سەناتورلار «قازاقستان رەسپۋبليكاسى مەن برازيليا فەدەراتيۆتىك رەسپۋبليكاسى اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭ جوباسىن قارادى.
دەپۋتات ۆلاديمير ۆولكوۆ قۇجاتتى تانىستىرا كەلىپ, شارتتىڭ راتيفيكاتسيالانعانى قازاقستاندا قىلمىسقا قارسى كۇرەستە ەكى ەلدىڭ ءتيىمدى ىنتىماقتاستىعىن ارتتىرۋعا باعىتتالعان حالىقارالىق قۇقىقتىق ءتارتىپتى قالىپتاستىرۋعا ىقپال ەتەتىنىن اتاپ ءوتتى.
وتىرىستىڭ كۇن ءتارتىبى اياسىندا «قازاقستان رەسپۋبليكاسى مەن برازيليا فەدەراتيۆتىك رەسپۋبليكاسى اراسىنداعى ادامداردى ۇستاپ بەرۋ تۋرالى بەرۋ تۋرالى شارتتى راتيفيكاتسيالاۋ تۋرالى» زاڭ جوباسى دا تالقىلاندى. بۇل شارت شەت مەملەكەتتىڭ اۋماعىندا سوتتان جاسىرىنىپ جۇرگەن ادامداردى ەكستراديتسيالاۋ ءۇشىن قۇقىق قورعاۋ ورگاندارىنا قوسىمشا مۇمكىندىكتەر بەرەدى.
دەپۋتاتتار سونداي-اق قازاقستان رەسپۋبليكاسى مەن برازيليا فەدەراتيۆتىك رەسپۋبليكاسى اراسىنداعى سوتتالعان ادامداردى بەرۋ تۋرالى شارتتى دا راتيفيكاتسيالادى. بۇل قۇجات باس بوستاندىعىنان ايىرۋ جازاسىن ءوز ەلىندە وتەۋ مۇمكىندىگىن بەرەدى جانە الەۋمەتتىك وڭالتۋ مەن قوعامعا كىرىگۋىن جەدەلدەتەدى.
سەناتورلار 2014 جىلعى 15 تامىزداعى كولىك قۇرالى پاسپورتىنىڭ (كولىك قۇرالىنىڭ ءشاسسيى پاسپورتىنىڭ) جانە وزدىگىنەن جۇرەتىن ماشينا جانە تەحنيكانىڭ باسقا دا تۇرلەرى پاسپورتىنىڭ بىرىڭعاي نىساندارىن ەنگىزۋ جانە ەلەكتروندىق پاسپورتتار جۇيەلەرىن ۇيىمداستىرۋ تۋرالى كەلىسىمگە ارمەنيا رەسپۋبليكاسىنىڭ قوسىلۋى تۋرالى حاتتامانى قارادى جانە راتيفيكاتسيالادى.
سەناتور ميحايل بورتنيك زاڭ جوباسىن تانىستىرا كەلىپ, قاعاز تۇرىندەگى پاسپورتتاردى ەلەكتروندىق نۇسقاعا كوشىرۋ ەاەو اۋماعىندا بەلگىلەنگەن قاۋىپسىزدىك تالاپتارىنا سايكەس كەلمەيتىن تەحنيكانى اينالىمعا شىعارۋعا جول بەرمەيتىنىن اتاپ ءوتتى.
پالاتا دەپۋتاتتارى 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋىنا بايلانىستى قىرعىز رەسپۋبليكاسىنىڭ 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتتى, ەۋرازيالىق ەكونوميكالىق وداقتىڭ قۇقىعىنا كىرەتىن جەكەلەگەن حالىقارالىق شارتتاردى جانە ەۋرازيالىق ەكونوميكالىق وداق ورگاندارىنىڭ اكتىلەرىن قولدانۋى جونىندەگى جاعدايلار مەن وتپەلى ەرەجەلەر تۋرالى 2015 جىلعى 8 مامىردا قول قويىلعان حاتتاماعا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى ماسەلەنى دە قارادى.
دەپۋتات ءالىمجان قۇرتاەۆتىڭ ايتۋىنشا, قارالىپ وتىرعان زاڭ جوباسىندا قىرعىز رەسپۋبليكاسىنىڭ مەملەكەتتىك شەكاراسىنداعى وتكىزۋ پۋنكتتەرىن جايلاستىرۋ جانە ماتەريالدىق-تەحنيكالىق جابدىقتاۋ مەرزىمىن تاعى 2 جىلعا ۇزارتۋ ۇسىنىلىپ وتىر.
سەنات توراعاسى داريعا نازارباەۆا وتىرىستى قورىتىندىلاي كەلىپ, دەپۋتاتتاردى توتەنشە جاعداي كەزەڭىندەگى سەنات جۇمىسىنىڭ رەگلامەنتى تۋرالى حاباردار ەتتى.
اتاپ ايتقاندا, توتەنشە جاعداي بولعان كەزەڭدە بارلىق ءىسساپارلار مەن جوسپارلى كوپشىلىك ءىس-شارالارى توقتاتىلادى. زاڭدار بويىنشا جۇمىستار جالعاسا بەرەدى. بۇل رەتتە دەپۋتاتتارعا پالاتا مەن كوميتەتتەردىڭ وتىرىستارىنا شاقىرىلعانداردىڭ سانىن مۇمكىندىگىنشە شەكتەۋ ۇسىنىلىپ وتىر.
اپپاراتتىڭ 70-تەن استام قىزمەتكەرى ۇيدەن ىستەيتىن جۇمىس تارتىبىنە كوشىرىلدى, قالعان قىزمەتكەرلەر ءۇشىن قىسقارتىلعان جۇمىس كۇنى بەلگىلەندى. سەنات عيماراتىندا كۇنىنە بىرنەشە مارتە قاجەتتى سانيتارلىق-ەپيدەميولوگيالىق جۇمىستار جۇرگىزىلۋدە.
«مەملەكەتتىڭ مىندەتى - ازاماتتارىمىزدىڭ ءومىرى مەن دەنساۋلىعىن ساقتاۋ, ەكونوميكا مەن تۇتىنۋ نارىعىنىڭ جۇمىس ىستەۋىن قامتاماسىز ەتۋ. جۇقپالى دەرتپەن ناتيجەلى كۇرەسۋ ءۇشىن ەرىك-جىگەر مەن شەشىمدى بولۋ كەرەك. دەگەنمەن ساقتىق تا كەرەك. بىزگە ەرتەڭگى كۇنگە سەنىممەن قاراپ, بويىمىزداعى ۇرەي مەن كۇدىكتەن ارىلۋ قاجەت. ءبىز – تالاي سىندا شىنىققان مىقتى حالىقپىز. ءبىز ءبارىن جەڭەمىز», - دەدى د.نازارباەۆا ءوز سوزىندە.
سەنات باسشىسى ازاماتتاردىڭ جۇمىسپەن قامتىلۋى مەن تابىستارى ماسەلەسىنە بولەك توقتالدى.
«توتەنشە جاعداي مەن كارانتين, وكىنىشكە وراي, ىسكەرلىك بەلسەندىلىكتى باياۋلاتۋعا الىپ كەلەدى. كوپتەگەن ادامدار ۋاقىتشا جۇمىسسىز عانا ەمەس, سونداي-اق ءومىر سۇرۋگە ارنالعان قاراجاتسىز دا قالۋى مۇمكىن. الماتى قالاسىندا تۇراقتى نەمەسە ۋاقىتشا جۇمىس ىستەيتىن الماتى وبلىسىنىڭ تۇرعىندارى جونىندەگى ماسەلەلەر بار ەكەنى بىزگە بەلگىلى. بۇل 500 مىڭ شاماسىنداعى ادام, ولارعا وتباسى مۇشەلەرىن قوسىڭىز, ءبىز پروبلەمانىڭ اۋقىمىن ءتيىستى مولشەردە كورە الامىز. مەملەكەتتىك ورگاندار, دەپۋتاتتار بۇل جاعدايعا باسا نازار اۋدارۋى ءتيىس دەپ ەسەپتەيمىن. قالىپتان تىس, باتىل شەشىمدەر قاجەت», - دەدى د.نازارباەۆا.
سەنات توراعاسىنىڭ ايتۋىنشا, «جۇقپالى دەرتپەن ناتيجەلى كۇرەسۋ ءۇشىن ەرىك-جىگەر مەن شەشىمدى بولۋ كەرەك. دەگەنمەن ساقتىق تا كەرەك».
سەناتورلار وتىرىس سوڭىندا دەپۋتاتتار مەن سەنات اپپاراتىنىڭ ءبىر كۇندىك ەڭبەكاقىسىن ۆيرۋسپەن كۇرەس قورىنا اۋدارۋ تۋرالى شەشىم قابىلدادى.
