وسى ورايدا قىزمەتكەرلەر مەن جۇمىسشىلار تاراپىنان تۋىنداعان ماڭىزدى سۇراقتارعا الماتى وبلىسى بويىنشا ەڭبەك ينسپەكتسياسى دەپارتامەنتىنىڭ مەملەكەتتىك ەڭبەك ينسپەكتورى باۋىرجان بايعازى ۇلى جاۋاپ بەرگەن ەدى. جالپى, ەڭبەك يسپەكتورلارى جۇمىس بەرۋشىلەردى ءوز جۇمىسكەرلەرى الدىندا الەۋمەتتىك جاۋاپكەرشىلىكتى ارتتىرىپ, ەڭبەك زاڭناماسى تالاپتارىن ساقتاۋعا شاقىرىپ وتىر.
- بىرىنشىدەن, ايماقتاعى جۇمىس بەرۋشىلەر جۇمىسكەرلەردى قاشىقتان جۇمىس ىستەۋ پروتسەسىنە كوشىرۋگە قۇقىلى. بۇل جاعدايداعى ەڭبەك قاتىناسى «ەڭبەك» كودەكسىنىڭ 138-بابىمەن رەتتەلەدى. قاشىقتان جۇمىس ىستەۋ رەجيمىنە كوشكەن ۋاقىتتا جۇمىس بەرۋشى جۇمىسكەرلەرگە بارلىق قاجەتتى جاعداي جاساۋعا مىندەتتى بولادى. ياعني, جۇمىسشىنىڭ ايلىق جالاقىسى وزگەرمەيدى,- دەيدى مەملەكەتتىك ەڭبەك ينسپەكتورى.
سونداي-اق توتەنشە جاعدايعا بايلانىستى كاسىپورىندار مەن مەكەمەلەردە شتات كولەمى شەكتەلگەن جاعدايدا, جۇمىس بەرۋشى ءوزىنىڭ بۇيرىعىمەنەن جۇمىسكەرلەرگە قىسقارتىلعان جۇمىس ۋاقىتىنىڭ رەجيمىن قولدانۋعا قۇقىلى ەكەن. ياعني, اپتاداعى جۇمىس كۇنىنىڭ سانىن ازايتۋعا نەمەسە كۇندەلىكتى جۇمىس ۋاقىتىن قىسقارتۋعا قۇقىلى. بۇل جاعداي جۇمىسكەرلەرگە جالاقى ناقتى اتقارعان جۇمىسىنىڭ ۋاقىتىنا, ساعاتىنا قاراي ەسەپتەلەتىن بولادى.
- جۇمىس بەرۋشىنىڭ تولىق ەمەس جۇمىس ۋاقىتىن ەنگىزۋىنەن تۋىنداعان ەڭبەك قاتىناسى ەلىمىزدىڭ «ەڭبەك» كودەكسىندە قاراستىرىلعان. زاڭنىڭ 70-بابىندا بۇل جازىلعان. سونىمەن قاتار كودەكستىڭ 68-بابىنىڭ 2-تارماعىنا سايكەس ەڭبەك شارتىندا جۇمىس ۋاقىتىنىڭ قالىپتى ۇزاقتىعى ءۇشىن تولەنەتىندەي تولەماقى ازىراق جۇمىس ۋاقىتىنا بايلانىستى ازايتىلۋى دا مۇمكىن. ياعني جۇمىس بەرۋشىلەر وزدەرىنىڭ قارجىلىق مۇمكىندىكتەرىنە قاراي وتىرىپ, ەڭبەك شارتىندا كورسەتە وتىرىپ, جۇمىس ۋاقىتى ءۇشىن تولەنەتىن جالاقى مولشەرىن ساقتاپ, تولىق ەمەس جۇمىس ۋاقىتىن ەڭگىزۋگە قۇقىلى, - دەيدى ءوز كەڭەسىندە باۋىرجان بايعازى ۇلى.
ال مەكەمەلەر مەن كاسىپورىندار جۇمىسى توقتاعان جاعدايدا جۇمىس بەرۋشىلەر «ەڭبەك» كودەكسىنىڭ 312-بابىن باسشىلىققا الىپ, جۇمىسكەرلەرگە تومەنگى مولشەردە جالاقى تولەۋى ءتيىس ەكەن. قازىر ەلىمىزدەگى ەڭ تومەن جالاقى مولشەرى 42500 تەڭگە كولەمىندە. سونداي-اق جۇمىس بەرۋشى مەن قىزمەتكەر اراسىنداعى كەلىسىم بويىنشا جۇمىسكەر جىلىنا ءبىر رەت اقىلى دەمالىسقا شىعۋعا قۇقىلى.
