قاسىم-جومارت كەمەل ۇلى جۋىردا تۆيتتەر پاراقشاسىندا: ء«بىر جىل بۇرىن اسا كورنەكتى مەملەكەت قايراتكەرى, جاھاندىق دەڭگەيدەگى ساياساتكەر ن.نازارباەۆتان ەل تىزگىنىن قولعا الۋ مارتەبەسى بۇيىردى. مەملەكەتىمىزدىڭ نەگىزىن قالاۋشى – ەلباسى ستراتەگياسىنىڭ ساباقتاستىعىن جۇزەگە اسىرۋ ءۇشىن كوپ جۇمىس اتقارىلدى...» دەپ جازدى. راسىندا, سول تاريحي كەزەڭدەگى ەلباسىنىڭ تاڭداۋىنان كەيىن كوپ ۇزاماي وتكەن سايلاۋ قورىتىندىسى بويىنشا قازاقستان حالقىنىڭ باسىم بولىگى (70,96%) قاسىم-جومارت كەمەل ۇلىنىڭ كانديداتۋراسىنا قولداۋ ءبىلدىرىپ, داۋىس بەردى.
قاسىم-جومارت كەمەل ۇلىنىڭ سول 2019 جىلدىڭ 20 ناۋرىزىنان بەرى قابىلداعان شەشىمدەرى, وتكىزگەن كەزدەسۋلەرى مەن قابىلداۋلارى, جالپى اتقارعان جۇمىستارى تۇگەلدەي بۇقارالىق اقپارات قۇرالدارىندا جاريالانىپ وتىردى.
ەستەرىڭىزدە بولسا, قاسىم-جومارت كەمەل ۇلى ءوزىنىڭ سايلاۋالدى باعدارلاماسىن «ساباقتاستىق. ادىلدىك. ورلەۋ» دەپ اتاپ, ء وزىنىڭ نەگىزگى ءۇش ۇستانىمىن جاريالاعان بولاتىن. وسى باستى قاعيداتتاردى ۇستانعان قازاقستان پرەزيدەنتىنىڭ ءباسپاسوز قىزمەتى مەملەكەت باسشىسىنىڭ وسى ۋاقىت ارالىعىندا ءارتۇرلى دەڭگەيدەگى مىنبەرلەردەن سويلەگەن سوزدەرىن جيناقتاپ, 1 جىلدىق جۇمىستىڭ قورىتىندىسى رەتىندە «ساباقتاستىق. ادىلدىك. ورلەۋ» دەگەن اتپەن 4 تومدىق جيناق شىعارىپ وتىر.
بۇل كىتاپتاردا مەملەكەت باسشىسىنىڭ ءارتۇرلى ءىس-شارالاردا سويلەگەن 76 ءسوزىنىڭ تولىق ءماتىنى جيناقتالدى.
ءبىرىنشى كىتاپقا قاسىم-جومارت توقاەۆتىڭ ەلىمىزدى دامىعان ەلدەردىڭ قاتارىنا قوسۋ ماقساتىمەن قولعا العان باستامالارى جانە حالىقتىڭ جارقىن بولاشاعى ءۇشىن جۇزەگە اسىرىلاتىن جوبالار تۋرالى وي-پىكىرلەرى, مەملەكەتتىڭ الدىندا تۇرعان باسىم باعىتتارى مەن مىندەتتەرىن ايقىنداۋعا ارنالعان جالپىۇلتتىق ءىس-شارالاردا سويلەگەن سوزدەرى ەنگىزىلدى.
ەكىنشى كىتاپقا مەملەكەت باسشىسىنىڭ وڭىرلەردەگى جۇرتشىلىقپەن كەزدەسۋ وتكىزىپ, ەل مەن جەردىڭ تاعدىرى, ساياسي وزگەرىستەر, ەكونوميكاداعى سەرپىن, الەۋمەتتىك جاۋاپكەرشىلىك جانە باسقا دا قوعام ءومىرى تۋرالى وي-تولعامدارى, ەلىمىزدىڭ الدىندا تۇرعان باسىم باعىتتار مەن مىندەتتەر جونىندە سويلەگەن سوزدەرى توپتاستىرىلدى.
ءۇشىنشى كىتاپقا قازاقستان پرەزيدەنتىنىڭ شەت مەملەكەتتەردىڭ باسشىلارىمەن كەزدەسۋلەردە, الەمدىك سامميتتەر مەن حالىقارالىق فورۋمداردا سويلەگەن سوزدەرى جۇيەلەنىپ توپتاستىرىلدى. قاسىم-جومارت كەمەل ۇلى قازاقستان پرەزيدەنتى قىزمەتىنە كىرىسكەننەن كەيىن بىرنەشە ايدىڭ ىشىندە رەسەي, قىتاي, اقش جانە ەۋرازيانىڭ باسقا دا كوپتەگەن ەلىنىڭ كوشباسشىلارىمەن بايلانىس ورناتىپ, شەتەلدەرگە بىرنەشە مەملەكەتتىك, رەسمي جانە جۇمىس ساپارىن جاسادى. بىرىككەن ۇلتتار ۇيىمى, تاۋەلسىز مەملەكەتتەر دوستاستىعى, شانحاي ىنتىماقتاستىق ۇيىمى, ازياداعى ءوزارا ءىس-قيمىل جانە سەنىم شارالارى جونىندەگى كەڭەس, ەۋرازيالىق ەكونوميكالىق وداق, ۇجىمدىق قاۋىپسىزدىك تۋرالى شارت ۇيىمىنىڭ سامميتتەرىنە قاتىستى. اتالعان جيىنداردا حالىقارالىق ساياساتتاعى قازاقستاننىڭ ورنى, ۇستانىمى تۋرالى مالىمدەمەلەر جاسادى.
ءتورتىنشى كىتاپقا قازاقستان پرەزيدەنتىنىڭ ءبىر جىل ىشىندەگى وتاندىق جانە شەتەلدىك بۇقارالىق اقپارات قۇرالدارىندا جاريالانعان ماقالالارى مەن سۇحباتتارىندا, باق وكىلدەرى ءۇشىن وتكىزگەن بريفينگتەردە ەلىمىزدىڭ شەت مەملەكەتتەرمەن اراسىنداعى بايلانىستارعا, حالىقارالىق جانە ىشكى ساياسي ماسەلەلەرگە قاتىستى ايتقان وي-تولعامدارى ەندى. سونداي-اق كىتاپتىڭ سوڭىندا 8 سۇحبات پەن 2 دەرەكتى ءفيلمنىڭ بەينەنۇسقاسى فلەش-كارتاعا جۇكتەلىپ, قوسا بەرىلىپ وتىر.
مىنە, قازاقستان پرەزيدەنتىنىڭ ءباسپاسوز قىزمەتى مەملەكەت باسشىسىنىڭ ءبىر جىلعى اتقارعان جۇمىستارىنىڭ جالپى قورىتىندىسى رەتىندە وسى 4 تومدىقتى قالىڭ بۇقاراعا ۇسىنىپ وتىر. كىتاپ ساياساتتانۋشىلاردىڭ, جۋرناليستەردىڭ, زەرتتەۋشىلەردىڭ جانە جالپى, كەز كەلگەن ىزدەنۋشى ازاماتتىڭ تالعامىنا ساي كەلەدى دەگەن ۇمىتتەمىز.
