ديماشتىڭ ماسكەۋ, ريگا جانە كيەۆ قالالارىندا ۇيىمداستىرىلعان ءۇش كونتسەرتى «اRNAU» تۋرى اياسىندا ءوتتى. بۇل الەمدىك گاسترولدە ديماش ءاربىر ەكىنشى كۇنى ءوزىنىڭ كونتسەرتتەرىن بەرىپ وتىردى. ونىڭ رەسەي اۋماعىنداعى ەكاتەرينبۋرگ, قازان جانە كراسنودار قالالارىندا وتكەن العاشقى قويىلىمدارى دا وسىنداي ىرعاقتان جاڭىلعان جوق.
بارلىق كونتسەرتتەرىندە ديماش تەك مۋزىكالىق اسپاپتاردىڭ سۇيەمەلدەۋىمەن, جاندى داۋىسپەن ءان ايتتى. قويىلىمدار كەزىندە ونىڭ اندەرى سونىسىمەن ەرەكشەلەنەتىنىن ايتۋعا ءتيىسپىز. ويتكەنى, ساناداعى ويلار مەن سەزىمدەردى جۇرەكتەن شىققان ۇنمەن عانا جەتكىزۋگە بولادى. سونداي-اق «اRNAU» الەمدىك تۋرىنىڭ باستى كونتسەپتسياسى دا سول, مۋزىكا ارقىلى جانكۇيەرلەردىڭ جان دۇنيەسىنە جول تابۋ, سەزىمىن تەربەتۋ, ولارمەن بىرگە بولۋ.
ءوزىنىڭ شىعارماشىلىق كەشتەرى كەزىندە ديماش تەحنيكالىق تۇرعىدان كۇردەلى ۆوكال تەحنيكاسى مەن اسپاپتاردى قولدانادى. باريتون تەنورىنان كولوراتۋرا سوپرانوعا ساۋاتتى تۇردە ءوتۋ وتە قيىن جانە كوپ تاجىريبەنى قاجەت ەتەدى. مۇنداي ۆوكالدى تەحنيكانى شەبەر قولدانباسا, داۋىستى زاقىمداپ الۋ نەمەسە ءتىپتى ونى مۇلدەم جوعالتىپ الۋى عاجاپ ەمەس.
داريا, جانكۇيەر (رەسەي, ماسكەۋ):
– كونتسەرتتەردە ديماشتىڭ اندەرىنىڭ اراسىندا ءۇزىلىس جوق. ءبىر كومپوزيتسيادان ەكىنشىسىنە اۋىسۋ 15-20 سەكۋندتى عانا الادى. وسى ۋاقىتتا داۋىستىڭ قالىپتى دەمالۋعا ۋاقىتى جوق! وسىنداي تاڭعاجايىپ داۋىستىق تەحنيكانى قولداناتىن ديماشتىڭ اندەرىن تىڭداماۋ, وعان سۇيسىنبەۋ, ءتىپتى مۇمكىن ەمەس. مۇنى تاڭعالارلىق دەپ باعالاۋعا دا بولادى. ال ول ەشقانداي قيىندىقسىز ءان سالۋىن جالعاستىرا بەرەدى!
سونداي-اق ديماشتىڭ كونتسەرتتىك باعدارلاماسىندا ءانشىنىڭ وتىرىپ ورىندايتىن تۋىندىلارى بار. بارلىق مۋزىكانتتار مەن ۆوكاليستەر وتىرىپ ءان شىرقاۋ تۇرىپ ايتۋدان گورى قيىن ەكەنىن جاقسى بىلەدى. مۇنىڭ باستى سەبەبى – دۇرىس تىنىس الۋ.
ءان ايتۋ كەزىندە دۇرىس تىنىس الۋ - ۆوكالدىڭ نەگىزى, ونسىز كۇردەلى ۆوكالدىق بولىكتەردى ءوز دەڭگەيىندە ورىنداۋ مۇمكىن ەمەس. مۇنى مۋزىكادا ديافراگما نەمەسە ىشتەن دەم الۋ دەپ اتايدى. ال ونى وتىرعان كەزدە باسقارۋ ءتىپتى قيىنىراق كورىنەدى. ماسەلەن, دۇرىس دەم الۋعا ەشتەڭە كەدەرگى كەلتىرمەيتىندەي, دەنە كۇيىڭىزدى ۇنەمى قاداعالاپ وتىرۋ كەرەك.
ديماشتىڭ جانكۇيەرلەرى ۆوكال ماماندارىمەن بىرگە ونىڭ داۋسى, كاسىبي تەحنيكاسى ەرەكشە ەكەنىنە نازار اۋدارادى.
كونتسەرت بارىسىندا DimashNews ءتىلشىسى ءانشىنىڭ بىرنەشە جانكۇيەرىمەن سويلەسىپ كورگەن. ولار ءانشىنىڭ كەشتەرىنەن قۋانىشپەن قايتقاندارىن ايتادى. سونىمەن قاتار الەمدە ەڭ تومەنگى دەڭگەيدەن جوعارى رەگيسترلەرگە دەيىن وسىنداي كۇردەلى ۆوكالدى اۋىسۋلاردى ورىنداي الاتىن ادام بار ەكەنىنە سەنە المايدى. كورەرمەندەر ءۇشىن ءار كونتسەرت سيقىرعا ۇقسايدى جانە كەرەمەت ەنەرگياعا يە بولۋ ءۇشىن ولاردىڭ كوپشىلىگى ۇنەمى كەلىپ تۇرادى.
كونتسەرتتەرى بارىسىندا ديماش ءارتۇرلى ەلدەردەگى جانكۇيەرلەرىن قازاق مادەنيەتىمەن تانىستىرادى. ءوز وتانىنا, سالت-داستۇرىنە, تىلىنە دەگەن سۇيىسپەنشىلىگىن كورسەتەدى, ونى اندەرى ارقىلى جەتكىزەدى.
ديماشتىڭ شەتەلدىك تىڭدارماندارىنىڭ قازاق تىلىنە دەگەن قىزىعۋشىلىعى ارتقانى دا تاڭعالارلىق جاعداي. الەمنىڭ تۇكپىر-تۇكپىرىنەن, برازيليادان, اقش-تان, فرانتسيادان, گەرمانيادان, يتاليادان جانە باسقا ەلدەردەن كەلگەن كوپشىلىك بۇرىن-سوڭدى قازاق ءتىلىن ەستىمەسە دە, ۇلتتىق مۋزىكامىزدى قۋانا تىڭدايدى.
ولاردىڭ كەيبىرى قازاق تىلىنە قىزىققانى سونشالىق, ونى زەرتتەي باستاعان. ديارلار ديماشتىڭ قازاق تىلىندە ءان ايتقانىن ۇناتاتىنىن جەتكىزدى. ءار كونتسەرتتە جانكۇيەرلەر انشىمەن بىرگە انا تىلىندە قالاي ءان شىرقايتىنىن ەستىسەڭىز عوي!..
كونتسەرتتەردىڭ بىرىندە DimashNews ءتىلشىسى ياكۋتيادان كەلگەن جانكۇيەرمەن كەزدەستى. ول قازاق بولعانىمەن, اتا-اناسى ياكۋتيادا تۋىپ-وسكەن ەكەن. بۇرىن قازاقستانعا ونشا قىزىعۋشىلىق تانىتپاعان, بىراق ديماشتىڭ شىعارماشىلىعىمەن تانىسۋ ارقىلى ءوزىنىڭ تاريحي وتانىمەن بايلانىسىن كۇشەيتتى. قىزدىڭ بويىندا ەلگە دەگەن ساعىنىشى مەن سۇيىسپەنشىلىگى وياندى دەپ ايتۋعا بولادى. قازىر ول قازاقستاننىڭ ۇلكەن تۋىن ۇستاپ الىپ ديماشتىڭ ءار كونتسەرتىنە قاتىسادى, ءوزىنىڭ ەتنيكالىق وتانىنا قۇرمەت كورسەتەدى.
نيدەرلاندىدان كەلگەن پيكسي ەسىمدى ديماشتىڭ جانكۇيەرى ءوزىنىڭ سۇيىكتى ءارتىسىنىڭ ءار كونتسەرتىنە ەرەكشە كوڭىل-كۇيمەن كەلەدى. ول دا اركەز قازاقستاننىڭ تۋىن زور مارتەبەمەن ۇستاپ تۇرادى. سونىمەن قاتار پيكسي ءوزىنىڭ ينستاگرامداعى ديماشتىڭ جاڭالىقتار پاراعىن بەلسەندى تۇردە جۇرگىزىپ وتىرادى. كونتسەرتكە كەلە الماي قالعان كوپشىلىككە ءانشىنىڭ ونەرىن, ەڭ بولماسا, الەۋمەتتىك جەلىلەر ارقىلى تاماشالاۋعا مۇمكىندىك بەرەدى.
سونداي-اق جانكۇيەرلەر ديماش كەلگەنگە دەيىن ءانشىنىڭ كيىم-كەشەك بولمەسىن كەرەمەت توسىنسىيلارمەن تولتىرىپ قويۋدى ادەتكە اينالدىرعان. ادەمى فوتوسۋرەتتەر, گۇلدەر, جىلى لەبىزدەر مەن جەمىس-جيدەكتەر سەبەتتەرى مەن جازبالار ءاردايىم ءارتىستىڭ جۇرەگىن جىلىتىپ, كونتسەرت الدىندا جوعارى كوڭىل-كۇي سىيلايدى.
