پالاتا سپيكەرى نۇرلان نىعماتۋليننىڭ توراعالىعىمەن ءماجىلىس بيۋروسىنىڭ شەشىمى بويىنشا دەپۋتاتتار جانە اپپارات قىزمەتكەرلەرىنىڭ ءبىر كۇندىك ەڭبەكاقىسىن كوروناۆيرۋس ينفەكتسياسىنا قارسى كۇرەسكە باعىتتاۋ تۋرالى قاۋلى قابىلداندى. قارجى كارانتين ەنگىزىلگەن نۇر-سۇلتان جانە الماتى قالالارىندا COVID-19 كوروناۆيرۋس ەپيدەمياسىمەن كۇرەسكە قاجەتتى ءىس-شارالاردى جۇزەگە اسىرۋعا ارنالادى.
ءماجىلىس توراعاسى نۇرلان نىعماتۋلين اتاپ وتكەندەي, ەل باسشىلىعى ازاماتتاردىڭ قاۋىپسىزدىگىن قامتاماسىز ەتۋ ءۇشىن اۋقىمدى شارالاردى قولعا الۋدا.
وسىنداي قيىن-قىستاۋ كەزەڭدە بارلىق قازاقستاندىقتار ورتاق ماقسات جولىندا كۇش بىرىكتىرۋىمىز
كەرەك.
* * *
پاندەميا توڭىرەگىندەگى احۋال حالىقتى بىرىكتىردى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى كەڭسەسىنىڭ قىزمەتكەرلەرى شەتتە قالماي كوروناۆيرۋسقا قارسى كۇرەسۋ ءۇشىن نۇر-سۇلتان قالاسىنىڭ اكىمدىگىنە وزدەرىنىڭ ءبىر كۇندىك جالاقىلارىن اۋداردى, دەپ حابارلادى تۇڭعىش پرەزيدەنتتىڭ ءباسپاسوز قىزمەتى.
