرامدى باقىت ءابۋوۆ تولىقتىردى. جاعدايعا قاراي بىردەن نەگىزگى قۇرامنان تابىلدى. ەندى ونىڭ ويىنىنا باعا بەرىڭىزشى.
-ول ازىرگە ءتىپتى قازاقستان چەمپيوناتىندا ويناۋعا دا دايىن ەمەس. ءبىز تۇيىقتا قالعاندىقتان, ونى الاڭعا شىعارۋعا ءماجبۇر بولىپ وتىرمىز. ونى ءبىز بولاشاقتا پايدالانۋ ءۇشىن العانبىز. فۋتبولشى الداعى جاتتىعۋ جيىندارىنان وتكەن سوڭ بىرتىندەپ قالپىنا كەلەدى دەپ ويلاعانبىز. الايدا, ونى قازىردەن نەگىزگى قۇرامعا قوسۋعا ءماجبۇر بولدىق. جالپى ايتقاندا, پرەمەر-ليگا ويىندارىنا ازىرگە دايىن ەمەس.
-«سكەندەرباۋدى» جولدا قالدىرعاننان كەيىن ءسىز ەۋروپا ليگاسىندا ويناعاننىڭ تيىمدىرەك بولاتىنىن ايتقان ەدىڭىز. ءوز الاڭىڭىزدا «سەلتيكتى» تىزە بۇكتىرگەننەن كەيىن بۇل پىكىرىڭىز وزگەرگەن جوق پا؟
-شىنتۋايتىندا بىزگە قايسى تۋرنيرگە قاتىسساق تا ءبارىبىر. ال ەگەر ءبىزدىڭ چەمپيوندار ليگاسىندا ويناۋعا مۇمكىندىگىمىز بولىپ جاتسا, ودان نەگە باس تارتۋىمىز كەرەك؟ جانكۇيەرلەرىمىز, مىسالى, چەمپيوندار ليگاسىندا ويناعانىمىزدى قالايدى. سوندىقتان وسى ماقساتقا جەتۋ ءۇشىن قولدان كەلگەننىڭ ءبارىن جاسايمىز.
-«شاحتەر» توپتىق ويىن قارساڭىندا جاڭا ويىنشىلار الا الا ما؟
-جوق, الا المايمىز. ءبىزدىڭ قوسىمشا تاپسىرىستار ناۋقانىمىز جابىلىپ قالدى. «كوكتەم-كۇز» جۇيەسى بويىنشا وينايتىن چەمپيوناتتار ءۇشىن ترانسفەرلىك تەرەزە جابىلدى. دەمەك, قولدا بار ويىنشىلارمەن وينايمىز.
-كوماندا گلازگوعا قانداي كوڭىل-كۇيمەن اتتانعالى وتىر؟ قارىمتا ويىننان نە كۇتۋگە بولادى؟
-ءبىزدىڭ قولدان كەلگەنىنشە شايقاسىپ باعاتىنىمىز باسى اشىق نارسە. شامامىز جەتكەننىڭ ءبارىن جاسايمىز. بۇدان باسقا ەشتەڭەگە ۋادە بەرە المايمىن. كەشە قاراعاندىدا «شاحتەر» فۋتبول كلۋبىنا ارنالعان اللەيا اشىلدى. وسىعان وراي وبلىس پەن قالا باسشىلىعىنا العىس ايتقىم كەلەدى. ەڭ باستىسى, ءبىزدىڭ نەگىزگى جانكۇيەرلەرىمىز – شاحتەرلەردى ءتول مەرەكەلەرىمەن قۇتتىقتايمىن. ولارعا مىقتى دەنساۋلىق, وتباسىلىق يگىلىك جانە بارلىق جاقسىلىقتاردى تىلەيمىن.
رۋسلان يگىلىك.
RS. ەرتەڭ, 26 تامىز كۇنى تۇسكى ساعات 12-دە «شاحتەر» فۋتبول كومانداسىنىڭ قۇرامى قاراعاندىدان گلازگو قالاسىنا اپاراتىن چارتەرلىك رەيسپەن ۇشىپ شىعادى. بۇل ساپارعا ءبىزدىڭ «ەگەمەن قازاقستان» گازەتىنىڭ ارناۋلى ءتىلشىسى دە بىرگە باراتىن بولىپ شەشىم قابىلدانىپ ەدى, بىراق بۇل مەرزىمگە دەيىن ۇلىبريتانيا ۆيزاسى الىنىپ ۇلگەرمەگەندىكتەن, ساپارعا دايىندىقتى ورتا جولدان ۇزۋگە تۋرا كەلىپ وتىر. بۇل كەدەرگى كوماندانىڭ كوپتەگەن جانكۇيەرلەر ارمياسىنا دا قاتىستى بولىپ وتىر.
قارىمتا ماتچ 28 تامىز كۇنى كەشكە گلازگونىڭ 66 000 ورىندىق «سەلتيك پارك» ستاديونىندا وتەدى.
ءبىز «شاحتەردىڭ» نامىستى قولدان بەرمەي, ءوزىن جانە كوماندانىڭ ميلليونداعان جانكۇيەرلەرىن قاناعاتتاندىراتىن ناتيجەگە قول جەتكىزۋىن تىلەيمىز.
