دارىگەرلەر ۇسىنعان انتيسەپتيك جاساۋ ادىستەرىنىڭ ءتۇرى كوپ. سونىڭ ىشىندە تەز ءارى وڭاي جاسالاتىن تاسىلدەرىن ىرىكتەپ الدىق.
⦾ سونىمەن, ءبىرىنشى ءادىس بويىنشا, سىزگە كەرەگى - 50 مل مەديتسينالىق سپيرت, 30 مل گليتسەرين, 5 تامشى كەز كەلگەن ەفير مايى. اپەلسين, گرەيپفرۋت, سارى ورىك, جالبىز مايلارىن دا پايدالانۋعا بولادى, ونى ەندى تالعامىڭىزعا قاراي تاڭدايسىز. وسى دايىن كومپونەنتەردى جاقسىلاپ ارالاستىراسىز دا وزىڭىزگە ىڭعايلى ىدىسقا قۇيىپ الاسىز. انتيسەپتيكتىڭ قۇرامىنداعى سپيرت قولدى ميكروبتاردان زارارسىزداندىرسا, گليتسەرين قۇرعاپ كەتۋدەن ساقتايدى, ال ەفير مايلارى ءسپيرتتىڭ وتكىر ءيىسىن جويىپ, انتيسەپتيككە حوش ءيىس بەرەدى.
⦾ ەكىنشى ءادىس – 50 مل تۇيمەداقتىڭ سپيرتتىك تۇنباسىنا 50 مل سۋ, 30 مل گليتسەرين جانە 5 تامشى ەفير مايىن قوساسىز دا ارالاستىرىپ, اۋزىندا بۇرىككىشى بار قۇتىعا قۇياسىز.
⦾ تاعى ءبىر ءادىس - 50 مل مەديتسينالىق سپيرتكە 30 مل تۇيمەداق ءشوبىنىڭ قايناتپاسىن قوسىپ, سپيرتتىك تۇنبا دايىندايسىز. وعان 7 تامشى ءشاي اعاشىنىڭ ەفير مايىن جانە 1 اس قاسىق الوە وسىمدىگىنىڭ سىعىندىسىن قوساسىز. بۇل دا ميكروبتاردى جاقسى زارارسىزداندىراتىن قاسيەتكە يە.
⦾ دۇنيەجۇزىلىك دەنساۋلىق ساقتاۋ ۇيىمى دا انتيسەپتيكتى ۇيدە جاساۋدىڭ ءتاسىلىن عالامتور پاراقشاسىندا جاريالادى. ولار بىردەن ءبىر ليترلىك انتيسەپتيكتىڭ ءادىسىن ۇسىنىپتى. ونى دايىنداۋ ءۇشىن سىزگە 830 مل سپيرت, 40 مل سۋتەگى پەروكسيدى جانە 14 مل گليتسەرين قاجەت. ۇشەۋىن 50 مل-دەي سۋمەن ارالاستىراسىز دا اۋا كىرمەيتىن ىدىستا, سالقىن جەردە ساقتايسىز. كوشەگە شىققان كەزدە وزىڭىزگە جەتەرلىك بولىگىن شاعىن ىدىسقا قۇيىپ العانىڭىز ابزال.
مامانداردىڭ ايتۋىنشا, ۆيرۋستان ساقتانۋدىڭ باستى جولى – گيگيەنا ساقتاۋ, قولدى ءجيى سابىنداپ جۋ. ال سىرتتا جۇرگەن جاعدايدا قولدى انتيسەپتيكپەن ءجيى ءسۇرتىپ وتىرعان ءجون.
جوعارىدا ۇسىنىلعان انتيسەپتيكتەردىڭ قۇرامى كەز كەلگەن ءدارىحانادا ساتىلادى, باعاسى دا ارزان. جالپى قۇرامىندا ءسپيرتى بار انتيسەپتيكتىڭ كەز كەلگەنى باكتەريانى جويۋعا قاۋقارلى. بىراق دارىگەرلەر مۇمكىندىگىنشە ءسپيرتى 70 پايىزدان كەم ەمەس انتيسەپتيكتى پايدالانۋعا كەڭەس بەرەدى.
قىمبات توقتامۇرات
