ءسال ايالداپ, سىرتتاي قىزىعا قارايسىز. «زامان وسىلاردىكى عوي. جۇمىس كوپ. ۇيدەن ءۇي, قالادان قالا تۇرعىزىپ جاتىر, كۇرەپ تاۋىپ جاتقان شىعار» دەگىڭىز كەلەدى دە, ونى سول ساتتە-اق ۇمىتىپ, جونىڭىزگە كەتە باراسىز. سىرت كوزگە بارلىعى جاقسى عوي. بىراق ەلىمىزدە جىل ساناپ قارقىن الىپ كەلە جاتقان قۇرىلىس سالاسىندا دا قوردالانىپ قالعان ماسەلە كوپ. ەڭ اۋەلى ساپالى كادر از. قۇرىلىسشى دايارلايتىن كاسىبي وقۋ وشاقتارى ساپالى مامان شىعارا الماي وتىر. قۇرىلىسشىنىڭ ايلىعى تومەن, تابىسى تۇراقسىز, قىستا كوبىنە جۇمىسسىز وتىرادى. تەندەر بارىسىندا جەرگىلىكتى قۇرىلىس كومپانيالارىنا باسىمدىق بەرىلمەيدى. ناتيجەسىندە, ونى ءىرى قالالارداعى الپاۋىت كومپانيالار ۇتىپ الىپ, جەرگىلىكتى كاسىپورىن ءجيى ۇلەستەن قاعىلادى. جەرگىلىكتى جەردە قۇرىلىس تاۋارلارىن وندىرۋگە اكىمشىلىك كەدەرگى كوپ. وسى جانە قۇرىلىس سالاسىنداعى باسقا دا كۇرمەۋلى ماسەلەلەردىڭ شەت جاعاسى قوستانايدا وتكەن «قازاقستان قۇرىلىسشىلار وداعى» وبلىستىق فيليالىنىڭ ەسەپتىك-سايلاۋ كونفەرەنتسياسىندا ءسوز بولدى.
بۇگىندە وداقتىڭ وبلىستىق فيليالىندا 20 شاقتى قۇرىلىس كومپانياسى, سونداي-اق قۇرىلىس ماتەريالدارىن شىعاراتىن, ساۋدالايتىن, تاسىمالدايتىن ون شاقتى كاسىپورىن بار.
– ءبىزدىڭ قۇرىلعانىمىزعا كوپ بولا قويعان جوق. باستى ماقساتىمىز – قۇرىلىس كومپانيالارىنىڭ باسىن بىرىكتىرۋ. سول ارقىلى بارىمىزگە ورتاق كۇردەلى ماسەلەلەردىڭ شەشىلۋ جولدارىن بىرلەسە ىزدەستىرۋ, ءوزارا تاجىريبە الماسۋ, قۇرىلىس سالاسىنا ماماندانعان شاعىن جانە ورتا كاسىپكەرلەردىڭ قۇقىعىن قورعاۋ. قازىر نەگىزىنەن قۇرىلىس كومپانيالارىنىڭ باسشىلارىمەن كەزدەسۋلەر وتكىزىپ, ءتۇسىندىرۋ, ناسيحاتتاۋ جۇمىستارىن جۇرگىزىپ جاتىرمىز. قازىر ەلىمىزدە ءجۇرىپ جاتقان قۇرىلىس كوپ, بىراق قۇرىلىسشى از. ءبىز كوپ بولىپ بىرىگىپ, وسى ماسەلەنى كوتەرۋىمىز كەرەك. ءىرى قۇرىلىس كومپانيالارىنىڭ جانىنان قۇرىلىسشى دايارلايتىن وقۋ وشاقتارى, ءتىپتى بولماسا شاعىن وقۋ سىنىپتارى اشىلۋى كەرەك. كەزىندە بولعان, ال بۇگىندە ۇمىتىلعان ءبىر جاقسى ءداستۇر بار. بۇل قۇرىلىسشىنىڭ مارتەبەسىن كوتەرۋ ماسەلەسى. قازىرگى قۇرىلىسشىنىڭ جاعدايى ءماز ەمەس. ولاردىڭ جۇمىسى جاۋاپتى ءارى اۋىر. سوندىقتان الەۋمەتتىك جەڭىلدىكتەر قاراستىرىلۋى كەرەك. بۇرىنعى «ەڭ ۇزدىك تاس قالاۋشى», «ەڭ ۇزدىك سىلاقشى» دەگەن سياقتى بايقاۋلار ۇيىمداستىرىپ, ىنتالاندىرۋ شارالارىن تىرىلتكەن دۇرىس. قۇرىلىس كومپانياسىندا جۇمىس ىستەيتىن قاراپايىم مامان ەرتەڭ وسى كاسىپورىن ءوزىن باسپانامەن قامتيتىنىنا سەنىمدى بولۋى كەرەك. سوندا عانا جاستار قۇرىلىس سالاسىنا شىنايى قىزىعۋشىلىق بىلدىرە باستايدى, – دەدى وبلىستىق فيليال ديرەكتورى ءۋاليحان نىسانوۆ.
قوستاناي
