كارانتيندىك جاعدايعا بايلانىستى قاۋىپسىزدىك شارالارىن جۇزەگە اسىرۋدا ءتارتىپ ساقشىلارىنىڭ قىزمەتى ماڭىزدى. الماتى قالاسىنا كىرەتىن قاقپالارعا قويىلعان بلوك-بەكەتتەرگە ۆولونتەرلەر ءتارتىپ ساقشىلارىنا كومەككە كەلدى. قوعامدىق ءتارتىپتى قامتاماسسىز ەتۋ ماقساتىندى 500-گە جۋىق ەرىكتى ارناۋلى ماماندارمەن بىرلەسىپ جۇمىس ىستەپ جاتىر.
ولار قالادا ورنالاسقان مەملەكەتتىك ەمەس ۇيىمداردىڭ مۇشەلەرى. ۋچاسكەلىك ينسپەكتورلار, پاترۋلدىك پوليتسيامەن بىرگە پروفيلاكتيكالىق جۇمىستاردى اتقارۋعا بىلەك سىبانا كىرىسكەن. ەرىكتىلەردىڭ كوپشىلىگى ەر ازاماتتار.
- ءوز مارشرۋتتارىنا بارماس بۇرىن ولارمەن ارنايى دايىندىق شارالارى وتەدى. ياعني, قانداي ءىس-ارەكەتتەرگە نازار اۋدارۋى ءتيىس, قۇقىقبۇزۋشىلىقتىڭ جولىن قالاي كەسۋگە بولادى دەگەن سياقتى داعدىلاردى ولارعا ۇيرەتەمىز. ءبىز ءۇشىن قازىرگى ساتتە ەرىكتىلەردىڭ كومەگى وتە ماڭىزدى. ويتكەنى ادامداردىڭ قاۋىپسىزدىگى ءبىرىنشى كەزەكتە, – دەيدى قالالىق پوليتسيا دەپارتامەنتىنىڭ رەسمي وكىلى سالتانات ازىربەك.
