ولار وزدەرىنىڭ اتى-ءجونى, مەكەنجايى, تەلەفون نومىرلەرىن تىركەپ, دارىگەرلەردەن نۇسقاۋ الدى. ەمحانا ءار ەرىكتىگە ەكى مەديتسينالىق ماسكا, قول سۇرتەتىن سۇيىقتىق ۇستاتتى. ەندى ولار ءبىر ايدىڭ ىشىندە 4 مىڭ ناۋقاسقا ءدارى-دارمەك اپارىپ بەرۋى ءتيىس.
– 17 ناۋرىز كۇنى جوعارىدان «امبۋلاتوريالىق ەمدەۋ مەكەمەلەرىندە تۇرعىندارعا كورسەتىلەتىن تەگىن مەديتسينالىق كومەكتىڭ كەپىلدەندىرىلگەن كولەمى بويىنشا ءدارى-دارمەك پرەپاراتتارىن ناۋقاستىڭ تۇرعىلىقتى مەكەنجايىنا جەتكىزىپ بەرۋ قامتاماسىز ەتىلسىن» دەگەن نۇسقاۋ الدىق. وزدەرىڭىز بىلەسىزدەر, بىزدە قازىر جۇمىس قاۋىرت, فەلدشەرلەردىڭ قولى تيە بەرمەيدى. سوندىقتان سىزدەردىڭ كومەكتەرىڭىزگە جۇگىنۋگە تۋرا كەلىپ وتىر. بارشامىزعا ورتاق قايىرىمدى ىسكە اتسالىسۋعا نيەت بىلدىرگەندەرىڭىز ءۇشىن شىن جۇرەكتەن العىسىمدى ايتامىن, – دەدى ەمحانا ديرەكتورى.
جاستار ساياساتى باسقارماسىنىڭ باسشىسى مارات جۇرقاباەۆ وبلىستىق دەنساۋلىق ساقتاۋ باسقارماسى ءوتىنىش بىلدىرگەن سوڭ, ساعات 11-لەر شاماسىندا الەۋمەتتىك جەلى ارقىلى ەمحانالارعا ەرىكتى ازاماتتاردىڭ كومەگى كەرەك ەكەنىن جاريالاعان. اينالاسى 3 ساعاتتىڭ ىشىندە 50 شاقتى ادام جينالدى. كوبى وزدەرىنىڭ جەكەمەنشىك كولىگىمەن كەلگەندەر. ەرىكتى بولۋ ەرىككەننىڭ ءىسى ەمەس. بۇرىن ەرىكتىلەر دەگەن ۇعىمدى تەك ستۋدەنت جاستار دەپ قانا ءتۇسىنۋشى ەدىك, ەمحانا الدىنا جينالعانداردىڭ ىشىندە قىرىقتىڭ قىرقاسىنا شىققان قىرما ساقالدار دا ءجۇر.
ەرىكتىلەر جالپىعا جاريالانعان توتەنشە جاعداي اياقتالعانشا وسى ەمحانالاردا ديسپانسەرلىك تىركەۋدە تۇرعان قانت ديابەتى بار, جۇرەگى اۋىراتىن, اۋىر وتادان شىققان جانە قوزعالۋى قيىن ءارتۇرلى سوزىلمالى اۋىر دەرتكە ۇشىراعان ناۋقاستارعا ءدارى-دارمەك تاسيتىن بولادى.
يگى باستاماعا ءبىز دە اتسالىسقىمىز كەلىپ ەدى, جولىمىز بولمادى. بىزدەن ەرتەرەك بارىپ تىركەلىپ قويعاندار كوپ ەكەن. ءبىر كۇن ىشىندە ءدارى-دارمەك اپارىلۋى ءتيىس مەكەنجايلار تۇگەل قامتىلىپ قويىپتى. سوندىقتان تىزىمگە تىركەلىپ, كەزەگىمىزدى كۇتەتىن بولىپ كەلىستىك. وسىلايشا, بۇگىنگىدەي قاتەرلى شاقتا تەك ازىق-ت ۇلىك الۋ ءۇشىن عانا ەمەس, جاقسىلىق جاساۋ ءۇشىن دە ۇزىن-سونار كەزەك كۇتۋگە تۋرا كەلەتىنىنە كوز جەتكىزدىك.
قوستاناي
