ورىنكۇل شەكتەۋلى مۇمكىندىگىنە قاراماستان ومىرلىك ماقساتىنا جەتكەن باتىل ايەل ەكەن. وتباسىندا 4 بالا ءوسىپ كەلەدى. ىسمەرلىگىن ۇيرەتۋدەن شارشاماعان. ءوزى تىگىنشىلىكتىڭ قىر-سىرىنا ۇيرەتكەن 8 شاكىرتى قازىر ناعىز شەبەر بولىپ الىپتى. سونىڭ ارقاسىندا تسەحتىڭ جۇمىسىن 24 ساعات بويى توقتاتپاي, ەكى اۋىسىمدا, كەزەكپەن جۇمىس ىستەۋدە.
بىراق ايتارىمىز بۇل جايىندا ەمەس. جاقىندا بىزگە ءوزى حابارلاسقان ورىنكۇل اپاي ءبىر سىرىن ايتىپ, كەڭەس سۇرادى. 1998 جىلى قىتاي اۋماعىنان ورالعان ىسمەر ايەلدىڭ اكەسى 2 جاسىندا ارعى بەتكە اۋعان جۇرتپەن بىرگە كەتكەن ەكەن. بۇل 1930 جىلدارداعى اقتاڭداق كەزەڭ بولۋى ءتيىس, تاركىلەۋدەن كەيىنگى اشتىق زۇلماتىمەن تۇسپا-تۇس كەلەدى. ورىنكۇلدىڭ بىلەتىنى, ارعى اتالارىنىڭ بالالارى قازاق جەرىندە قالعان.
– اكەمنىڭ اتالاس تۋىستارى وسى جاقتا قالعان ەكەن. ۇلكەندەرى قۋدالانىپ, اتىلىپ كەتكەنى انىق. ال ولاردان تاراعان ۇرپاق سوعىس جىلدارىندا بالالار ۇيىنە جىبەرىلىپتى. اعايىندى ۇل مەن قىز قاراعاندى قالاسىنداعى جەتىمدەر ۇيىندە ءوسىپتى. اكەمىز تۋىستارىن ىزدەۋمەن ءوتتى. 1970 جىلدارى قازاقستانمەن حات-حابار الماسۋ جاقسى ءجۇرىپ تۇرعاندا ىزدەۋ سالعان, حابارىن تاۋىپتى. 1978 جىلى بولۋى كەرەك, سول كەزدەگى «لەنينشىل جاس» گازەتىنە ءبىزدىڭ اۋلەتتى ىزدەگەن شاعىن حابارلاما باسىلىپتى. ونى ەلدەگى اعايىن بىزگە جىبەرىپ, اكەم تۋىسىنان حابار الىپ, تاپقانداي ەدى. اعايىنىمىزدان 1980 جىلداردىڭ باسىنا دەيىن حات كەلىپ تۇردى. كەيىن ول توقتاپ قالدى. ءبىزدىڭ ۇيدەگى حاتتار جوعالدى. اكەم قايتقان سوڭ تۋىس ىزدەۋگە مۇمكىندىك بولمادى. مەكەنجايى ساقتالمادى. اتىن دا ۇمىتىپپىن. تۇرسىنبەك نەمەسە تۇرىسبەك بولۋى كەرەك. ءوزى قاراعاندى وبلىسىندا ما, قالاسىندا ما لاۋازىمدى قىزمەت اتقارعانى انىق. اكەمىز سولاي دەيتىن, – دەپ مۇڭايعان ورىنكۇل «Egemen Qazaqstan» گازەتى ارقىلى تۋىسىنا ىزدەۋ سالىپ, ءبىر حابارىن بىلۋگە قۇشتار ەكەنىن ايتتى.
قازىرگىدەي اقپارات الماسۋ زامانىندا ورىنكۇلدىڭ بۇل ءوتىنىشىن جەردە قالدىرۋعا بولماس. وسىعان وراي «Egemen Qazaqstan» گازەتىنىڭ رەداكتسياسى 1970-1980 جىلدارى قاراعاندى وبلىسىندا تۇرعان ازاماتتاردىڭ اراسىنان ورىنكۇل باراتجاننىڭ تۋىسىن ىزدەۋدى باستايدى. وقىرمانداردان قانداي دا ءبىر اقپارات بولسا, رەداكتسياعا حابارلاسۋىن سۇرايمىز.
الماتى وبلىسى
