ۇلتتىق اتوم كومپانياسىنىڭ باسشىلىعى اتاپ وتكەندەي, ازىرگە جاھاندى شارپىعان پاندەميا ۋران نارىعىنا ايتارلىقتاي نۇقسان كەلتىرە قويعان جوق. دەسە دە, الداعى ۋاقىتتا جاعداي كۇردەلەنسە, شيكىزاتتى تۇتىنۋشى ەلدەرگە جەتكىزۋگە بايلانىستى جوسپارعا تۇزەتۋلەر ەنگىزىلۋى ابدەن مۇمكىن.
2017-2018 جىلدارى «قازاتومونەركاسىپ» اكتسيالارىن IPO-عا شىعارۋ ماقساتىندا اكتيۆتەرىن قايتا قۇرىلىمداۋ مەن شوعىرلاندىرۋعا باعىتتالعان جۇمىس جۇرگىزدى. مۇنىڭ ناتيجەسى قۇبىلمالى كىرىسكە الىپ كەلدى. سول سەبەپتى تازا پايدانىڭ 50%-عا قىسقارۋى, وسى شوعىرلاندىرۋ ىسىنە تىكەلەي بايلانىستى دەيدى «قازاتومونەركاسىپ» ۇاك» اق باسقارما توراعاسى عالىمجان ءپىرماتوۆ. وعان جۇقپالى ۆيرۋستىڭ ەش قاتىسى جوق.
– ءبىزدىڭ وپەراتسيالىق قىزمەتتەن تۇسەتىن تابىس 84%-عا ارتتى. سوندىقتان ناتيجە جامان ەمەس دەپ ويلايمىن. جەر قويناۋى جانە جەر قويناۋىن پايدالانۋ تۋرالى كومپانيالارعا كەلىسىمشارتتا ايتىلعان كولمىنەن ازدى-كوپتى 20%-عا اۋىتقۋعا مۇمكىندىك بەرەدى. قازىر ءبىز مينۋس 20% دەڭگەيىندە تۇرمىز, ياعني جەر قويناۋىن پايدالانۋ تۋرالى كەلىسىمشارتقا وزگەرىس ەنگىزبەي-اق, قاجەت بولسا ءوندىرىس كولەمىن ارتتىرا الامىز. اتالعان كەلىسىمشارتقا وزگەرىس ەنگىزۋ جونىندە جەر قويناۋىن پايدالانۋشىلار مەن قۇزىرلى ورگان كەلىسسوزدەر ناتيجەسىندە شەشەدى. ازىرگە مۇنداي جوسپار قاراستىرىلعان جوق. كوروناۆيرۋسقا توقتالساق, قازىر جۇمىسىمىز تارتىپكە ساي اتقارىلۋدا جانە قىزمەتىمىزگە ازىرگە زيان تيمەدى. بىراق جاعداي ۇزاققا سوزىلىپ قيىنداسا, وندا تابيعي ۋراندى تۇتىنۋشىلارعا جەتكىزۋ جۇمىستارىنا بايلانىستى قىزمەتىمىزدى قايتا قاراستىرۋعا تۋرا كەلەدى, – دەدى ع.ءپىرماتوۆ.
سونداي-اق ۇلتتىق اتوم كومپانياسى قىزمەتكەرلەرىنىڭ ىشكى جانە سىرتقى جۇمىس ساپارلارىنا ۋاقىتشا شەكتەۋ قويىلۋ مۇمكىن ەكەنى ايتىلدى. باسقارما باسشىلىعى الەمدەگى احۋالدى ۇدايى نازاردا ۇستاپ وتىرعاندارىن جەتكىزىپ, بارلىق قاۋىپسىزدىك شارالارى مەيلىنشە كۇشەيتىلگەنىن ناقتىلادى.
